ބަންދުގައި ތިބި މީހުންނާއި، އދ. މަހިބަދޫ ޕޮލިސް ސްޓޭޝަންގެ އާއްމު ހާލަތު ބަލަނީ

އދ. މަހިބަދޫ ޕޮލިސް ސްޓޭޝަންގައި ބަންދުގައި ތިބި މީހުންނާ މެދު އަމަލު ކުރެވޭގޮތާއި، ޕޮލިސް ސްޓޭޝަނުގެ އާއްމު ހާލަތު ބެލުމުގެ މަސައްކަތް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)އިން ފަށައިފިއެވެ.

އަންގާރަ ދުވަހުން ފެށިގެން 3 ދުވަހުގެ މުއްދަތަށް ހިއުމަން ރައިޓްސް ކޮމިޝަންގެ ނޭޝަނަލް ޕްރިވެންޓިވް މެކޭނިޒަމްއިން އދ. މަހިބަދޫ ޕޮލިސް ސްޓޭޝަނަށް ޚާއްސަ ޒިޔާރަތެއް ކުރާނެއެވެ.

Advertisement

އދ. މަހިބަދޫ ޕޮލިސް ސްޓޭޝަންގެ މޮނިޓަރިންގއާ ގުޅޭގޮތުން އެޗްއާރްސީއެމުން ބުނީ މަހިބަދޫ ޕޮލިސް ސްޓޭޝަންގައި ބަންދުގައި ތިބި މީހުންނާ މެދު އަމަލު ކުރެވޭގޮތާއި، ޕޮލިސް ސްޓޭޝަނުގެ އާއްމު ހާލަތާއި، މި ބަންދުގައި ތިބި މީހުންނާމެދު އަނިޔާވެރި، ލާއިންސާނީ ދަށުދަރަޖައިގެ އަމަލެއް ހިނގާތޯބެލުމާއި، އެފަދަ އަމަލަކަށް މަގުފަހިވެދާފަދަ ކަމެއް ހުރިތޯ ބަލާނެ ކަމަށެވެ. ދައުލަތުގެ ބެލުމުގެދަށުގައި މިނިވަންކަން ގެއްލޭގޮތަށް ބައިތިއްބާފައި ތިބޭ ފަރާތްތަކަށް ދިވެހިރާއްޖޭގެ ގާނޫނުއަސާސީ (އެންޓި ޓޯޗަރ ގާނޫނު)އާއި، ގައުމީ އަދި ބައިނަލްއަގުވާމީ އެހެނިހެން މިންގަނޑުތަކާއި ގަވާއިދުތަކާ އެއްގޮތްވާގޮތުގެމަތިން މި ސްޓޭޝަނުގައި ޚިދުމަތް ފޯރުކޮށްދޭތޯ ބަލާނެކަމަށް އެޗްއާރްސީއެމުން ބުނެއެވެ.

އެޗްއާރްސީއެމުން ބުނީ މުވައްޒަފުންނަށް ދިމާވާ ދަތިތަކާއި، މިފަދަ މާހައުލެއްގައި މަސައްކަތްކުރާއިރު ދިވެހިރާއްޖޭގެ ގާނޫނުއަސާސީއާއި ބައިނަލްއަގުވާމީ މުއާހަދާތަކުން ލިބިދޭންޖެހޭ ރައްކާތެރިކަން ލިބިދޭތޯއާއި، ޕޮލިސް ސްޓޭޝަނުގައި މަސައްކަތްކުރާ މުވައްޒަފުންގެ އާއްމު ހާލަތު ދެނެގަނެ، މަސައްކަތުގައި ދިމާވާ ގޮންޖެހުންތައް ދެނެގަތުން ވެސް ހިމެނޭ ކަމަށެވެ.

މީގެ އިތުރުން ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19އާ ގުޅިގެން، ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ކަނޑައަޅާފައިވާ މިންގަނޑުތަކާއި، އަދި ކޮވިޑް-19 ގެ ހާލަތުގައި މިފަދަ ތަންތަނުގައި މަސައްކަތްކުރާ މުވައްޒަފުންނާއި ބަންދުގައި ތިބޭ މީހުންނަށް ފޯރުކޮށްދޭ ޚިދުމަތްތައް ދެނެގަތުމަށް ވެސް ހަމަޖެހިފައިވާ ކަމަށް އެޗްއާރްސީއެމުން ބުނެއެވެ.

މި ޒިޔާރަތުގައި ކޮމިޝަން 2 މެންބަރުންނާއެކު އެންޕީއެމްގެ ޓީމަކުން ބައިވެރިވާނެއެވެ. މި ޒިޔާރަތަށްފަހު ފާހަގަކުރެވޭ ކަންތައްތައް ހިމެނޭ އަވަސް ކަރުދާހެއް އދ. މަހިބަދޫ ޕޮލިސް ސްޓޭޝަންނާ ހިއްސާކުރުމާއި، ޒިޔާރަތުގެ މައްޗަށް ބިނާކޮށް އެކުލަވާލާ ރިޕޯޓު ކޮމިޝަނުން ފާސްވުމުން، ދިވެހި ފުލުހުންގެ ޚިދުމަތާއި ކަމާގުޅޭ އެހެނިހެން އިދާރާތަކާ ހިއްސާކުރެވޭނެއެވެ. އަދި ރިޕޯޓުގައި ފާހަގަކޮށްފައިވާ ކަންކަމާއި، ހުށަހަޅާފައިވާ ހުށަހެޅުންތަކާ ގުޅޭގޮތުން މަޝްވަރާކުރުމަށް ދިވެހި ޚިދުމަތާއެކު ބައްދަލުވުމެއް ބޭއްވުމުގެ އިތުރުން ރިޕޯޓުގެ ހުށަހެޅުންތައް ތަންފީޒުވަމުންދާ މިންވަރު ދެނެގަތުމުގެ މަސައްކަތް ކުރުމަށް ހަމަޖެހިފައިވާ ކަމަށް އެޗްއާރްސީއެމުން ބުނެއެވެ.

އދ. މަހިބަދޫ ޕޮލިސް ސްޓޭޝަނަށް ކޮމިޝަނުގެ ނޭޝަނަލް ޕްރިވެންޓިވް މެކޭނިޒަމްއިން 2015 ފެބުރުވަރީ 17ގައި މޮނިޓަރިންގ ޒިޔާރަތެއްކޮށް، އިސްލާހު ކުރުމަށްޓަކައި ފާހަގަކުރެވުނު ކަންތައްތަކުގެ މައްޗަށް ރިއާޔަތްކޮށް، 17 ހުށަހެޅުމެއް ކަމާގުޅޭ އިދާރާއަށް ހުށަހަޅާފައިވެއެވެ. އެން.ޕީ.އެމް ގެ މި ޒިޔާރަތަކީ ކޮމިޝަނުން މި ސްޓޭޝަނަށްކުރާ 2 ވަނަ ޒިޔާރަތެވެ.