އެސްއެމްއީތަކަށް އެހީތެރިވުމަށް ކޮވިޑް-19 ސަސްޓެއިނެބަލް ސްޓިމިއުލަސް ލޯނު ތައާރަފުކޮށްފި

ކޮވިޑް-19ގެ ސަބަބުން ރާއްޖޭގެ ކުދި އަދި މެދުފަންތީގެ ވިޔަފާރިތަކަށް އެހީތެރިވުމުގެ ގޮތުން ސަރުކާރުން ކޮވިޑް-19 ސަސްޓެއިނެބަލް ސްޓިމިއުލަސް ލޯނުގެ ގޮތުގައި ޚާއްސަ ސްޓިމިއުލަސް ޕެކޭޖެއް ތައާރަފްކޮށްފިއެވެ.

އެންމެ ކުދި، ކުދި އަދި މެދުފަންތީގެ ވިޔަފާރިތަކަށް މާލީގޮތުން ކުރިމަތިވެފައިވާ ދަތިތަކަށް ލުޔެއް ހޯދައިދިނުމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓާއި އެސް.އެމް.އީ ޑިވެލޮޕްމަންޓް ފައިނޭންސް ކޯޕަރޭޝަން ގުޅިގެން އެކުލަވާލާފައިވާ ކޮވިޑް-19 ސަސްޓެއިނެބަލް ސްޓިމިއުލަސް ލޯނު ޕެކޭޖްތަކުގެ ސަބަބުން ވިޔަފާރިތަކަށް އައު ދިރުމެއް ލިބިގެންދާނެ ކަމަށް ސަރުކާރުން ބުނެއެވެ. މި ޕެކޭޖްތަކަކީ މިހާރު ހިންގަމުންދާ ވިޔަފާރިތަކަށް އަމާޒުކޮށްގެން ތައާރަފުކުރާ ޕެކޭޖްތަކެކެވެ. އެގޮތުން މިސްކީމަކީ ރިލީފް ލޯނަކަށްވުރެ ބޮޑަށް އެސް.ޑީ.އެފް.ސީ ގެ ފަރާތުން ހިންގާ ބިޒްނަސް ކްލިނިކްތަކެއްގެ ތެރެއިން، ކޮންސަލްޓަންޓުންގެ އެހީތެރިކަމާއެކު ލޯނުތަކަށް އެދޭ ފަރާތްތަކާ މަޝްވަރާކުރެވިގެން، އެ ވިޔަފާރި ބައްޓަން ކުރެވޭނެ ގޮތަށް، އެއަށް ބޭނުންވާނެ ފައިސާއާއި އަދި އެހެނިހެން ފަންނީ އެހީތެރިކަން ދީގެން ކުރިއަށް ގެންދިއުމަށް ރާވާފައިވާ ސްކީމެކެވެ.

ސަސްޓެއިނެބަލް ސްޓިމިއުލަސް ލޯނު ޕެކޭޖް ދޫކުރަން ހަމަޖެހިފައިވަނީ މިހާރު ހިނގަމުންދާ ވިޔަފާރިތަކުގެ ތެރެއިން ކެފޭ، ރެސްޓޯރަންޓް، ޖިމް، ސެލޫން އަދި ގެސްޓްހައުސް ވިޔަފާރިތަކަށެވެ. އެގޮތުން ތިން ޕެކޭޖެއް މި ސްޓިމިއުލަސް ޕެކޭޖުގައި ހިމެނޭއިރު، އެއީ ސްޓިމިއުލަސް ޕެކޭޖު 1، 2 އަދި 3 އެވެ. ސްޓިމިއުލަސް ޕެކޭޖު 1، ދޫކުރަނީ ހިނގަމުންދާ ޕްރޮޖެކްޓްތައް ނިންމުމަށެވެ. ސްޓިމިއުލަސް ޕެކޭޖު 2، ވިޔަފާރި ހިންގުމަށް ބޭނުންވާ ފައިސާގެ އެހީ ފޯރުކޮށްދޭއިރު، ސްޓިމިއުލަސް ޕެކޭޖު 3ން ދެމެހެއްޓެނިވި ގޮތެއްގައި ވިޔަފާރި ފުޅާކުރުމާއި، ލޯނު ނުހިމެނޭ ގޮތަށް ވިޔަފާރިއާ ގުޅޭ ފަންނީ ލަފާ ލިބިގެންދާނެއެވެ.

ސަސްޓެއިނެބަލް ސްޓިމިއުލަސް ލޯނުގެ ޕެކޭޖްތަކަށް ހުށައަޅާ ވިޔަފާރިތަކަކީ 2018 އިން ފެށިގެން 2020 އަށް ތިން އަހަރު ފައިދާ ވެފައިވާ ވިޔަފާރިތަކަށް ވާންޖެހެއެވެ. އަދި ޕެކޭޖަކަށް ހުށައަޅާނަމަ މިދިޔަ އަހަރު ތެރޭގައި އެއްވެސް ލޯނެއް ޑީފޯލްޓް ވެފައި ވެގެން ނުވާނެއެވެ. މިހާރު ލޯނެއް ނަގާފައިވާނަމަ، އާ ފެސިލިޓީގެ ތެރެއަށް ތާވަލުކުރެވޭއިރު، ޕެކޭޖަށް އެދި ހުށަހަޅާ ވިޔަފާރިވާން ވާނީ ވޭތުވެ ދިޔަ އަހަރު މެދުނުކެނޑި ކޮށްފައިވާ ވިޔަފާރިއަކަށެވެ.

ސަސްޓެއިނެބަލް ސްޓިމިއުލަސް ލޯނު ޕެކޭޖްގެ ދަށުން ލޯނުގެ ގޮތުގައި ގިނަވެގެން ދޫކުރެވޭނީ އެއް މިލިއަން ރުފިޔާ އެވެ. މިލޯނަށް އެދި ހުށަހެޅުމަށް ރަހުނެއް ބޭނުންނުވާއިރު، ވިޔަފާރި ފުޅާ ކުރުމަށް ނަގާ ލޯނެއްގައި މެނުވީ އިކުއިޓީއެއް ބޭނުމެއް ނުވާނެއެވެ. އަދި ލޯނު އަނބުރާ ދައްކަން 5 އަހަރާއި 8 އަހަރުގެ މުއްދަތެއް ލިބޭނެއެވެ. އޭގެ އިތުރުން މިޕެކޭޖުގެ ދަށުން އިންޓަރެސްޓްގެ ގޮތުގައި އަހަރަކު ހަ އިންސައްތަ ނަގާނެއެވެ. ސްޓިމިއުލަސް ޕެކޭޖްގެ ދަށުން ގްރޭސް ޕީރިއަޑްގެ ގޮތުގައި 12 މަހާއި 24 މަސް ދުވަހުގެ މުއްދަތެއް ލިބޭނެއެވެ.

މިލޯނު ސްކީމްގައި އެންމެ ބޮޑަށް އިސްކަން ދެނީ ލޮކްޑައުންގައި އެންމެ ބޮޑަށް އަސަރުކުރި ވިޔަފާރިތަކަށް ކަަމުން މާލެ ސަރަހައްދުގެ ވިޔަފާރިތަކާއި ގިނަ ދުވަހު ލޮކްޑައުންގައި ހުރި އެހެން ރަށްތަކުގެ ވިޔަފާރިތަކަށް އިސްކަން ދެވޭނެއެވެ. މި ލޯނުތަކަށް އެދި ހުށަހެޅުމުގެ ފުރުސަތު ހުޅުވާލާނީ ޖުލައި މަހުއެވެ.