ލޯނު ނަގާފައިވާ ވިޔަފާރިތަކަށް މޮރިޓޯރިއަމް ދިނުމަށް އެދި ހުށަހަޅާފައިވާ ގަރާރުގެ ބަހުސް ފަށައިފި

ކޮވިޑް-19 ގެ ބަލިމަޑުކަމުން އިގްތިސާދަށް ކުރާ ނޭދެވޭ އަސަރުގެ ސަބަބުން، ވިޔަފާރިތަކަށް އެހީތެރިވުމުގެ ގޮތުން ލޯނު ނަގާފައިވާ ފަރާތްތަކަށް މޮރިޓޯރިއަމް ދިނުން އެދި ގޮވާލައި ހުށަހަޅާފައިވަ ގަރާރުގެ އިބްތިދާއީ ބަހުސް ފަށައިފިއެވެ.

ފުވައްމުލަކު ދެކުނު ދާއިރާގެ މެންބަރު މުހައްމަދު މުމްތާޒް ހުށަހަޅުއްވާފައިވާ މި ގަރާރުގެ ބަހުސް ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ފަށާފައިވާއިރު މެންބަރު ވަނީ މި ގަރާރު މަޖިލީހަށް އިއްވާފައެވެ.

މެންބަރު ވިދާޅުވީ ކޮވިޑް-19 ދިވެހިރާއްޖޭގައި މިހާރު ހަލުވިކަމާއެކު ފެތުރެމުންދާއިރު، މި ބައްޔަށް ފައްސިވާ ފަރާތްތައް އެތައް ގުނައަކުން އިތުރުވެފައިވާތީ ޚާއްސަ ފިޔަވަޅުތަކެއް އަޅައިގެން ނޫނީ މިބަލި ފެތުރުން ކޮންޓްރޯލް ނުވާނެކަމަށް ބަލައި ބަލި ފެތުރުން ކޮންޓްރޯލް ކުރުމަށްޓަކައި ދިވެހި ސަރުކާރުގެ ފަރާތުން ޚާއްސަ ފިޔަވަޅުތަކެއް 05 މެއި 2021 ވަނަ ދުވަހުން ފެށިގެން އަޅަންފަށައި، އިތުރު ޚާއްސަ ފިޔަވަޅުތައް އަޅައި، މި އެންމެހާ ފިޔަވަޅުތަކުގެ މުއްދަތު އިތުރުކޮށް އަދި ފިޔަވަޅުތައް އިތުރަށް ހަރުކަށިވަމުންދާ ކަމަށެވެ.

މެންބަރު ވިދާޅުވީ ކޮވިޑްގެ ފުރަތަމަ ރާޅުގައި ބަލި ފެތުރުން ކޮންޓްރޯލް ކުރުމަށް ދިވެހި ސަރުކާރުގެ ފަރާތުން އެޅި ފިޔަވަޅުތަކުގެ ސަބަބުން ވިޔަފާރިތަކުގެ އާމްދަނީ ހީނަރުވެގެން ގޮސްދާނެކަމަށް ބަލައި، ވިޔަފާރިތަކަށް އެހީވުމަށްޓަކައި، ލޯނުތައް ނަގާފައިވާ ވިޔަފާރިތަކަށް ލޯނު ދެއްކުމުގައި ލުއިދިނުމުގެ ގޮތުން މޮރެޓޯރިއަމްގެ ފުރުސަތު ފަހިކޮށްދީފައިވާ ކަމަށެވެ. އަދި ބަލި ކޮންޓްރޯލްކުރުމަށް މިހާރު އަޅާފައިވާ ފިޔަވަޅުތަކަކީ ކޮވިޑްގެ ފުރަތަމަ ރާޅުގައި ބަލި ފެތުރުން ކޮންޓްރޯލް ކުރުމަށް ދިވެހި ސަރުކާރުގެ ފަރާތުން އެޅި ފިޔަވަޅުތަކާ، އެއްފަދަ ނުވަތަ އެއްފަދަ ނަތީޖާތަކެއް ވިޔަފާރިތަކަށް ކުރާނެ ފިޔަވަޅުތަކެއް ކަމަށެވެ.

ގަރާރުގައި އިތުރަށް ބުނީ ކޮވިޑް މިހާރު ފެތުރެމުންދާ މިންވަރަށާއި ފިޔަވަޅުތަކުގެ މުއްދަތު އިތުރުކުރަމުންދާ ދިއުމަށް ބަލައި، މިހާރު އަޅާފައިވާ ފިޔަވަޅުތަކަށް ލުއި ނުލިބި ދިގު މުއްދަތަކަށް ފިޔަވަޅުތައް ދަމަހައްޓަން ޖެހިދާނެ ކަމަށް ބެލެވެން އޮތުމާއެކު މޮރެޓޯރިއަމް ލިބޭނެ ގޮތް ހަމަޖައްސައިދިނުމަށް ގޮވާލާ ކަމަށެވެ.

މީގެ އިތުރުން ކޮވިޑް ފެތުރުން ކޮންޓްރޯލްކުރުމަށް ދިވެހި ސަރުކާރުގެ ފަރާތުން 05 މެއި 2021 ވަނަ ދުވަހުން ފެށިގެން އަޅަމުން އަންނަ ފިޔަވަޅުތައް އެއްކޮށް އުވާލާ ދުވަހުން ފެށިގެން 06 މަސް ދުވަހުގެ ނިޔަލަށް، ރާއްޖޭގެ ރަޖިސްޓްރީ ކޮށްފައިވާ ބޭންކުތަކާއި ފައިނޭންޝަލް އިންސްޓިޓިއުޝަންތައް މެދުވެރިކޮށް ވިޔަފާރިތަކުގެ ބޭނުމަށް ނަގާފައިވާ ލޯނާއި ކްރެޑިޓް ފެޓިލިޓީތަކަށް އެ އުސޫލުގެ ދަށުން މޮރިޓޯރިއަމް ލިބޭނެ ގޮތް ހަމަޖައްސައިދިނުމަށް މޯލްޑިވްސް މަނިޓަރީ އޮތޯރިޓީ ހިމެނޭގޮތަށް ދިވެހި ސަރުކާރަށް ގޮވާލައި ހުށަހަޅާ ކަމަށް މެންބަރު ވިދާޅުވިއެވެ.