އުމުރުން 18 އަހަރު ނުފުރޭ ކުދިން ކުރާ ކުށްތަކުގެ މައުލޫމާތު މީޑިއާތަކުގައި ރިޕޯޓުނުކުރެވޭ ގޮތަށް މޯލްޑިވްސް މީޑިއާ ކައުންސިލް (އެމްއެމްސީ)ން އުސޫލެއް ހަދައިފިއެވެ.

އެމްއެމްސީން ހެދި މިއުސޫލުހޯމަ ދުވަހު ގެޒެޓުގައި އާންމުކޮށްފައިވާއިރު، ހޯމަ ދުވަހުން ފެށިގެން އުސޫލަށް އަމަލުކުރަން ޖެހެއެވެ.

މީޑިއާ ކައުންސިލުން ހަދައި އާންމުކޮށްފައިވާ މި އުސޫލަކީ، ގާނޫނާ ޚިލާފުވާ ކުޑަކުދިން ހިމެނޭ މައްސަލަތަކުގެ ޚަބަރާއި މައުލޫމާތު ޝާއިއު ކުރުމުގައި، މީޑިއާގެ ދާއިރާގައި މަސައްކަތްކުރާ ފަރާތްތަކުން އަމަލުކުރަންޖެހޭ ހަމަތަކާއި ގެންގުޅެންވީ މިންގަނޑުތައް އެކަށައަޅައިފައި އޮތުން ކަމަށް ބަޔާންކޮށްފައިވެއެވެ.

އުސޫލުގައިވާގޮތުން ކުޑަކުދިން ކުރާ ކުށްތަކާ ގުޅޭ މައުޅޫމާތު މީޑިއާތަކުން ހާމަކުރާއިރު, މީހަކު 18 އަހަރުވުމުގެ ކުރިން ކޮށްފައިވާ ކުށަކާ ގުޅޭ މައުލޫމާތު މީޑިއާގެ އެއްވެސް ވަސީލަތެއްގައި ނުވާތަ އެނޫންވެސް ވަސީލަތެއްގައިވެސް ހާމަކޮށްގެން ނުވާނެއެވެ. އަދި ކުށެއްގެ ތުހުމަތުކުރެވޭ ހިސާބުން ފެށިގެން ކުޑަކުދިންގެ އަދުލުގެ ނިޒާމުގެ އެންމެހައި މަރުޙަލާއެއްގައި ވެސް، އަދި އެއަށްފަހުގައި ވެސް، ކުއްޖާގެ ޒާތީ މައުލޫމާތެއް މީޑިއާތަކުގައި ހާމަކުރުން މަނަލެވެ.

އެގޮތުން ކުއްޖާއަކީ ކާކުކަން އެނގޭ ފަދަ ނުވަތަ ދޭހަވާނެ ފަދަ ގޮތަކަށް ކުއްޖާގެ މައުލޫމާތެއް ނުވަތަ ތަސްވީރެއް، މީޑިއާގެ އެއްވެސް ވަސީލަތެއްގައި ނުވަތަ އެނޫން ވަސީލަތެއްގައި ވެސް ޝާއިއު ކުރުމަކީ މަނާކަމެކެވެ. އަދި ކުއްޖާގެ މައުލޫމާތު ނުސީދާކޮށް ހާމަކުރުމުގެ ތެރޭގައިވެސް ކުއްޖާއަކީ ކާކުކަން އެނގޭ ފަދަ ނުވަތަ ދޭހަވާ ފަދަ މައުލޫމާތެއް ނުވަތަ ތަސްވީރެއް، މީޑިއާގެ އެއްވެސް ވަސީލަތެއްގައި ނުވަތަ އެނޫން ވަސީލަތެއްގައި ވެސް ޝާއިއު ކުރުމަކީ މަނާކަމެކެވެ.

އުސޫލުގައިވާގޮތުން ކުށްކުރާ ކުއްޖާގެ ސްކޫލާއި އެޑްރެސް އަދި ނަން ފަދަ އެއްވެސް ޒާތީ މައުލޫމާތެއް ޝަރީއަތުގެ މަރުހަލާގެ ތެރެއިން ވެސް އާންމުކުރުމަކީ މަނާކަމެކެވެ. ނަމަވެސް ކުއްޖާގެ މަސްލަހަތަށް ޓަކައި ކަނޑައެޅިފައިވާ ހާލަތުތަކެއްގައި، އަދި ލިޔުމުން ރެކޯޑު ކުރެވޭ ސަބަބުތަކަށް ޓަކައި، ކޯޓުން ހުއްދަކުރާ މައުލޫމާތުތަކެއް މީޑިއާގައި އަދި އެ ނޫން ވެސް ވަސީލަތްތަކުގައި އާންމުކުރެވިދާނެ ކަމަށް ބަޔާންކޮށްފައިވެއެވެ.

މީގެ އިތުރަށް ކުށުގެ ޝިކާރައަކަށް ވެފައިވާ ކުދިންނާއި، އެނޫން ވެސް ސަބަބަކަށްޓަކައި އަޅައިލުމާއި ރައްކައުތެރިކަން ބޭނުންވާ ކުދިންގެ އެއްވެސް މައުލޫމާތެއް ހާމަކުރުމަކީ ވެސް މަނާކަމެކެވެ. އެގޮތުން ކުއްޖާގެ ނަމާއި އެޑްރެގާއި ތައުލީމު ހާސިލްކުރާ ތަނުގެ މައުލޫމާތު ފަދަ ޒާތީ މައުލޫމާތެއް، ނުވަތަ ނުސީދާ ގޮތުން ވެސް ކުއްޖާ އަކީ ކާކުކަން ދޭހަވާ ނުވަތަ ދެނެގަނެވިދާނެ އެއްވެސް މައުލޫމާތެއް އާންމުކުރުން މަނަލެވެ.