ފަތުރުވެރިންގެ ތެރެއިން ކޮވިޑަށް ޕޮޒިޓިވްވަނީ 0.24 އިންސައްތަ
25 ޖޫން 2021 | ހުކުރު 07:45ރާއްޖެއަކީ ފަތުރުވެރިންނަށް ރައްކާތެރި މަންޒިލެއްގެ ގޮތުގައި ކަށަވަރުކުރުމަށް ގިނަ މަސައްކަތްތަކެއް ދަނީ ކުރަމުން
ރާއްޖެއަށް އައި ފަތުރުވެރިންތަކެއް
ރާއްޖެ އަންނަ ފަތުރުވެރިންގެ ތެރެއިން ކޮވިޑަށް ޕޮޒިޓިވްވާ ފަތުރުވެރިންގެ އަދަދު އެއް އިންސައްތައަށް ވެސް ނާރާ ކަމަށް ޓޫރިޒަމް މިނިސްޓްރީން ބުނެފިއެވެ.
ޓޫރިޒަމް މިނިސްޓްރީން އާންމުކުރާ ތަފާސްހިސާބުތައް ދައްކާގޮތުން މި އަހަރުގެ ޖެނުއަރީ އެކަކުން ޖޫން 23ގެ ނިޔަލަށް ރާއްޖެ އައި ފަތުރުވެރިންގެ ތެރެއިން ކޮވިޑް-19ށް ޕޮޒިޓިވްވެފައި ވަނީ 0.24 އިންސައްތަ ފަތުރުވެރިންނެވެ. އަދި ފާއިތުވި އަހަރު ރާއްޖޭގެ ބޯޑަރު ޖުލައި 15 ގައި އަލުން ހުޅުވާލި ފަހުން ޑިސެމްބަރ 31ގެ ނިޔަލަށް ރާއްޖެ އައި ފަތުރުވެރިންގެ ތެރެއިން ބައްޔަށް ޕޮޒިޓިވްވެފައި ވަނީ 0.19 އިންސައްތަ ފަތުރުވެރިންނެވެ.
ދުނިޔެއަށް ކުރިމަތިވެފައިވާ މި ބޮޑު ބަލިމަޑުކަމުގެ ތެރޭގައި ރާއްޖެއަކީ ފަތުރުވެރިންނަށް ރައްކާތެރި މަންޒިލެއްގެ ގޮތުގައި ކަށަވަރުކުރުމަށް ސަރުކާރުން އަދި ހާއްސަކޮށް ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކުން ދަނީ ގިނަ މަސައްކަތްތަކެއް ކުރަމުންނެވެ. އޭގެ ނަތީޖާއެއްގެ ގޮތުން ރާއްޖެއަށް ފަތުރުވެރިންގެ މެދުގައި އޮތް އިތުބާރު ނުގެއްލި ރާއްޖޭގެ ފަތުރުވެރިކަން ދަނީ ގިނަ ކާމިޔާބީތަކެއް ހޯދަމުންނެވެ. ރާއްޖޭގެ އެއަރޕޯޓް ތަކާއި ރިސޯޓްތައް އަދި ގެސްޓް ހައުސްތަކާއި ސަފާރީތަކަކީ ރައްކާތެރި ތަންތަނުގެ ގޮތުގައި އޮޕަރޭޓްކުރުމަށް ޚާއްސަ އުސޫލުތަކެއް ވަނީ އެކުލަވާލާފައެވެ.
އޭގެ އިތުރުން ކޮވިޑް-19ގެ ވެކްސިނޭޝަން ޕްރޮގްރާމް ރާއްޖޭގައި ފެށުމާއެކު ފަތުރުވެރިންނަށް ޚިދުމަތްދޭ ފަރާތްތަކާއި ފަތުރުވެރިންގެ ރައްކާތެރިކަމަށް ސިނާއަތުގައި މަސައްކަތްކުރާ ހުރިހާ މުވައްޒަފުން ވެކްސިނޭޓްކުރުމުގެ ހާއްސަ ޕްރޮގްރާމެއް ވަނީ ފަށާފައެވެ. އެގޮތުން ސިނާއަތުގައި މަސައްކަތްކުރާ 70 އިންސައްތަ މުވައްޒަފުން، ވެކްސިންގެ ދެ ޑޯޒް ފުރިހަމަކޮށްފައިވާއިރު، 96 އިންސައްތަ މުވައްޒަފުން ވަނީ ފުރަތަމަ ޑޯޒް ޖަހާފައެވެ.
ސަރުކާރުގެ އަމާޒަކީ ރާއްޖޭގެ ފަތުރުވެރިކަމަކީ ދުނިޔޭގެ ފުލީ ވެކްސިނޭޓެޑް ފަތުރުވެރި މަންޒިލެއްގެ ގޮތުގައި ހެދުމެވެ. އަދި ރާއްޖޭގެ ރައްޔިތުންނަށް ވެކްސިން ޖެހުމާއެކު ރާއްޖެ އަންނަ ފަތުރުވެރިންނަށް ވެކްސިން ޓޫރިޒަމެއް ފެށުމަކީ ސަރުކާރުގެ އަމާޒެކެވެ.
