އިސްރާއީލުން ރާއްޖެއަށް ސީދާ ފްލައިޓް ދަތުރުތައް ނުކުރެވޭނެ ކަމަށް ސަރުކާރުން ބުނެފި
މި އަހަރުގެ އެޕްރީލް މަހުގެ ނިޔަލަށް އިސްރާއީލުން ރައްޖެއަށް 1414 ފަތުރުވެރިންވަނީ ޒިޔާރަތް ކޮށްފައި
ސީ ޝެލްސް އެއާލައިންގެ ފްލައިޓެއް - އިސްރާއީލުން ރާއްޖެއަށް ދަތުރު ފެށުމުގެ އެއްބަސްވުމެއް ހަދާފައި ނުވާ ކަމަށް ސަރުކާރުން ބުނޭ
ދިވެހިރާއްޖެ އާއި އިޒްރޭލާއި ދެމެދު ވައިގެ ދަތުރުފަތުރު ކުރުމަށް ހަމަޖެހިފައިވާ ކަމަށް ދެކެވޭ ވާހަކަ ތައް ސަރުކާރުން ދޮގުކޮށްފިއެވެ.
މިނިސްޓްރީ އޮފް ޓްރާންސްޕޯޓް އެެންޑް ސިވިލް އޭވިއޭޝަނުން ނެރުނު ބަޔާނުގައިވަނީ، ދިވެހިރާއްޖެ އާއި އިޒްރޭލާއި ދެމެދު ވައިގެ ދަތުރުފަތުރު ކުރުމަށް ހަމަޖެހިފައިވާ ކަމަށް ދެކެވޭ ވާހަކަތަކަކީ ހަޤީޤަތާއި ޚިލާފުއެއްވެސް އަސާސެއް ނެތް ވާހަކަތަކެއް ކަމަށެވެ. ދިވެހިރާއްޖެ އާއި އިޒްރޭލާއި ދެމެދު ވައިގެ ދަތުރުފަތުރު ކުރުމާއި ގުޅޭ ގޮތުން މިހާތަނަށް އެއްވެސް ވަރަކަށް މަޝްވަރާ ކުރެވި އަދި ދަތުރު ކުރުމަށް އެއްވެސް އެއަރލައިނަކަށް ހުއްދަ ދެވިފައިނުވާ ކަމަށް ބަޔާނުގައި ބުނެފައިވެއެވެ.
ވައިގެ ދަތުރުފަތުރުގެ ޚިދުމަތް ދިނުމާއި ގުޅޭ އެއްވެސް އެއްބަސްވުމެއްގައި ސޮއި ކުރެވިފައި ނުވާ ކަމަށްވެސް ބުނެފައިވެއެވެ. ދިވެހި ސަރުކާރުން މިފަދަ ހުއްދައެއް ދިނުމަށް ވިސްނާފައި ނުވާކަމަށާއި އަދި އިޒްރޭލާއި ދެމެދު ވައިގެ ދަތުރުފަތުރު ކުރުމާއި ގުޅޭ އެއްބަސްވުމެއްގައި ސޮއި ކުރުމަށް ނިންމާފައިނުވާ ކަމަށްވެސް މި ބަޔާނުގައި ވެއެވެ.
އިސްރާއީލްގެ ޓްރެވެލް ކުންފުންޏެއް ކަމަށްވާ ކަމިނޯސްއާ ހަވާލާދީ އިސްރާއިލްގެ ނޫހެއްގައި ރިޕޯޓް ކޮށްފައިވާ ގޮތުން ސެޕްޓެމްބަރު މަހުގެ 6 ވަނަ ދުވަހުން ފެށިގެން ކޮންމެ ހޯމަ ދުވަހަކު އިސްރާއީލުން ރާއްޖެއަށް ސީދާ ދަތުރުތައް ކުރުމަށް މިހާރުވަނީ ތައްޔާރުވެފައެވެ. ކޮންމެ ހޯމަ ދުވަހަކު ފްލައިޓްގެ ސީދާ ދަތުރުތައް ކުރަން ނިންމާފައިވާކަމަށް "އިސްރާއީލް ހަޔޮމް" ގައި ރިޕޯޓްކޮށްފައިވެއެވެ.
އިސްރާއިލްގެ ފަތުރުވެރިން މިހާރުވެސް ރައްޖެއަށް ދަތުރު ކުރެއެވެ. ސީޝެލްސް އެއަރލައިނުން އިސްރާލުން ދުބާއީއަށް އަދި ދުބާއީން ރާއްޖެއަށް މީގެ ކުރިން ދަތުރުކޮށްފައިވެއެވެ
މި އަހަރުގެ އެޕްރީލް މަހުގެ ނިޔަލަށް އިސްރާއީލުން ރައްޖެއަށް 1414 ފަތުރުވެރިން ވަނީ ޒިޔާރަތް ކޮށްފައެވެެ.
