''ނަމުގައި ޖަލު ހުކުމް، ކަމުން ފިނިކޮޓަރީގައި ސިޔާސީ ހަރަކާތް ހިންގަވަނީ''

ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން ގޭބަންދުގައި ހުންނަވައިގެން ސިޔާސީ މަސައްކަތްތައް ފައްޓަވައިފިއެވެ.

އިތުރުބާރު ހުރި ފަރާތަކުން ރާއްޖެއެމްވީއަށް ވިދާޅުވީ މާލެ ސިޓީގެ ޑެޕިއުޓީ މޭޔަރު މަގާމަށް މާފަންނު މެދު ދާއިރާގެ ކައުންސިލް މެމްބަރު އަހުމަދު ނަރީޝް ހޮވީ ވޯޓަށް ރައީސް ޔާމީން ނުފޫޒު ފޯރުވައިގެން ކަމަށާއި، ލީޑަރޝިޕް ގުރޫޕްތަކާއި ކައުންސިލް ގުރޫފްތަކުގައި ވާހަކަދައްކަވާފައިވާ ކަމަށެވެ. އަދި ވަކިވަކި ކައުންސިލް މެމްބަރުންނާއި ވެސް ރައީސް ޔާމީން ވާހަކަދައްކަވާފައިވާ ކަމަށް ވިދާޅުވިއެވެ.

މާލެ ސިޓީގެ ޑެޕިއުޓީ މޭޔަރު މަގާމު ނަރީޝް ކާމިޔާބު ކުރެއްވީ ހުޅުމާލެ ދާއިރާގެ ކައުންސިލް މެންބަރު އިބްރާހީމް ޝުޖާއު އާއި ވިލިމާލެ ދާއިރާގެ ކައުންސިލް މެންބަރު ފާތިފަތު ނަހުލާއާ ވާދަކުރައްވައިގެންނެވެ. ނަރީޝް މި ޕްރައިމަރީ ކާމިޔާބު ކުރެއްވީ ފަސް ވޯޓުންނެވެ. ދެން ތިއްބެވި ދެ ބޭފުޅުންނަށް ލިބިވަޑައިގަތީ ހަތަރު ވޯޓެވެ.

މި ބައްދަލުވުމުގައި މާލެ ސިޓީގެ މޭޔަރު ޑރ. މުހައްމަދު މުއިއްޒު ވެސް ހިމެނޭހެން އެޕާޓީގެ 13 ކައުންސިލަރުން ބައިވެރިވެވަޑައިގެންނެވިއެވެ. 

މީގެ އިތުރަށް ވިދާޅުވީ ގޭބަންދުގައި ހުންވައިގެން ރައީސް ޔާމީން ވީޑިއޯ ކޮންފަރެންސްތަކުގައި ބައިވެރިވެވަޑައިގަންނަވާ ކަމަށާއި، ސިޔާސީ މަސައްކަތްތައް ފުޅާދާއިރާގައި ކުރައްވަމުން ގެންދަވާ ކަމަށެވެ.

ގޭބަންދުގައި ހުންވައިގެން ސިޔާސީ މަސައްކަތްތައް ފައްޓާފައިވާއިރު، ރައީސް ޔާމީން ގޭބަންދަށް ބަދަލުކޮށްފައިވަނީ އޭޕްރީލް މަހުގެ 29 ވަނަ ދުވަހުގެ ރޭގެ ވަގުތެއްގައެވެ. އެމަނިކުފާނު ގެއަށް ބަދަލުކޮށްފައިވަނީ މާފުށީ ޖަލުގައި ކޮވިޑް-19ގެ ހާލަތު ގޯސްވެ މާފުށީ ޖަލުން ޕޮޒިޓިވްވާ މީހުންގެ ތެރޭގައި ގިނަ އަދަދެއްގެ ޖަލު ބަލަހައްޓާ ޕްރިޒަން އޮފިސަރުން ހިމެނޭތީއެވެ. ރައީސް ޔާމީން ހިމެނޭ ގޮތަށް ހައި ރިސްކު ނުވަތަ ސީރިއަސް ހާލަތަށް ހިނގައިދާނެ ހުރިހާ ގައިދީން ގޭ ބަންދަށް ވަގުތީ ގޮތުން ވަނީ ބަދަލުކޮށްފައެވެ.

ރައީސް ޔާމީނުގެ ވެރިކަމުގައި އެމްއެމްޕީއާރްސީ މެދުވެރިކޮށް ހިންގި ބޮޑު ޚިޔާނާތުގެ މައްސަލާގައި ފަސް އަހަރުގެ ޖަލު ހުކުމެއް އިއްވައި ފަސް މިލިއަން ޑޮލަރުން ވަނީ ޖޫރިމާނާކޮށްފައެވެ. ޖަލު ހުކުމް ތަންފީޒު ކުރައްވަމުން ގެންދަވާތާ މިހާރު އެއް އަހަރަށް ވުރެ ގިނަ ދުވަސްވެފައިވާއިރު އަދިވެސް އެމްއެމްޕީއާރްސީ މެދުވެރިކޮށް ހިންގި ޚިޔާނާތުގެ އެކި މައްސަލަތައް ބަލަމުން އެބަދެއެވެ. އޭގެ ތެރެއިން ބައެއް ކަންކަމުގައި އިތުރު ދައުވާތަކެއް ވެސް އުފުލުމަށް ވަނީ ތައްޔާރުވެފައެވެ.