ވަކި އުސޫލުތަކެއްގެ ދަށުން މާލެ ސަރަހައްދުގައި ހިންގާ ޖިމްތައް ހުޅުވުމުގެ ހުއްދަ ދޭން ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ނިންމައިފިއެވެ.
އެޗްޕީއޭއިން ކަނޑައަޅައިފައިވާ ގައިޑްލައިނާ އެއްގޮތަށް، އެކަނި ކުރާ ކަސްރަތުތައް ކުރުމަށް ފަތިހު 5:00އިން ހަވީރު 6:00އަށް، ޖިމްތަކުން ޚިދުމަތް ދިނުމުގެ ހުއްދަ ދިނުމަށް އެ އޭޖެންސީން ވަނީ ނިންމާފައެވެ.
ނަމަވެސް، މި ހާލަތުގައި އެފަދަ ތަންތަނުން ޚިދުމަތް ދެވޭނީ، ސަރވިސް ޕްލޭނަކާއެކު އެޗްޕީއޭއަށް ހުށަހެޅުމުން، އެކަން ބަލައި އިންސްޕެކްޝަން ހެދުމަށްފަހު ހުއްދަ ދިނުމުން ކަމަށް އެޗްޕީއޭއިން ބުނެއެވެ.
ކޮވިޑް19ގެ ހާލަތު ގޯސް ވުމާއެކު އެޗްޕީއޭއިން ވަނީ މާލެ ސަރަހައްދުގެ ފިޔަވަޅުތައް ވަރަށް ބޮޑަށް ވަރުގަދަ ކޮށްފައެވެ. އެހެން ނަމަވެސް ކޭސްތައް މަދުވުމާއެކު ކޮންމެވެސް ވަރަކަށް ފިޔަވަޅުތަކަށް ލުއިދޭން މިހާރު ވަނީ ފަށާފައެވެ.
އޭގޮތުން ޖިމްތައް ހުޅުވުމުގެ ހުއްދަ ދީފައި ވާއިރު، ޚާއްސަ އުސޫލެއްގެ ދަށުން ސެލޫން ތަކާއި ބޯކޮށާތަންތަނުން ޚިދުމަތް ދިނުމަށް ވެސް އެޗްޕީއޭއިން މީގެ ކުރިން ވަނީ ހުއްދަ ދީފައެވެ. ޖިމްތަކެކޭ އެއްގޮތަށް މިތަންތަނުންވެސް ޚިދުމަތް ދިނުމުގެ ހުއްދަ ދޫކުރަނީ ސަރވިސް ޕްލޭނަކާއެކު އެޗްޕީއޭއަށް ހުށަހެޅުމުން، އެކަން ބަލައި އިންސްޕެކްޝަން ހެދުމަށްފަހުގައެވެ.
