ރާއްޖޭގެ ފަތުރުވެރިކަމުގެ މައުލޫމާތު ޖަޕާނުގެ ޓްރެވަލް އެޖެންސީތަކަށް
ވެބިނަރ ގައި ފޮރިން މިނިސްޓްރީ އާއި، މިނިސްޓްރީ އޮފް ޓޫރިޒަމާއި، އެމްއެމްޕީއާރުސީގެ އިތުރުން ގެސްޓުހައުސް އެސޯސިއޭޝަނުން ވަނީ ބައިވެރިވެފައި
ރާއްޖޭގެ ފަތުރުވެރިކަން ޖަޕާނުގައި އިޝްތިހާރުކުރުމަށް ބޭއްވި ވެބިނަރގެ ތެރެއިން
ޖަޕާނުގައި ރާއްޖޭގެ ފަތުރުވެރިކަން އިޝްތިހާރުކުރުމަށް ހާއްސަ ވެބިނަރ އެއް ބާއްވައި، ފަތުރުވެރިކަމާގުޅޭ މައުލޫމާތު ޖަޕާނުގެ ޓްރެވަލް އެޖެންސީތަކާ ހިއްސާކޮށްފިއެވެ.
ޖަޕާނުގައި ހުންނަ ރާއްޖޭގެ އެމްބަސީން އިސްނަގައިގެން ކުރިއަށް ގެންދިޔަ ވެބިނަރ އަކީ "އެކްސްކުލޫސިވް ވެބިނަރ އޮން މޯލްޑިވްސް ޓޫރިޒަމް އިން ޕޯސްޓް ކޯވިޑް ރިކަވަރީ" ގެ ނަމުގައި ކުރިއަށް ގެންދިޔަ ވެބިނަރއެކެވެ. މިވެބިނަރގެ އަމާޒަކަށްވީ ޖަޕާނުން ރާއްޖެއަށް އަންނަ ފަތުރުވެރިން އިތުރު ކުރުމަށް ފަތުރުވެރިކަމާގުޅޭ މައުލޫމާތު ހިއްސާކުރުމެވެ.
މިވެބިނަރ ގައި ފޮރިން މިނިސްޓްރީ އާއި، މިނިސްޓްރީ އޮފް ޓޫރިޒަމާއި، އެމްއެމްޕީއާރުސީގެ އިތުރުން ގެސްޓުހައުސް އެސޯސިއޭޝަނުން ވަނީ ބައިވެރިވެފައެވެ. އެގޮތުން އެމްއެމްޕީއާރުސީގެ މެނޭޖިންގ ޑިރެކްޓަރ ތޮއްޔިބު މުޙައްމަދު، ޓޫރިޒަމް މނިސްޓްރީގެ ޑެޕިއުޓީ މިނިސްޓަރ ނައުޝާދު މުޙައްމަދު އަދި ގެސްޓު ހައުސް އެސޯސިއޭޝަންގެ ރައީސް އަބްދުﷲ ނަޝީދުވަނީ ވެބިނަރ ގައި ބައިވެރިވެފައެވެ.
ޖަޕާނުގެ 23 ޓްރެވަލް އެޖެންސީއަކުން މި ވެބިނަރގައި ބައިވެރިވެފައިވާއިރު މި އަހަރުތެރޭގައި މިފަދަ އިތުރު ވެބިނަރތައް ބޭއްވުމަށް ހަމަޖެހިފައިވާ ކަމަށް ޖަޕާނުގައި ހުންނަ ރާއްޖޭގެ އެމްބަސީއިން ބުނެއެވެ.
ރާއްޖޭގެ ފަތުރުވެރިކަން އިޝްތިހާރުކުރުމުގެ މަސައްކަތްތައް ހުއްޓާނުލާ ކުރިއަށްދާއިރު، ކޮވިޑާއި އެކު މި ހަރަކާތްތައް އޮންލައިންކޮށް ކުރިއަށްގެންދާ ވަރު ވަނީ އިތުރުވެފައެވެ.
