ފޯނު ނަމްބަރު ހޯދަނީ ޖޫރިމަނާކޮށްފިނަމަ އަންގަން: ފުލުހުން
21 ޖޫން 2021 | ހޯމަ 16:29މީހާގެ ރިލޭޝަންޝިޕް ސްޓޭޓަސް ފަދަ މައުލޫމާތުތައް އަހާ ކަމުގެ ޝަކުވާ ފެންމަތިވި
ފުލުހުން- ލޮކްޑައުންގައި ހަރަކާތްތެރި ވަނީ
މަގުމަތީގައި ފުލުހުން ކުރަމުންދާ މަސައްކަތުގެ ތެރެއިން މީހުންގެ ފޯނު ނަމްބަރު ހޯދަނީ ޖޫރިމަނާކޮށްފި ނަމަ އެކަން އަންގަން ކަމަށް މޯލްޑިވްސް ޕޮލިސް ސަރވިސްއިން ބުނެފިއެވެ.
ކޮވިޑް-19އާ ގުޅިގެން އަޅާފައިވާ ފިޔަވަޅުތަކުގެ ސަބަބުން އާންމުން އެ ފިޔަވަޅުތަކަށް ބޯލަނބާތޯ ބެލުމާއި ކާފިއު ގަޑީގެ ހަރަކާތްތައް މޮނިޓަރ ކުރުމަށް ފުލުހުން އަންނަނީ މަގުމަތީގައި ހަރަކާތްތެރިވަމުންނެވެ. އެގޮތުން އެކި ގަޑިތަކުގައި އާންމުން ހުއްޓުވައި ބޭރުގައި އުޅުމުގެ ހުއްދަ އޮތްތޯ ބެލުމުގެ މަސައްކަތް ފުލުހުން އަންނަނީ ކުރަމުންނެވެ.
އެ މަސައްކަތުގެ ތެރެއިން ފުލުހުން ކަމާ ނުބެހޭ ޒާތީ މައުލޫމާތު އަހާ ކަމުގެ ޝަކުވާ ވަނީ އާންމުންގެ ތެރޭގައި ބޮޑުވެފައެވެ. އެގޮތަށް ހުއްޓުވާފައި މީހާ އަތުގައި އޮންނަ ފާސް ވެރިފައި ކުރުމަށް ފުލުހުން ހޯދަނީ ނަމާއި އައިޑީކާޑު ނަމްބަރެވެ. ނުވަތަ ބޭނުންކުރަނީ ފާހުގައި ފެންނަން އިންނަ ކޯޑެކެވެ. އޭގެ އިތުރުން ވެސް ބައެއް މީހުން ގާތުގައި ފޯނު ނަމްބަރާއި، މީހާގެ ރިލޭޝަންޝިޕް ސްޓޭޓަސް ފަދަ މައުލޫމާތުތައް އަހައި، އުފަން ދުވަސް ހޯދައި، ފަހުން ގުޅާނަމޭ ބުނުން ފަދަ ކަންކަން ވެސް ފުލުހުންގެ ތެރެއިން ކުރަމުން އަންނަ ކަމަށް ބުނެ ސޯޝަލް މީޑިއާގައި ވަނީ އެކަމުގެ ކަންބޮޑުވުން އިތުރުވެފައެވެ. ވަކިން ޚާއްސަކޮށް، އަންހެނުންނަށް މި މައްސަލަ ދިމާވާކަން ފާހަގަކޮށްފައިވެއެވެ.
އެކަމާ ގުޅިގެން ފުލުހުން ބުނީ ކޮވިޑް-19އާ ގުޅިގެން އަޅާފައިވާ ފިޔަވަޅުތައް ތަންފީޒުކުރުމަށް ފުލުހުން ކުރަމުންދާ މަސައްކަތުގެ ތެރެއިން ޕަރމިޓްގެ ސައްހަކަން ކަށަވަރުކުރުމަށް ބައެއް ހާލަތުގައި އައިޑީކާޑު ނަމްބަރު ހޯދާ ކަމަށެވެ. އަދި ޖޫރިމަނާކުރަން ޖެހިއްޖެ ނަމަ އެކަން އެސްއެމްއެސް މެދުވެރިކޮށް އެންގުމަށްޓަކައި ފޯނު ނަމްބަރު ވެސް އޮޅުންފިލުވާނެ ކަމަށެވެ.
ފުލުހުން ބުނީ ސޯޝަލް މީޑިއާގައި ފެންމަތިވެފައިވާ ފަދަ އެއްވެސް ޝަކުވާއެއް ރަސްމީކޮށް އަދި އެ އިދާރާއަށް ލިބިފައި ނުވާކަމަށެވެ. އެކަމަކު ސޯޝަލް މީޑިއާގައި އެކަންކަން ފެންމަތިވެފައިވާތީ ފުލުހުންގެ ޕްރޮފެޝަނަލް ސްޓޭންޑަރޑް ކޮމާންޑުން އެކަން ބަލަމުން އަންނަ ކަމަށެވެ. މީގެ އިތުރަށް އެފަަދަ ކަމެއް އެއްވެސް ފުލުހެއްގެ ކިބައިން ފާހަގަވެއްޖެ ނަމަ ފުލުހުންގެ ޕްރޮފެޝަނަލް ސްޓޭންޑަރޑް ކޮމާންޑްއަށް އީމެއިލް މެދުވެރިކޮށް އެކަން ރަސްމީކޮށް އެންގުމަށް ވެސް އެދިފައިވެއެވެ.
