ކ. މާލެ
|
25 ޖޫން 2021 | ހުކުރު 12:17
ށ.ކަނޑިތީމް،
ށ.ކަނޑިތީމް،
ރޮޓަސް ޓްރީސްޓިކާސް
ކަނޑިތީމުން ގޯތި ދޫކުރުން
ކަނޑިތީމުން ބަންޑާރަ ގޯތި ދޫކުރުމަށް ހަމަޖެހިފައިވާތީ ގޯއްޗަށް އެދި ހުށަހެޅުމުގެ ފުރުސަތު ހުޅުވާލައިފި
 
އުސޫލާ އެއްގޮތަށް ފޯމް ހުށަހެޅުމަށް ކައުންސިލުން އިލްތިމާސްކޮށްފައިވޭ
 
ފޯމު ބަލައިގަތުމަށް ހަމަޖެހިފައިވަނީ 30 ޖޫން ވާ ބުދަ ދުވަހުން ފެށިގެން 12 އޯގަސްޓްވާ ބުރާސްފަތި ދުވަހުގެ ނިޔަލަށް
 
45 ބަންޑާރަ ގޯތި ދޫކުރުމަށް ހަމަޖެހިފައިވޭ

ށ. ކަނޑިތީމުން ދިރިއުޅުމަށް ބަންޑާރަ ގޯތި ދޫކުރުމަށް ހަމަޖެހިފައިވާތީ ގޯއްޗަށް އެދި ހުށަހެޅުމުގެ ފުރުސަތު ހުޅުވާލައިފިއެވެ.

ކަނޑިތީމު ކައުންސިލުން ބުނީ އެރަށުން 3000 އަކަފޫޓްގެ 45 ބަންޑާރަ ގޯތި ދޫކުރުމަށް ހަމަޖެހިފައިވާތީ، ބަންޑާރަ ގޯއްޗަށް އެދުމުގެ ފުރުސަތު އާއްމުކޮށް ހުޅުވާލާފައިވާ ކަމަށެވެ. ކައުންސިލުން ބުނީ 27 ޖޫން 2021ވާ އާދީއްތަ ދުވަހުން ފެށިގެން ގޯއްޗަށް އެދޭ ފޯމް އެ އިދާރާގެ ކައުންޓަރުންނާއި ދިވެހި ސަރުކާރުގެ ގެޒެޓުން ލިބޭނެ ކަމަށެވެ.

ގޯއްޗަށް އެދި ހުށަހަޅާ ފޯމު ބަލައިގަތުމަށް ހަމަޖެހިފައިވަނީ 30 ޖޫން 2021ވާ ބުދަ ދުވަހުން ފެށިގެން 12 އޯގަސްޓް 2021ވާ ބުރާސްފަތި ދުވަހުގެ ނިޔަލަށް ރަސްމީ ކޮންމެ ދުވަހެއްގެ ހެނދުނު 9:00ން މެންދުރުފަހު 1:00 ށެވެ.

ކައުންސިލުން ބުނީ ފޯމު ދޫކުރުމާއި ބަލައިގަތުމަށް ހަމަޖެހިފައިވަނީ އެ އިދާރާއިން ކަމަށެވެ. އަދި ފޯމު ބަލައިގަތުމުގައި މެއިލްއާއި ފެކްސް މެދުވެރިކޮށް ފޮނުވާ ފޯމާއި، ފޯމުގެ ކޮޕީ ބަލައިނުގަނެވޭނެ ކަމަށެވެ. ގޯއްޗަށް އެދޭ މީހުންގެ ކިބައިގައި ހުންނަންޖެހޭ ޝަރުތުތަކާއި ފޯމާއެކު ހުށަހަޅަންޖެހޭ ލިޔުންތައް އަދި ޕޮއިންޓް ދިނުމަށް ހަމަޖެހިފައިވާ އުސޫލު ކައުންސިލުން އާއްމުކޮށްފައިވާއިރު، އުސޫލާ އެއްގޮތަށް ފޯމް ހުށަހެޅުމަށް ކައުންސިލުން އިލްތިމާސްކޮށްފައިވެއެވެ.

މީގެ އިތުރުން ކައުންސިލުން ބުނީ ގޯއްޗަށް އެދި ހުށަހަޅާ ފޯމުގައި ހަގީގަތާ ޚިލާފު އެއްވެސް މައުލޫމާތެއް ދީފައިވާނަމަ ފޯމު ބާތިލްކުރެވޭނެ ކަމަށާއި، އެފަދަ ސަބަބަކާ ހުރެ ފޯމު ބާތިލްކުރަންޖެހޭނަމަ ބާތިލްކުރަންޖެހުނު ސަބަބު ބަޔާންކޮށް ލިޔުމަކުން އެކަން ފޯމު ހުށަހެޅި ފަރާތަށް އެންގޭނެ ކަމަށެވެ. ފޯމު ހުށަހަޅާ ފަރާތުގެ ރަށްވެހިކަމާއި ޢުމުރު އަދި ކައިވެނީގެ މުއްދަތު ބަލާނީ ގޯއްޗަށް އެދި އިއުލާންކުރާ ތާރީޚަށް ކަމަށާއި، ގޯއްޗަށް އެދި ހުށަހަޅާފައިވާ މީހާ ނިޔާވެއްޖެނަމަ އެ ފަރާތުގެ ފޯމު ބާތިލްކުރެވޭނެ ކަމަށް ކައުންސިލުން ބުނެއެވެ.

ގޯއްޗަށް އެދޭ މީހުންގެ ފޯމުތަކުގައިވާ މައުލޫމާތުތައް ޗެކްކޮށް ޝަރުތު ހަމަވާ މީހުންނަށް ޕޮއިންޓްދީ، ޕޮއިންޓް ލިބޭމީހުން ކަނޑައަޅާނީ ކަނޑިތީމުން ގޯތި ދިނުމުގެ އަމަލީ މަސައްކަތްކުރުމަށް ހޮވާފައިވާ ގެވަޅު ކޮމެޓީންނެވެ.

އެންމެ ފަހުން އަޕްޑޭޓް ކުރީ: 4 ހަފްތާ ކުރިން
ރިވިއު ކުރީ: ނަހްދާ އާދަމް
0%
80%
0%
0%
0%
20%
ކޮމެންޓް