މިދިޔަ މެއި މަހު ރާއްޖެއަށް ކުރި ވިއްސާރާގައި ގެއްލުންވި 8 ރަށަކަށް 1.4 މިލިޔަން ރުފިޔާގެ އެހީ ވާން ނިންމައިފިއެވެ.

ވިއްސާރާގައި ގޭބިސީ ފެންވަރުގައި ބޯހިޔާވަހިކަމަށާއި، ޒަރޫރީ ބޭނުންތަކަށް ބުރޫ އަރާ މިންވަރަށް ގެއްލުންވި މިންވަރު ބެލުމަށް ނެޝަނަލް ޑިޒާސްޓަރ މެނޭޖްމަންްޓް އޮތޯރިޓީ، އެންޑީއެމްއޭއިން ވަނީ އެސެސްމެންޓެއް ހަދާފައެވެ. އެސެސްމަންޓްގައި 562 ގެއެއް އެސެސްކޮށްފައިވެއެވެ. އެސެސްމެންޓް ނިންމުމަށް ފަހު އެންޑީއެމްއޭއިން ވަނީ ރިޕޯޓުގެ ހޯދުންތައް ހާމަކޮށްފައެވެ. އެގޮތުން ގެއްލުންވި 8 ރަށެއްގެ 384 ގެޔަކަށް 1.4 މިލިއަން ރުފިޔާގެ އެހީތެރިކަން ފޯރުކޮށް ދިނުމަށް ވަނީ ނިންމާފައެވެ.

މޭ މަހު ކުރި ވިއްސާރައިގައި އެންމެ ބޮޑު ގެއްލުމެއް ލިބުނީ އައްޑޫ ސިޓީ އާއި ފުވައްމުލަކު ސިޓީގެ ގެތަކަށެވެ. އެގޮތުން ފުވައްމުލަކު ސިޓީގެ ނަރުދަމާ ނިޒާމަށް މައްސަލަތައް ދިމާވެ ނަޖިސްބޭރުވުމުގެ މައްސަލަވެސް ކުރިމަތިވިއެވެ. މީގެ އިތުރުން ކުޅުދުއްފުށި ސިޓީ އާއި، ހއ. ދިއްދޫ، އަދި އެ އަތޮޅު އުލިގަމަށްވެސް ވަނީ ނިސްބަތުން ގިނަ ގެއްލުންތަކެއް ވެފައެވެ. މިރަށްރަށުގެ އިތުރުން މިފަހަރު އެހީ ފޯރުކޮށްދޭނީ ނ. މަގޫދޫ، ހދ. ނެއްލައިދޫ، އަދި ރ. ދުވާފަރަށެވެ.

އެންޑީއެމްއޭގެ އެސެސްމަންޓުން ދައްކާ ގޮތުގައި ޒަރޫރީ ހިފައި ގެންގުޅޭ ތަކެއްޗަށް ލިބުނު ގެއްލުން 3.9 މިލިއަން ރުފިޔާއަށް އަރައެވެ. އެ ގެއްލުމަށް އެހީގެ ގޮތުގައި 794،015 ރުފިޔާ ދިނުމަށް އެންޑީއެމްއޭން ވަނީ ނިންމައިފައެވެ. އަދި އިމާރާތްތަކަށް ލިބުނު ގެއްލުން 642،849 ރުފިޔާއަށް އަރާއިރު އެހީގެ ގޮތުގައި އެ އަދަދަށް ފައިސާ ދޭން އެންޑީއެމްއޭން ވަނީ ނިންމައިފައެވެ. އެންޑީއެމްއޭގެ އެސެސްމަންޓްގައި ވަނީ ވިއްސާރައިގެ ސަބަބުން ދަނޑު ބިންތަކާއި، އާންމު ޚިދުމަތްދޭ އިމާރާތްތަކާއި، އޮޑި ދޯނިފަހަރަށް ގެއްލުންވެގެން، އިތުރު 13 ރަށަކުން ރިޕޯޓްކޮށްފައިވާކަންވެސް ހާމަކޮށްފައެވެ. އެހެންނަމަވެސް، މި ރަށްރަށާއި ބެހޭ މައުލޫމާތެއް، އަދި އެހީ ދިނުމުގެ ތަފުސީލެއްވެސް ހާމަކޮށްފައެއް ނުވެއެވެ.

ދޭތެރެދޭތެރެއިން ކުރާ ވިއްސާރައިގައި ރާއްޖޭގެ ރަށްތަކަށް ލިބޭ ގެއްލުން ދަނީ ބޮޑުވަމުންނެވެ. މިފަހުން ކުރި ވިއްސާރައިގައި ހއ. ހޯރަފުއްޓަށް ވެސް ބޮޑެތި ގެއްލުންތަކެއް ލިބި އެ ރަށު އެއާޕޯޓަށް ކުރާ ދަތުރުތައް ވެސް ހުއްޓާލަން ޖެހުނެވެ.

ރާއްޖެއެމްވީއަށް މައުލޫމާތު ދެއްވަމުން ހޯރަފުށީ ކައުންސިލުގެ ރައީސް މުޙައްމަދު ވަޙީދު ވިދާޅުވީ، މެއި މަހު މޫސުން ގޯސްވެ ވާރޭވެހުމާއި، އުދަ އެރުމުގެ ސަބަބުން އެއާޕޯޓުގެ ރަންވޭއަށް ގިނަ އަދަދެއްގެ ވެއްޔާއި ގައު އަރާފައިވާ ކަމަށެވެ. އަދި އެތަކެތި ސާފު ކުރުމަށް ކައުންސިލުން ގޮވާލި ގޮވާލުމަށް އިޖާބަ ދީ މުޅި ހޯރަފުށީ ރައްޔިތުން ކަހަލަ ގޮތަކަށް ނުކުމެ ވަރަށް ޖޯޝާއެކު މަސައްކަތް ކޮށްފައިވާ ކަމަށް އޭނާ ވިދާޅުވިއެވެ. ހއ. ހޯރަފުށީ އެއާޕޯޓުގެ މަރާމާތުގެ މަސައްކަތްތައް 8 ޖޫން 2021ގައި ވަނީ ނިންމާލާފައެވެ.