ރަހީނުކޮށްގެން އުޅުނު ކުއްޖަކު މަރާލާފައި އޮއްވައި ހުޅުމާލެއިން ފެނުނު މައްސަލައާ ގުޅިގެން ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގެ ބައްދަލުވުމެއް ބާއްވަން ނިންމައިފިއެވެ.

އަންގާރަ ދުވަހުގެ މެންދުރު 12:00ށް ތާވަލުކޮށްފައިވާ މި ބައްދަލުވުމުގެ އެޖެންޑާގައި ވަނީ އުމުރުން 13 އަހަރުގެ ކުއްޖަކު ރަހީނުކުރުމަށް ފަހު މަރާލާފައިވާ ކަމަށް ބުނާ މައްސަލައާ ގުޅޭ ގޮތުން މަޝްވަރާ ކުރުމުވެ.

މި މައްސަލައާ ގުޅިގެން ފުލުހުން ބުނީ 13 އަހަރުގެ ފިރިހެން ކުއްޖަކު ރަހީނުކޮށްގެން ގެންގުޅޭ މައްސަލައެއް މި މަހުގެ 20 ވަނަ ދުވަހު ރިޕޯޓް ކޮށްފައިވާތީ، އެ ކުއްޖާ ހޯދުމުގެ މަސައްކަތް ކުރަމުންދަނިކޮށް، އެ ކުއްޖާ މަރާލާފައި އޮއްވައި ފެނުނީ މި މަހުގެ 21 ވަނަ ދުވަހުގެ ރޭ، ދަންވަރު 2:38ހާއިރު ކަމަށެވެ.

މި މައްސަލައާ ގުޅިގެން 17 އަހަރުގެ ދިވެހި ފިރިހެން ކުއްޖަކާއި، 27 އަހަރުގެ ދިވެހި ފިރިހެނަކު މިހާރު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން މައުލޫމާތުދެއެވެ. އިތުރު ތަފްސީލެއް ފުލުހުން ހާމައެއް ނުކުރެއެވެ.

ރަހީނުކޮށްގެން މަރާލާފައި އޮއްވައި ފެނުނު ކުއްޖަކީ ގދ. މަޑަވެއްޔަށް ނިސްބަތްވާ ކުއްޖެކެވެ. މަޑަވެލި ކައުންސިލުން ރާއްޖެއެމްވީއަށް މިކަން ކަށަވަރު ކޮށްދެމުން ބުނީ، ކައުންސިލަށް އެ މައުލޫމާތު ލިބިފައިވާ ކަމަށާއި، އެކުއްޖާ ގެއްލިގެން އާއިލާއިން ރިޕޯޓުކުރި ފަހުން އިތުރު މައުލޫމާތެއް ނުލިބި، ދެން އިވުނީ މަރާލި ޚަބަރު ކަމަށެވެ.