ހުޅުމާލޭގައި އުމުރުން 13 އަހަރުގެ ކުއްޖަކު ރަހީނުކޮށް މަރާލި މައްސަލައާ ގުޅިގެން މަޑަވެލި ދާއިރާގެ މެންބަރު ހުސެއިން ފިރުޝާން ހުށަހަޅުއްވާފައިވާ ކުއްލި މައްސަލަ ރައްޔިތުންގެ މަޖިލީހުން ބަލައިގެންފިއެވެ.

ބުދަ ދުވަހުގެ ޖަލްސާގައި މި މައްސަލަ ބަލައިގަނެ ބަހުސް ކުރުމަށް ފާސްކޮށްފައިވަނީ އެކަމަށްޓަކައި ނެގުނު ވޯޓުގައި ބައިވެރިވެވަޑައިންނެވި 44 މެންބަރުންގެ އިއްތިފާގުންނެވެ.

މައްސަލަ ހުށަހަޅުއްވަމުން މެންބަރު ފިރުޝާން ވިދާޅުވީ އުމުރުން 13 އަހަރުގެ ކުޑަ ކުއްޖަކު އެފަދަ ގޮތަކަށް މަރާލާފައިވުމާއެކު ރަހީނުކޮށްގެން މަރާލާފައިވާ ކުއްޖާ އަކީ ޖެންޑަރ މިނިސްޓްރީން ސޯޝަލް ސަޕޯޓް ފޯރުކޮށްދެމުންދިޔަ ކުއްޖެއް ކަމަށް ހާމަކޮށްފައިވާއިރު މިއީ ބިރުވެރި އަދި ކަންބޮޑުވާންޖެހޭ ކަމެއް ކަމަށް މެންބަރު ވިދާޅުވިއެވެ. އަދި މި މައްސަލައިގައި އެއްވެސް ފަރާތެއްގެ އިހުމާލެއްވޭތޯ ބަލަން ޖެހޭ ކަމަށް ވިދާޅުވިއެވެ.

މައްސަލައިގެ ތުހުމަތުގައި ހައްޔަރުކުރި އެކަކު ޝަރީއަތް ނިންމެންދެން ބަންދު ކުރުމަށް ކޯޓުން ވަނީ ނިންމާފައެވެ. މި މައްސަލައާ ގުޅިގެން ހައްޔަރުކޮށްފައިވަނީ އުމުރުން 27 އަހަރުގެ ދިވެހި ފިރިހެނަކާއި 17 އަހަރުގެ ފިރިހެން ކުއްޖެކެވެ.

ފުލުހުން ބުނީ އެމީހުންނަށް މުއްދަތު ޖެހުމަށް ކޯޓަށް ގެންދިއުމުން 27 އަހަރުގެ މީހާ ޝަރީއަތް ނިމެންދެން ބަންދު ކުރުމަށް ކޯޓުން ނިންމާފައިވާ ކަމަށެވެ. އަދި 17 އަހަރުގެ ކުއްޖާގެ ބަންދަށް 15 ދުވަސް ޖަހާފައިވާ ކަމަށެވެ.

13 އަހަރުގެ ކުއްޖާ ރަހީނުކުރި މައްސަލަ ފުލުހުންނަށް ހުށަހަޅާފައިވަނީ މި މަހުގެ 20 ވަނަ ދުވަހުއެވެ. މިހާތަނަށް އެކި ގޮތްގޮތުން ލިބިފައިވާ މައުލޫމާތުތަކަށް ބަލާއިރު، 13 އަހަރުގެ ކުއްޖާ މަރާލުމަށްފަހު އެ މައްސަލައިގައި ޝާމިލްވާ 2 މީހުން ފިލާފައި ތިބީ ގެސްޓް ހައުސްއެއްގައެވެ. އާދީއްތަ ދުވަހުން ފެށިގެން އެމީހުން ގެސްޓް ހައުސްގައި ފިލައި ތިބިއިރު، އެމީހުން ހައްޔަރުކޮށްފައިވަނީ ހޯމަ ދުވަހުގެ ރޭ ދަންވަރު 2:38 ހާއިރުއެވެ.

މި މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރަމުންދާއިރު، މިހާތަނަށް ތަހުގީގަށް ބޮޑު ކުރިއެރުމެއް ލިބިފައިވާ ކަމަށް ފުލުހުން ބުނެފައިވެއެވެ.