މާލޭ ސިޓީގެ ޑެޕިއުޓީ މޭޔަރުކަމަށް ޕީޕީއެމްގެ ފަރާތުން ކުރިމަތިލައްވާނެ ބޭފުޅަކު ހޮވުމަށް އިދިކޮޅު ޕީ.ޕީ.އެމުން ނިކުންނަވާނީ މާފަންނު މެދު ދާއިރާގެ ކައުންސިލަރު އަޙްމަދު ނަރީޝްކަމަށް ކަނޑައަޅައިފިއެވެ.

ނަރީޝްއާ ވާދަ ކުރެއްވީ ހުޅުމާލެ ދާއިރާގެ ކައުންސިލަރު ޝުޖާޢުއާއި، ވިލިމާލެ ދާއިރާގެ ކައުންސިލަރު ނަޙުލާއެވެ. ވިލިމާލެ ޝުޖާޢުއަށް 4 ވޯޓް، އަދި ނަހުލާއަށްވެސް ލިބުނީ 4 ވޯޓެވެ. ނަރީޝްއަށް ލިބިފައިވަނީ 5 ވޯޓް ލިބިފައެވެ. މާލެ ސިޓީ ކައުންސިލްގެ ސާފު މެޖޯރިޓީ އޮތް ޕީޕީއެމްގެ ކައުންސިލަރުން ބޭއްވި ބައްދަލުވުމުގައި ވަނީ ޑެޕިއުޓީ މޭޔަރަކަށް ވާދަކުރާނެ މީހެއްގެ ގޮތުގައި ނަރީޝް ކަނޑައަޅާފައެވެ. 

ސިޓީ ކައުންސިލްތަކުގެ ތެރެއިން މިހާތަނަށް ޑެޕިއުޓީ މޭޔަރަކު ކަނޑަނާޅައި އޮތީ މާލެ ސިޓީ ކައުންސިލް އެކަންޏެވެ. އަދި ޑެޕިއުޓީ މޭޔަރުގެ ވާދަވެރިކަން އެންމެ ބޮޑުވެފައިވަނީވެސް މާލެ ސިޓީ ކައުންސިލްގައެވެ. މާލެ ސިޓީ ކައުންސިލްގައި މޭޔަރާއެކު ހިމެނިވަޑައިގަންނަވާ 19 މެންބަރުންގެ ތެރެއިން 12 މެންބަރުންނަކީ ޕީޕީއެމްގެ މެންބަރުންނެވެ.

މާލެ ސިޓީގެ ޑެޕިއުޓީ މޭޔަރަކު ހޮވުން މި މަހުގެ 21 ވަނަ ދުވަހު އޮންނާނެ ކަމަށް ބަޔާންކޮށް، 14 ދުވަހުގެ ނޯޓިސްއެއް ހުރިހާ ކައުންސިލަރުންނަށް ވަނީ ފޮނުވާފައެވެ. ޑެޕިއުޓީ މޭޔަރަކު ހޮވަނީ ކައުންސިލަރުންގެ މެދުގައި ނެގޭ ސިއްރު ވޯޓަކުންނެވެ.

މި މަގާމަށް މި މަހުގެ 20 ވަނަ ދުވަހުގެ ކުރިން ބޭފުޅަކު އައްޔަންކުރުމަށް އެލްޖީއޭއިން އަންގާފައިވާއިރު، މިމަހު 21 ގައި އެކަންކުރުމަށް ސިޓީ ކައުންސިލުން މިވަނީ ނޯޓިސް ދީފައެވެ. އެ ނޯޓިސް ދީފައިވަނީ ކައުންސިލަރުން ރަށުގައި ނޫޅޭނަމަ އިންތިޚާބުގެ ކުރިން 14 ދުވަސް ލިބޭ ގޮތަށެވެ.