މއ. މޯނިންގ ވިއުގެ 3 ވަނަ ފަންގިފިލާގައި އަލިފާން ރޯވުމާގުޅިގެން ސިޓީ ކައުންސިލުގެ މުވައްޒަފުން ނުކުމެ އަމަލީ ގޮތުން އެހީވާން ޖެހުނަސް އެކަމަށް ތައްޔާރަށް ތިބި ކަމަށް މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.

މި ހާދިސާ ހިނގުމާގުޅިގެން އެ ސަރަހައްދަށް ވަޑައިގެން ދެއްވި ބަސްދީގަތުމުގައި ޑރ. މުއިއްޒު ވިދާޅުވީ މިއީ ވަރަށް ހިތާމަވެރި ހާދިސާއެއް ކަމަށާއި އެ ގޭގައި ދިރިއުޅޭ މީހުންނާ ބައްދަލުކޮށް އެމީހުންގެ ޝަކުވާއާއި ކަންބޮޑުވުން އަޑުއަހާފައިވާ ކަމަށެވެ.

މުއިއްޒު ވިދާޅުވީ އެމީހުންގެ ފަރާތުން ލިބުނު މައުލޫމާތަށް ބަލާއިރު އެމްއެންޑީއެފްގެ ފަޔަރ އެންޑް ރެސްކިއު ޓީމުން އެ ސަރަހައްދަށް އައިސްފައިވަނީ ހާދިސާ ރިޕޯޓު ކުރެވުނުތާ 50 މިނެޓު ފަހުން ކަމަށެވެ. އަދި އެންމެ ފުރަތަމަ އެ ސަރަހައްދުގައި ހަރަކާތްތެރިވީ ކުޑަ ޓީމެއް ކަމަށެވެ. އަދި މި އަލިފާންގަނޑު ކޮންޓްރޯލު ކުރަން ވަގުތު ނެގީ އެމްއެންޑީއެފުން ކަންތައް ކުރި ގޮތުން ކަމަށެވެ.

އިތުރަށް ވާހަކަ ދައްކަވަމުން މުއިއްޒު ވިދާޅުވީ ސިޓީ ކައުންސިލުން އެމްއެންޑީއެފްގެ ބޭފުޅުންނާ ބައްދަލު ކުރައްވާނެ ކަމަށެވެ. އަދި ޑިޒަރސްޓަރ މެނޭޖްމަންޓުން ކަންތައް ކުރައްވާގޮތް ވެސް ބައްލަވާނެ ކަމަށާއި ޕްލޭނިންގ މިނިސްޓްރީގެ ބޭފުޅުންނާ ވެސް ވާހަކަ ދައްކަވާނެ ކަމަށެވެ. މީގެ އިތުރުން މިހާރު އެންމެ މުހިއްމު ކަމަކީ ލިބުނު ގެއްލުން އެސެސް ކުރުން ކަމަށް މުއިއްޒު ވިދާޅުވިއެވެ.

މުއިއްޒު މިހެން ވިދާޅުވެފައިވާއިރު އެމްއެންޑީއެފްގެ ފަޔަރ އެންޑް ރެސްކިއު ޓީމުން ބުނީ، މި ހާދިސާގެ މައުލޫމާތު ލިބުމާއެކު 2 މިނިޓެއްގެ ތެރޭގައި އަލިފާން ނިއްވާ ފުރަތަމަ ވެހިކަލް ސައިޓަށް ދިޔަ ކަމަށެވެ. އަލިފާން ރޯވި ގޭގެ 4 ފަންގިފިލާއަކީ ވެސް ލަކުޑިން ޑެގް އަޅައިގެން ހަދާފައިވާ ގެއެއް ކަމުން އަލިފާނުގެ ހޫނުން ގެއްލުންތަކެއް ވެފައިވާ ކަމަށާއި، އަލިފާން ފެތުރިގެން ގޮސްފައި ނުވާ ކަމަށެވެ.

އެމްއެންޑީއެފުން ބުނީ އަލިފާނުގެ ހާދިސާ ހިނގީ މއ. މޯނިންގ ވިއު ތިން ވަނަ ފަންގިފިލާގައި ކަމަށެވެ. އެ ހާދިސާގެ ރިޕޯޓު ލިބިފައިވަނީ ފަތިހު ގާތްގަނޑަށް 5:00 ހާއިރު ކަމަށް ބުންޏެވެ. އަލިފާންގަނޑު ނިވާލާފައި ވަނީ 6 ޖެހި ފަހުންނެވެ. އެ ގޭގައި ދިރިއުޅޭ މީހުން މިހާރު ވަނީ ވަގުތީގޮތުން ޣިޔާސުއްދީން ސްކޫލަށް ގެންގޮސްފައެވެ.