މާމިގިލީ ޕޯޓުގެ އޮޕަރޭޝަން ސްކޭލް ޑައުންކުރުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ނިންމައިފިއެވެ.
މާމިގިލި ޕޯޓުގައި މިވަގުތު 35 މުވައްޒަފުން މަސައްކަތްކުރަމުންދާއިރު، އެމުވައްޒަފުންނަށް އެމްޕީއެލްގެ އެހެނިހެން ސެކްޝަންތަކަށް ބަދަލުވާން ބޭނުން ނަމަ އެފުރުސަތު ހުޅުވާލާފައިވާ ކަމަށް އެމްޕީއެލް އިން ބުނެއެވެ. އަދި ޕޯޓުގެ އޮޕަރޭޝަން ސްކޭލް ޑައުންކުރުމަށް ނިންމާފައިވީ ނަމަވެސް އެއްވެސް މުވައްޒަފަކު ވަޒީފާއިން ވަކިކޮށްފައި ނުވާކަމަށް އެމްޕީއެލް އިން ބުނެއެވެ.
ކުރީގެ ރައީސް ޔާމިން އަބްދުލްގައްޔޫމްގެ ސަރުކާރުގައި 2017 ވަނަ އަހަރު މާމިގިލީގައި އިންޓަރނޭޝަނަލް ޕޯޓެއް ތަރައްގީކުރަން އެމްޕީއެލްއާ ހަވާލުކުރި ނަމަވެސް އެކަށީގެންވާ ގޮތުގައި ޕޯޓު ހިންގޭނެ މަގު ފަހިކޮށްދީފައެއް ނުވެއެވެ. އޭގެ ސަބަބުން 2018 ވަނަ އަހަރު ޕޯޓުގެ އޮޕަރޭޝަން ފަށައި މިހާތަނަށް އެންމެ ބޯޓެއް ވެސް މާމިގިލި ޕޯޓަށް ޖައްސާފައި ނުވި ނަމަވެސް ޕޯޓުގެ އޮޕަރޭޝަންތައް އަދި ހުއްޓާލަން ގަސްތުނުކުރާކަމަށް އެމްޕީއެލް އިން ބުނެއެވެ.
މާމިގިލީ ޕޯޓު ތަރައްގީކޮށް މަސައްކަތް ކޮށްފައިވަނީ ބްރޭކް ބަލްކްގެ ޚިދުމަތާއެކުއެވެ. މީގެ އިތުރުން މި ޕްރޮޖެކްޓްގެ ތެރެއިން ބޮންޑެޑް ވެއާހައުސް، ކޯލްޑް ސްޓޯރޭޖް، ބޯޓް ޔާޑް އަދި މަސްވެރިންނަށް އައިސް ވިއްކޭނެފަދަ ވަސީލަތްތައް ގާއިމުކުރަން އޭރު ނިންމާފައިވެއެވެ.
މާމިގިލީ ޕޯޓު އެމްޕީއެލް އިން ހިންގަމުންދަނީ އެތައް މިލިއަން ރުފިޔާގެ ގެއްލުމުގައެވެ. އެގޮތުން އިކޮނޮމިކް މިނިސްޓަރ ފައްޔާޒު އިސްމާއިލް ވަނީ މާމިގިލީ ޕޯޓުން ދައުލަތަށް އަހަރަކު 8 މިލިއަން ރުފިޔާގެ ގެއްލުން ވާކަމަށް މީގެ ކުރިން ވިދާޅުވެފައެވެ.
