ގުޅީފަޅުގެ މަޝްވަރާތައް އަވަސްކޮށްދެއްވުމަށް އެދި މޭޔަރުގެ ސިޓީއެއް ރައީސަށް
ހަތަރު ހަފްތާއާ ގާތްވާއިރު މަޝްވަރާތައް ނުފެށޭ
ގުޅީފަޅުގައި ކުރިން އިމާރާތް ކޮށްފައިވާ ހައުސިން ޔުނިޓްތަކެއް
ގުޅީފަޅަކީ ބޯހިޔާވަހިކަމަށް ޚާއްސަ ތަނަކަށް ހެދުމަށްޓަކައި ކަމާބެހޭ ފަރާތްތަކާއެކު ކުރަންޖެހޭ މަޝްވަރާތައް އަވަސްކޮށްދެއްވުން އެދި ރައީސުލްޖުމްޖޫރިއްޔާއަށް، މާލެ ސިޓީގެ މޭޔަރު ސިޓީއަކުން ދަންނަވައިފިއެވެ.
މާލޭގެ މޭޔަރ ޑރ. މުޙައްމަދު މުއިއްޒު ވިދާޅުވީ ގުޅީފަޅުގެ ތަރައްޤީގެ ޕްލޭން މުރާޖަޢާކުރަން ސިޓީ ކައުންސިލް ވެސް ހިމެނޭ ގޮތަށް، ކަމާގުޅުންހުރި އިދާރާތަކާ އެކު މަޝްވަރާތައް ބާއްވަވާނެކަމަށް ރައީސް ވިދާޅުވިފަހުން 4 ހަފްތާވާން ގާތްވެފައި ވާކަމަށެވެ. އެހެންނަމަވެސް މިހާދުވަސް ފާއިތުވި އިރުވެސް އެކަން ނުވާތީ އެކަން އަވަސްކޮށްދެއްވުމަށް އެދި ރައީސުލްޖުމްހޫރިއްޔާއަށް ސިޓީއަކުން ދަންނަވާފައި ވާނެ ކަމަށް މުއިއްޒު ވިދާޅުވިއެވެ.
މެއި މަހުގެ ފަހުކޮޅު ރައީސާ ބައްދަލުކުރައްވައި، މާލޭގެ ރައްޔިތުންނަށް ދާއިމީ ބޯހިޔާވަހިކަމެއް ހޯދައި ދިނުމަށް ގުޅީފަޅު ރެސިޑެންޝަލް ޒޯނެއްގެ ގޮތުގައި ތަރައްގީކުރުމަށް މޭޔަރުވަނީ ރައީސް ސާލިހަށް ހުށަހަޅުއްވާފައެވެ.
ޕޯޓް ހެދުމަށް ނިންމައި ވެފައިވާ އެއްބަސްވުމަށް ބަދަލު ގެނައުމަށް ފަސޭހަ ނުވާނެކަން ގަބޫލު ކުރެވޭ ކަމަށް ދެންނެވި ކަމަށާއި، އެހެން ނަަމަވެސް މާލޭ ރައްޔިތުން އުޅޭ ނިކަމެތި ހާލަށް ބަލައި، އެންމެ ރަނގަޅު ގޮތަކީ ގުޅީފަޅު ރެސިޑެންޝަލް ޒޯނެއްގެ ގޮތުގައި ތަރައްގީކުރުން ކަމަށް ރައީސަށް ދަންނަވާފައިވާނެ ކަމަށް މޭޔަރުވަނީ ވިދާޅުވެފައެވެ.
ގުޅީފަޅުގެ ޕްލޭން ފައިނަލް ކުރުމުގައި ސިޓީ ކައުންސިލް ވަރަށް މުހިއްމު ދައުރެއް އަދާކުރަންޖެހޭކަން ރައީސް ފާހަގަކުރެއްވި ކަމަށާއި، މިހާރު ހެދިފައި އޮތް ޕޯޓު އެޅުމުގެ ޕްލޭނަށް ބަދަލު ގެންނަން ކައުންސިލާ އެކީގައި މަސައްކަތް ކުރުމަށް ކަމާބެހޭ އިދާރާތަކުގައި ދަންނަވާނެ ކަމުގެ ޔަގީންކަން ރައީސް ދެއްވިކަމަށް މޭޔަރު އޭރު ވިދާޅުވިއެެވެ.
