ކޮވިޑް-19ގެ އެންމެ ނުރައްކާތެރި އެއް ވޭރިއަންޓް ކަމުގައިވާ ޑެލްޓާ ވޭރިއަންޓްގެ ކޭސްތައް ފިލިޕީންސްގައި އިތުރުވަމުން އަންނައިރު، ކޮވިޑް ވެކްސިން ޖެހުމަށް އިންކާރުކުރާ މީހުން ޖަލަށް ލާނެކަމުގެ އިންޒާރު އެގައުމުގެ ރައީސް ރޮޑްރިގޯ ޑަޓާޓް ދެއްވައިފިއެވެ.

ފިލިޕީންސްގެ ބޯޑަރު ކޮންޓްރޯލްކުރުންވެސް ވަނީ ވަރުގަދަކޮށްފައެވެ. ފިލިޕީންސްގެ ރައީސް ވިދާޅުވީ ވެކްސިން ޖަހާނީތޯ ނޫނީ ޖަލަށްދާނީތޯ ނިންމާނީ ރައްޔިތުންކަމަށެވެ.

ފިލިޕީންސްގައި ވެކްސިން ޖެހުމުގެ ޕްރޮގްރާމް ފަށާފައިވަނީ މާޗް މަހުއެވެ. ނަމަވެސް ވެކްސިން ޖަހަންދާ މީހުންގެ އަދަދު ވަނީ ވަރަށް ބޮޑަށް ދަށްވެފައެވެ. ޑަޓާޓް ވިދާޅުވީ ރައްޔިތުން ބޯހަރީކަމަށެވެ.

މީގެއިތުރުން ލޮކްޑައުންގެ އުސޫލުތަކާ ޚިލާފުވާ މީހުންގެ ގަޔަށް ބަޑިޖަހާނެކަމުގެ އިންޒާރުވެސް ވަނީ ދެއްވާފައެވެ. މިއިންޒާރު ދެއްވާފައިވާއިރު ލޮކްޑައުންގެ އުސޫލުތަކާއި ޚިލާފުވާ މީހުންގެ ގަޔަށް ބަޑިޖަހަމުންދާ ކަމުގެ ވާހަކަތަކެއްވެސް ވަނީ ފެންމަތިވެފައެވެ.

110 މިލިއަން މީހުން ދިރިއުޅެމުން އަންނަ ފިލިޕީންސްގައި ވެކްސިންގެ ދެ ޑޯޒް ޖަހާފައިވަނީ އަދި އެންމެ 1.95 އިންސައްތަ މީހުންކަމަށް ވެކްސިން ޓްރެކަރއިން ވަނީ ބުނެފައެވެ.

އެގައުމުގެ ސަރުކާރުން ހާމަކޮށްފައިވާ ގޮތުގައި 8.4 މިލިއަން ޑޯޒް ވަނީ އެކި ހިސާބުތަކަށް ފޯރުކޮށްދީފައެވެ. 6.2 މިލިއަން މީހުންނަށް ފުރަތަމަ ޑޯޒް ދީފައިވާއިރު 2.1 މިލިއަން މީހުންނަށް ދެ ޑޯޒް ވަނީ ދީފައެވެ.

ހޯމަ ދުވަހާ ހިސާބަށް އެގައުމުގައި 1.3 މިލިއަން ކޭސް ފެނިފައިވާއިރު 56،000 އެކްޓިވް ކޭސް އެގައުމުގައި އުޅެއެވެ.

ޑަޓާޓް ވިދާޅުވީ ވެކްސިން ޖެހުމަށް ދެކޮޅުހަދާ މީހުން ޖެހޭނީ ގައުމު ދޫކޮށްދާން ކަމަށެވެ.