އެއާޓްރެފިކް ކޮންޓްރޯލާމެދު އޮޅުން ނާރާނެހެން ފޮރިން ޑައިރެކްޓް އިންވެސްޓްމެންޓް ޕޮލިސީ (އެފްޑީއައި ޕޮލިސީ) އިސްލާހު ކުރުމަށްފަހު ޝާއިއުކޮށްފިއެވެ.
ބޭރުގެ 100 އިންސައްތަ ހިއްސާވާ ކުންފުނިތަކަށް ރާއްޖޭގެ އެއާޕޯޓުތައް ހިންގޭ ގޮތަށް އެފްޑީއައި ޕޮލިސީއަށް އަލަށް ގެނައި އިސްލާހު ގެޒެޓްގައި ޝާއިއުކުރުމާއެކު ގިނަ ބަޔަކު ކަންބޮޑުވުން ފާޅުކޮށްފައިވެއެވެ. އެގޮތުން އެންމެ ގިނަ ބައެއްގެ ކަންބޮޑުވުމަކަށްވީ އެއާ ޓްރެފިކް އޮޕަރޭޓްކުރުން ބޭރުގެ ފަރާތްތަކަށް ލިބިގެން ދިއުމެވެ.
މި ކަންބޮޑުވުންތަކާ ގުޅިގެން، ޕޮލިސީގެ އިބާރާތްތައް އިސްލާހު ކުރުމަށްފަހު އަލުން ޝާއިއުކުރާނެ ކަމަށް އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެފައިވެއެވެ.
އެފްޑީއައި ޕޮލިސީގެ އެނެކްސް 1 ގެ ކްލާސް ކޯޑް H3 އަލުން ބަދަލުކުރުމަށްފަހު ޝާއިއުކުރި އިސްލާހުގައި ވާގޮތުން އެއާ ޓްރާސްޕޯޓް ސާވިސް އާ ގުޅުންހުރި ޚިދުމަތްތަކުގެ ތެރޭގައި ދައުލަތުގެ ބާރުގެ ދަށުގައިވާ ޚިދުމަތްތަކާއި ފެސިލިޓީތަކެއް ނުހިމެނެއެވެ. އެގޮތުން އެއާޓްރެފިކް ކޮންޓްރޯލް ކުރުމާއި، އިމިގްރޭޝަނާއި، ކަސްޓަމްސް އާއި އޭވިއޭޝަން ސެކިއުރިޓީ ފަދަ ޚިދުމަތްތައް ނުހިމެނޭނެކަން ސާފުކޮށް ބަޔާންކޮށްފައިވެއެވެ.
ކުރިން ގެނައި އިސްލާހުގައި ވާގޮތަށް، ފްރެއިޓް ސާވިސް ނުހިމެނޭހެން ރާއްޖޭގައި އެއާ ޓްރާންސްޕޯޓުގެ ޚިދުމަތް ބޭރުގެ 100 ޕަސެންޓު ހިއްސާވާ ކުންފުނިތަކަށް ދެވޭނެ ކަމަށް އައު އިސްލާހުގައި ވެސް ބުނެފައިވެއެވެ. އެއާއެކު އެއާވޭ ޓާމިނަލް ފަދަ ޓާމިނަލް ފެސިލިޓީތައް ހިމެނޭގޮތުން އެއާޕޯޓު އޮޕަރޭޓް ކުރުމާއި މެނޭޖް ކުރުމުގެ ޚިދުމަތް ވެސް ދެވޭނެކަމަށް ބުނެފައި ވެއެވެ. ހަމައެހެންމެ އެ ކުންފުނިތަކަށް ގްރައުންޑް ސާވިސް ޚިދުމަތް ދެވޭނެ ކަމަށް ވެސް އިސްލާހުގައި ވެއެވެ.
2020 ވަނަ އަހަރު އެފްޑީއައި ޕޮލިސީ ފުރަތަމަ އެކުލަވާލިއިރު ރާއްޖޭގައި ފްރައިޓް ސާވިސްއާއެކު އެއާ ޓްރާންސްޕޯޓުގެ ޚިދުމަތް ދެވޭނީ ބޭރުގެ 75 ޕަސެންޓު ހިއްސާ އޮންނަ ކުންފުނިތަކަށެވެ. އެހެން ނަމަވެސް ޕޮލިސީއަށް ބަދަލުގެނައީ މި ދާއިރާގައި އިންވެސްޓްކުރުމަށް ޝައުގުވެރިކަން ފާޅުކޮށްފައިވާ ބައެއް ފަރާތްތަކަށް 75 އިންސައްތަ ތްރެޝްހޯލްޑް އޮތުމުން އިންވެސްޓްކުރުމަށް ހުރަސްތަކެއް ހުރުމުން ކަމަށް ސަރުކާރުން ބުނެއެވެ.
