ޖިމް، ސެލޫން، ކެފޭ އަދި ރެސްޓޯރެންޓްތަކަށް ޚާއްސަ ސްޓިމިއުލަސް ޕެކޭޖެއް

ޖިމްތަކާއި، ސެލޫން، ކެފޭ އަދި ރެސްޓޯރެންޓްތަކަށް ޚާއްސަ ސްޓިމިއުލަސް ޕެކޭޖެއް ތަޢާރަފުކުރުމަށް މަސައްކަތް ކުރަމުންދާކަމަށް އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވެއްޖެއެވެ.

ކޮވިޑް19 އާއެކު ކުދި ފަންތިއާއި މެދު ފަންތީގެ ވިޔަފާރިތައް ވަރަށް ބޮޑަށް ހީނަރުވެ، ބައެއް ވިޔަފާރިތައް ހުއްޓާލަން މިވަނީ ޖެހިފައެވެ. މި މައްސަލަ ހައްލުކުރުމަށް ސަރުކާރުން ކުރަމުންދާ މަސައްކަތްތަކުގެ މަޢުލޫމާތު ޓުވިޓަރ މެދުވެރިކޮށް ހާމަކުރައްވަމުން މިނިސްޓަރ ފައްޔާޒު ވިދާޅުވީ، ކުދި ވިޔަފާރިއާއި މެދު ފަންތީގެ ވިޔަފާރިތަކަށް ހަމަޖައްސާ ޕެކޭޖްގެ ދަށުން ޖިމްތަކާއި، ސެލޫންތަކާއި، ކެފޭތަކާއި ރެސްޓޯރަންޓްތަކުގެ އިތުރުން އެހެނިހެން ކުދި ވިޔަފާރިތަކަށް އެހީތެރިކަން ލިބިގެންދާނެކަމަށެވެ. ޕެކޭޖް ތައާރަފްކުރުމުގެ މަސައްކަތް ލަސްވެގެންދަނީ މިނިސްޓްރީގެ ޓީމުގެ ގިނަ މެންބަރުންތަކެއް ކޯވިޑް19 އަށްޕޮޒިޓިވްވެފައިވާތީ ކަމަށާއި ނަމަވެސް ވަރަށް އަވަހަށް މި ޕެކޭޖް ތައާރަފްކުރައްވާނެކަމުގެ ޔަޤީންކަން މިނިސްޓަރ ވަނީ ދެއްވާފައެވެ.

ކޮވިޑްގެ ނަންބަރުތައް މާލެ ސަރަހައްދުގައި އިތުރުވާން ފެށުމުގެ ސަބަބުން ސަރުކާރުން އެޅި ޚާއްސަ ފިޔަވަޅެއްގެ ގޮތުން ކެފޭ ރެސްޓޯރަންޓް، ޖިމް އަދި ސެލޫންތައް ވަނީ ބަންދުކޮށްފައެވެ. މީގެ ސަބަބުން އެ ވިޔަފާރިތަަކަށް ވަނީ ބޮޑެތި ގެއްލުންތަކާ ކުރިމަތިލާން ޖެހިފައެވެ. ކޮވިޑް19ގެ މި ދަނޑިވަޅުގައި އެސްއެމްއީ ބޭންކު މެދުވެރިކޮށް މީގެކުރިންވެސް ވަނީ ކުދި ފަންތިއާއި މެދު ފަންތީގެ ވިޔަފާރިތަކަށް އެހީތެރިކަން ފޯރުކޮށްދީފައެވެ. ފިނޭންސް މިނިސްޓްރީން އާންމުކޮށްފައިވާ ތަފާސް ހިސާބުތައް ދައްކާގޮތުން މި އަހަރުގެ އޭޕްރީލް މަހުގެ ނިޔަލަށް އެސްއެމްއީ ބޭންކުން ވިޔަފާރިތަކަށް އެހީތެރިވުމަށް މި ޕެކޭޖްގެ ދަށުން 341.5 މިލިއަން ރުފިޔާ ވަނީ ދޫކޮށްފައެވެ.

ކޮވިޑުގެ ހާލަތު އަނެއްކާ ވެސް ގޯސްވެ ހަރުކަށި ފިޔަވަޅުތަކެއް އެޅުމާ ގުޅިގެން ވިޔަފާރިތަަކަށް ލިބޭ ގެއްލުމަށް އެހީވުމަށް ސަރުކާރުން ލުއި ލޯނުތަކެއް ދިނުމަށް ނިންމާފައިވާކަން ރައީސް އިބްރާހިމް މުހައްމަދު ޞާލިހު ވަނީ އިއުލާނުކުރައްވާފައެވެ. ރައީސް ޞާލިހު ވިދާޅުވީ، ބީއެމްއެލް އިން ވިޔަފާރިތަކަށް ދިން ލޯނުތައް މިއަހަރު ވެސް ވަރަށް އަވަހަށް ފަށާނެ ކަމަށެވެ. އެގޮތުން ޖޫން މަހު 375 މިލިއަން ރުފިޔާގެ ލޯނު، އެ ވިޔަފާރިތަކަށް ދޫކުރަން ފެށޭނެ ކަމަށް ރައީސް ވިދާޅުވިއެވެ. މި ލުއިތަކުގެ އިތުރުން ފެނާއި ކަރަންޓު ބިލުން ވެސް ލުއި ދިނުމަށް ނިންމާފައިވާކަން ރައީސް އިއުލާން ކުރިއެވެ. އެގޮތުން މުޅި ރާއްޖޭގެ ހުރިހާ ގެތަކަށް ފެން ބިލުން 30 ޕަސެންޓުގެ ޑިސްކައުންޓް އަދި ކަރަންޓު ބިލުން 40 ޕަސެންޓް ޑިސްކައުންޓް ދޭނެ ކަމަށް ވިދާޅުވިއެވެ. އަދި ވިޔަފާރިތަކުގެ ފެނާއި ކަރަންޓު ބިލުން 20 ޕަސަންޓު ޑިސްކައުންޓު ދޭނެ ކަމަށް ރައީސް ވިދާޅުވިއެވެ.