ބިދޭސީންގެ ހާލަތު ބެލުމަށް އަންނަ ހަފްތާގައި އަނެއްކާވެސް ޒިޔާރަތް ކުރާނެ ކަމަށް އެޗްއާރްސީއެމުން ބުނެފިއެވެ.
އެޗްއާރްސީއެމުން ބުނީ، ހުޅުމާލެ ދެވަނަ ފިޔަވަހީގައި ހަދާފައިވާ ޑިޓެންޝަން ސެންޓަރަށް ފުރަތަމަ ޒިޔާރަތް ކުރުމަށްފަހު އެއްކުރި މައުލޫމާތުގެ އަލީގައި، ރިޕޯޓް ތައްޔާރުކޮށް ފާހަގަކުރެވުނު ކަންކަމާއެކު ގުޅުންހުރި މުއައްސަސާތަކަށް ރިޕޯޓް ފޮނުވާފައިވާނެ ކަމަށެވެ. އެ ރިޕޯޓުގައި އިތުރަށް ރަނގަޅުކުރަންވީ ކަންކަން ހިމަނާފައިވާނެ ކަމަށާއި، އެކަމާގުޅިގެން އެއްވެސް އިދާރާއަކުން މިހާތަނަށް އެޗްއާރްސީއެމަށް ޖަވާބެއް ދީފައި ނުވާ ކަމަށެވެ. އަންނަ ހަފްތާގެ ތެރޭގައި އިތުރު ކަންކަން ބެލުމަށް ޑިޓެންޝަން ސެންޓަރަށް ޒިޔާރަތްކުރާނެ ކަމަށާއި، އަނބުރާ ގައުމަށް ފޮނުވާލާ ބިދޭސީގެ ލިޔެކިޔުންތައް ހަދާފައިވާ ގޮތާއި، އެމީހުންނަށް މުސާރަ ދީފައިވޭތޯއާއި އެހެނިހެން ކަންކަންވެސް މި ޒިޔާރަތުގައި ބަލާނެ ކަމަށް އެޗްއާރްސީއެމްގެ ކޮމިޝަނަރ މޫމިނާ ވަހީދު ވިދާޅުވިއެވެ.
މޫމިނާ ވިދާޅުވީ، ގަވާއިދާ ޚިލާފަށް އުޅޭ ބިދޭސީން ކަމަށްވިޔަސް މަސައްކަތްކުރުވައިފިނަމަ މުސާރަ ދޭން ޖެހޭނެ ކަމަށެވެ. އެއީ އިންސާނީ ހައްގުގެ ނަޒަރިއްޔާތުން ބަލާއިރު ކޮންމެހެން ކުރަން ޖެހޭ ކަމެއް ކަމަށް މޫމިނާ ވިދާޅުވިއެވެ.
މޯލްޑިވްސް ޕޮލިސް ސަރވިސް އާއި އިމިގްރޭޝަނުން ހިންގާ މި މިޕްރޮގްރާމަކީ އިކޮނޮމިކް މިނިސްޓްރީއާ ގުޅިގެން ކުރިޔަށްދާ ރެގިއުލަރައިޒޭޝަން ޕްރޮގްރާމުގެ ދަށުން ގަވާއިދާ ޚިލާފަށް ރާއްޖޭގައި އުޅޭ ބިދޭސީންގެ ތެރެއިން، އެމީހުންނާ ހަވާލުވާނެ ދިވެއްސެއް ހުރި ނަމަ ލިޔެ ކިޔުންތައް ހަމަކޮށް ގަވާއިދާ އެއްގޮތަށް ރާއްޖޭގައި އުޅުމުގެ ފުރުސަތު ދެވޭނެއެވެ. އެހެންނޫންނަމަ އަނބުރާ ގައުމަށް ފޮނުވާލެވޭނެއެވެ.
ވޯކް ވިސާ ނެތި އަދި ކޯވިޑް-19އާ ގުޅިގެން ކަނޑަޅާފައިވާ ކާފިއު ވަގުތުގައި ޤަވާއިދާ ޚިލާފަށް މަގުމަތީގައި އުޅޭ ފަރާތްތައް ހިފަހައްޓައި ހުޅުމާލެ ދެވަނަ ފިޔަވަހީގައި ޤާއިމުކޮށްފައިވާ ޑިޓެންޝަން ސެންޓަރަށް ގެންދަން ފަށާފައިވަނީ މެއި މަހުގެ ފަހުކޮޅުގައެވެ.
