4.5 މިލިއަން ލީޓަރުގެ ތެޔޮ ބަރުކޮށްގެން ދަތުރުކުރަމުންދިޔަ ބޯޓެއް ދިޔަވަމުންދަނިކޮށް ސަލާމަތްކޮށްފި

ގިނަ އަދަދެއްގެ ތެޔޮ ބަރުކޮށްގެން ދަތުރުކުރަމުންދިޔަ ބޯޓެއް ދިޔަވަމުންދަނިކޮށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް)އިން ސަލާމަތްކޮށްފިއެވެ.

އެމްއެންޑީއެފް އިން މައުލޫމާތުދޭ ގޮތުގައި 4.5 މިލިއަން ލީޓަރުގެ ތެޔޮ ބަރުކޮށްގެން ދިޔަ ސްޓޭޓް ޓްރޭޑިން އޯގަނައިޒޭޝަން (އެސްޓީއޯގެ) ބޯޓެއް ގދ. ފަރެސްމާތޮޑާ ކައިރިން ދިޔަވަމުންދާ ކަމުގެ ރިޕޯޓް އެއިދާރާއަށް ލިބިފައި ވަނީ ބުރާސްފަތިދުވަހުގެ މެންދުރުފަހު 03:10 ހާއިރުއެވެ. އެއާއެކު އެމްވީ އަލިމަސް ކިޔާ މިބޯޓް ދިޔަވުން ކޮންޓްރޯލް ކުރުމަށް އެމްއެންޑީއެފްގެ ސަދަން އޭރިއާ ކޯސްޓް ގާޑް ސްކޮޑްރަންގެ ޑައިވަރުން ވަނީ ހަރަކާތްތެރިވާން ފަށާފައެވެ.

ބޯޓް ދިޔަވުން ކޮންޓްރޯލްކޮށްފައިވާ އިރު، ކޯސްޓް ގާޑްގެ ޑައިވަރުން ވަނީ ބޯޓު ދިޔަވާން ދިމާވި ސަބަބު ދެނެގަތުމަށް މަސައްކަތްކޮށްފައެވެ. އަދި ބޯޓަށް އިތުރު ގެއްލުމެއް ލިބިފައިވޭތޯވެސް ކޯސްޓް ގާޑުން ވަނީ ބަލާފައެވެ.

އެމްއެންޑީއެފްއިން ބުނީ އެބޯޓުގައި 4322.735 ކީލޯލީޓަރު ޑީސެލް އަދި 456.514 ކިލޯލީޓަރު ޕެޓްރޯލް ހުރިކަމަށެވެ. އަދި ބޯޓުގައި 17 ދިވެހިން ތިބިކަމަށް އެމްއެންޑީއެފް އިން ބުނެއެވެ.