ކޮވިޑް-19ށް އަންގާރަ ދުވަހު ރިޕޯޓުކުރީ 145 ކޭސް

ރާއްޖެއިން އަންގާރަ ދުވަހު ކޮވިޑް-19ށް ރިޕޯޓުކުރީ 145 ކޭސް ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފިއެވެ.

އެޗްޕީއިން އާންމުކުރި ތަފާސްހިސާބުތައް ދައްކާގޮތުން ރާއްޖެއިން ރިޕޯޓުކުރި 145 ކޭސްގެ ތެރެއިން 61 ކޭސް އަކީ މާލެ ސަރަހައްދުން ރިޕޯޓުކުރި ކޭސްތަކެވެ. އަދި އަތޮޅުތެރެއިން 77 ކޭސް ރިޕޯޓުކޮށްފައިވާއިރު، ރިސޯޓުތަކުން ވެސް 7 ކޭސް ރިޕޯޓުކޮށްފައިވެއެވެ.

Advertisement

މިއާއެކު ރާއްޖެއިން ކޮވިޑް-19އަށް ޕޮޒިޓިވްވި މީހުންގެ ޖުމްލަ އަދަދު ވަނީ 72،294ށް އަރާފައެވެ. އޭގެ ތެރެއިން 67،507 މީހަކު ބަލިން ރަނގަޅުވެފައިވާއިރު، މިވަގުތު 4،569 މީހުންނަށް އަންނަނީ ފަރުވާދެމުންނެވެ. އޭގެ ތެރެއިން 39 މީހަކަށް ފަރުވާދެމުން އަންނަނީ އެޑްމިޓްކޮށްގެންނެވެ. މިހާތަނަށް މި ބަލީގައި 207 މީހަކު ވަނީ ނިޔާވެފައެވެ.

އެޕްރީލް މަހުގެ ފަހުކޮޅުން ފެށިގެން މެއި މަހާ ހަމައަށް ރާއްޖެއިން ފެނުނު ކޭސްތަކުގެ އަދަދު 1000ން މަތިން ރިޕޯޓް ކުރިއެވެ. އަދި ކޮވިޑްގެ ކޭސްތައް އިތުރުވެފައިވަނީ ދުނިޔޭގައި ހަލުވިކަމާއެކު ފެތުރެމުން އަންނަ ވޭރިއެންޓްތައް ރާއްޖޭގައިވެސް ފެތުރެން ފެށުމާއެކުއެވެ.

ރާއްޖޭގައި ކޮވިޑްގެ ވޭރިއަންޓް އުޅެނީ ކިހާ މިންވަރަކަށްތޯ ދެނެގަތުމަށް، ރާއްޖެއިން ބޭރަށް ފޮނުވި 30 ސާމްޕަލްގެ ނަތީޖާ ލިބިފައިވާއިރު ނުރައްކާތެރި 2 ވޭރިއަންޓް ކަމުގައިވާ، އިންޑިޔާއިން ފެނިފައިވާ ޑެލްޓާ ވޭރިއަންޓްއާއި އިނގިރޭސިވިލާތުން ފެނިފައިވާ އަލްފާ ވޭރިއަންޓްގެ 47 އިންސައްތަ ކޭސް ހިމެނެއެވެ.

ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ގެ ތަރުޖަމާނު ޑރ ނަޒްލާ ރަފީޤް ވިދާޅުވީ ރާއްޖޭގެ ބައެއް ސާމްޕަލްތައް ސީކުއަންސަށް ތިން ފަހަރެއްގެ މަތިން ފޮނުވާފައިވާކަމަށެވެ. އޭގެތެރެއިން ތިން ވަނަ ފަހަރު ފޮނުވި ސާމްޕަލްތަކުގެ ނަތީޖާ މިހާރު ލިބިފައިވާ ކަމަށް ނަޒްލާ ވިދާޅުވިއެވެ. މިއިން ކޮންމެ ފަހަރެއްގައިވެސް ފޮނުވާފައިވަނީ 30 ސާމްޕަލްއެވެ.

ސާމްޕަލްތަކުގެ ނަތީޖާ ދައްކާގޮތުން 20 އިންސައްތަ އަކީ އަލްފާ ވޭރިއަންޓެވެ. މިއީ މިދިޔަ އަހަރުގެ ޑިސެމްބަރ މަހު އިނގިރޭސިވިލާތުން ފެނުނު ވޭރިއަންޓެވެ. އަދި އިންޑިޔާގައި ހަލުވި ކަމާއެކު ފެތުރެމުން އަންނަ ޑެލްޓާ ވޭރިއަންޓްގެ 27 އިންސައްތަވެސް ވަނީ ފެނިފައެވެ.