މޯނިންވިއު އަލިފާނުގެ ހާދިސާ- އާންމު ހާލަތަށް ރުޖޫއަ ވުމަށް 1.2 މިލިއަން ރުފިޔާ
މިވަގުތު ވަގުތީ ބޯހިޔާވަހިކަމުގައި ތިބީ 14 މީހުން
މއ. މޯނިންގ ވިއުގައި ހިނގި އަލިފާނުގެ ހާދިސާ
މއ. މޯނިންގވިއުގައި މެއި މަހުގެ 27 ވަނަ ދުވަހު ހިނގި އަލިފާނުގެ ހާދިސާގައި ގެއްލުން ލިބުނު އާއިލާތަކަށް ރިލީފް އެހީފޯރުކޮށް ދިނުމަށާއި، އަދި ލިބުނު ގެއްލުމުން އަރައިގަތުމަށް އެހީތެރިވެދިނުމަށް ޖުމްލަ 1,279,393.8 (އެއް މިލިއަން ދެ ލައްކަ ހަތްދިހަ ނުވަ ހާސް ތިން ސަތޭކަ ނުވަދިހަ ތިން ރުފިޔާ އަށްލާރި) ޚަރަދުވާނެ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)ން ބުނެފިއެވެ.
ހާދިސާއާއި ގުޅިގެން ހެދުނު ރިލީފް އެހީ އަދި ގެއްލުމުގެ އެސެސްމަންޓުން ހާމަވާ ގޮތުގައި އަލިފާނުގެ ހާދިސާ ހިނގި ދުވަހުން ފެށިގެން އާދިއްތަ ދުވަހާ ހަމައަށް 34 މީހަކަށް ވަގުތީ ބޯހިޔާވަހިކަން ފޯރުކޮށްދީފައިވާއިރު މިވަގުތު ވަގުތީ ބޯހިޔާވަހިކަމުގައި ތިބީ 14 މީހުންނެވެ. މެއި މަހުގެ 27ން ފެށިގެން ފުރަތަމަ 21 ދުވަހުގެ ނިޔަލަށް ވަގުތީ ހިޔާ ހަމަޖައްސާދިނުމަށް 155،000 ރުފިޔާ ޚަރަދު ކުރެވޭނެ ކަމަށް އެސެސްމަންޓުން ހާމަވެއެވެ.
މި މުއްދަތުގައި، އެހީ ބޭނުންވާ އާއިލާތަކަށް ޒަރޫރީ ކެއިންބުއިމުގެ ކަންތަކަށް ފައިސާގެ ގޮތުގައި 141،000 ރުފިޔާ ވަނީ ހަމަޖައްސާދީފައެވެ. އަދި ބޭނުންވާ އަންނައުނުގެ އެހީތެރިކަން ފޯރުކޮށްދިނުމަށް 46،000 ރުފިޔާ ޚަރަދުކޮށްފައިވެއެވެ. ވުމާއެކު ވަގުތީ ހިޔާ ހަމަޖެއްސުމަށާއި ރިލީފް އެހީގެ ފޯރުކޮށްދިނުމަށް މިހާތަނަށް ޚަރަދު ކޮށްފައިވަނީ ޖުމުލަ 342،000 ރުފިޔާއެވެ.
މޯނިންގވިއުގައި ހިނގި އަލިފާނުގެ ހާދިސާއާއި ގުޅިގެން 8 ގޭބިސީއެއްގެ އެސެސްމަންޓް ވެސް އެ އޮތޯރިޓީން ވަނީ ހަދާފައެވެ. އެގޮތުން ގޭބިސީތަކުގެ ސްޓްރަކްޗަރއަށް ލިބުނު ގެއްލުމާއި، ގޭބިސީތަކުގެ ޒަރޫރީ ހިފާ ގެންގުޅޭ ތަކެއްޗަށް ލިބުނު ގެއްލުން ވަނީ އެސެސްކޮށް ބަލާފައެވެ. މިކަމަށް ޖުމްލަ 705،093.80 ރުފިޔާ ޚަރަދުވާއިރު މީގެ ތެރޭގައި ހިމެނެނީ ސްޓްރަކްޗަރއަށް ލިބުނު ގެއްލުމަށް ބަލައި އާއިލާތަކަށް އެހީގެ ގޮތުގައި ދެވޭ 658،408.80 ރުފިޔާ، އަދި ޒަރޫރީ ހިފާ ގެންގުޅޭ ތަކެއްޗަށް ލިބުނު ގެއްލުމުގެ ބަދަލުގައި އާއިލާތަކަށް ދެވޭ 46،685 ރުފިޔާއެވެ.
މީގެ އިތުރުން އާއްމު ހާލަތަށް ރުޖޫއަވުމަށް ދެވޭ މުއްދަތުގައި ބޯހިޔާވަހިކަން ހަމަޖެއްސުމަށް ވެސް އެހީތެރިކަން ފޯރުކޮށްދޭއިރު، ކުއްޔަށް ދިރިއުޅުނު އާއިލާ އަލުން ތަނެއް ކުއްޔަށް ހިފައިގެން ދިއުމަށް ދޭ އެހީ 2 އާއިލާއަކަށް ފޯރުކޮށްދެއެވެ. މިކަމަށް ހަމަޖައްސާފައި ވަނީ 92،300 ރުފިޔާއެވެ. އަދި މޯނިންގވިއު މަރާމާތުކުރުމަށް ދާ މުއްދަތުގައި ވެސް 2 އާއިލާއަކަށް އެހީވުމަށް ނިންމާފައިވެއެވެ. މިކަމަށް ޚަރަދުވާނީ 140،000 ރުފިޔާ ކަމަށް އެންޑީއެމްއޭއިން ބުނެއެވެ. މިކަމަށް ޚަރަދުވާނީ ޖުމްލަ 232،300 ރުފިޔާއެވެ.
