ޔާމީންގެ ވެރިކަން ނިމުނުއިރު ދައުލަތުގައި ލޯ ލާރިއެއް ވެސް ނެތް - ޖާބިރު

ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ވެރިކަން ނިިމުނުއިރު ދިވެހިރާއްޖޭގެ ދައުލަތުގައި ލޯ ލާރިއެއް ވެސް ނެތް ކަމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެންބަރު އަބްދުﷲ ޖާބިރު ވިދާޅުވެއްޖެއެވެ.

މެންބަރު މިހެން ވިދާޅުވީ ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ކޮވިޑް-19 ގެ ބަލިމަޑުކަމުން އިޤްތިސާދަށް ކުރާ ނޭދެވޭ އަސަރުގެ ސަބަބުން، ވިޔަފާރިތަކަށް އެހީތެރިވުމުގެ ގޮތުން ލޯނު ނަގާފައިވާ ފަރާތްތަކަށް މޮރިޓޯރިއަމް ދިނުން އެދި ގޮވާލައި ހުށަހަޅާފައިވަ ގަރާރަށް ތާއީދުކޮށް ވާހަކަ ދައްކަވަމުންނެވެ.

ޖާބިރު ވިދާޅުވީ އެހެން ގައުމުތަކުގައި ވެސް ހާލަތު ގޯސްވެގެން ދާ ދަނޑިވަޅުތަކުގައި ރިޒަރވްގައި ފައިސާ ހުންނަ ކަމަށެވެ. ނަމަވެސް މި ސަރުކާރު އައިރު ދައުލަތުގެ ރިޒަރވްގައި ލޯ ލާރިއެއް ވެސް ނެތް ކަމަށް ވިދާޅުވިއެވެ.

ޖާބިރު ވިދާޅުވީ ރާއްޖޭގެ ކޮމަރޝަލް ބޭންކެއް ނެތް ކަމަށާއި، ރާއްޖޭގައި ހުންނަނީ އެސްބީއައިގެ ވެސް ބްރާންޗެއް ކަމަށެވެ. އަދި ދެން ހުންނަނީ ދެތިން ހަތަރު ވިޔަފާރިވެރިއެއް ހިސޯރު ކޮށްގެން އުޅޭ ބޭންކް އޮފް މޯލްޑިވްސް ކަމަށް ވިދާޅުވެ މެންބަރު ވަނީ ނުރުހުން ފާޅު ކުރައްވާފައެވެ. އަދި އެތަނުން ވެސް ޕްރޮޖެކްޓަކަށް ފައިނޭންސެއް ނުދޭ ކަމަށް ވިދާޅުވިއެވެ.

އިތުރަށް ވާހަކަ ދައްކަވަމުން ޖާބިރު ވަނީ މި ދަނޑިވަޅުގައި ރައީސް އަމަލު ކުރައްވަމުން އަންނަ ގޮތާމެދު ހިތްހަމަޖެހޭ ކަމަށް ވިދާޅުވެ ތައުރީފު ކުރައްވާފައެވެ.

މިގަރާރަށް ތާއިދުކޮށް ގިނަ މެންބަރު ވާހަކަ ދެއްކެވިއިރު ގަރާރުގައި ބުނީ ކޮވިޑް-19 ދިވެހިރާއްޖޭގައި މިހާރު ހަލުވިކަމާއެކު ފެތުރެމުންދާއިރު، މި ބައްޔަށް ފައްސިވާ ފަރާތްތައް އެތައް ގުނައަކުން އިތުރުވެފައިވާތީ ޚާއްސަ ފިޔަވަޅުތަކެއް އަޅައިގެން ނޫނީ މިބަލި ފެތުރުން ކޮންޓްރޯލް ނުވާނެކަމަށް ބަލައި ބަލި ފެތުރުން ކޮންޓްރޯލް ކުރުމަށްޓަކައި ދިވެހި ސަރުކާރުގެ ފަރާތުން ޚާއްސަ ފިޔަވަޅުތަކެއް 05 މެއި 2021 ވަނަ ދުވަހުން ފެށިގެން އަޅަންފަށައި، އިތުރު ޚާއްސަ ފިޔަވަޅުތައް އަޅައި، މި އެންމެހާ ފިޔަވަޅުތަކުގެ މުއްދަތު އިތުރުކޮށް އަދި ފިޔަވަޅުތައް އިތުރަށް ހަރުކަށިވަމުންދާ ކަމަށެވެ.

ގަރާރުގައި އިތުރަށް ބުނީ ކޮވިޑް މިހާރު ފެތުރެމުންދާ މިންވަރަށާއި ފިޔަވަޅުތަކުގެ މުއްދަތު އިތުރުކުރަމުންދާ ދިއުމަށް ބަލައި، މިހާރު އަޅާފައިވާ ފިޔަވަޅުތަކަށް ލުއި ނުލިބި ދިގު މުއްދަތަކަށް ފިޔަވަޅުތައް ދަމަހައްޓަން ޖެހިދާނެ ކަމަށް ބެލެވެން އޮތުމާއެކު މޮރެޓޯރިއަމް ލިބޭނެ ގޮތް ހަމަޖައްސައިދިނުމަށް ގޮވާލާ ކަމަށެވެ.