ކޮމިޓީ ބައްދަލުވުން ސިއްރުކުރާ ހިސާބުން ދެން ބައްދަލުވުން ބާއްވާނީ މަޖިލީހުގެ އިދާރާގައި
13 ޖޫން 2021 | އާދީއްތަ 14:09ސިއްރު ކޮމިޓީ ބައްދަލުވުމުގައި ކަންކަން ހިނގާދިޔަ ގޮތް މީޑިޔާއަށް ކޮމިޓީން ވަނީ ސާފުކޮށްދީ ބަޔާނެއް ނެރެފައި
މީގެ ކުރިން ބޭއްވުނު އިމްތިޔާޒު ކޮމިޓީގެ ބައްދަލުވުމެއްގެ ތެރެއިން
ރައްޔިތުންގެ މަޖިލީހުގެ އިމްތިޔާޒާ ސުލޫކު ކޮމިޓީގެ ބައްދަލުވުން ސިއްރުކޮށްފައިވަނިކޮށް އެބައްދަލުވުމުގެ ތަފްސީލުތައް ލީކުކޮށްލާފައިވާތީ ކުރިއަށް އޮތް ތަނުގައި އެ ކަން ތަކުރާރުވިއަ ނުދިނުމަށް އޮންލައިންކޮށް ބޭއްވޭ ކޮމިޓީގެ ބައްދަލުވުންތަކުގައި މަޖިލީހުގެ ގަވާއިދުގައިވާ ގޮތުގެ މަތިން ބައްދަލުމުން ސިއްރުކުރަން ކޮމިޓީން ނިންމާ ހިސާބުން ކޮމިޓީގެ ބައްދަލުވުން މެދުކަނޑާލައި މަޖިލީހުގެ އިދާރާގައި އެ ބައްދަލުވުން ކުރިއަށް ގެންދިއުމަށް އެ ކޮމިޓީން ނިންމައިފިއެވެ.
ޑިފެންސް މިނިސްޓްރީގެ ޑެޕިއުޓީ މިނިސްޓަރު ހަސަން ޒަމީލް، ރައްޔިތުންގެ މަޖިލީހުގެ އިމްތިޔާޒަށް އަރައިގަތް ކަމަށް ވިދާޅުވެ އެ މައްސަލަ ބަލައިދިނުމަށް އެދިވަޑައިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިމްތިޔާޒު ކޮމިޓީއަށް ފޮނުއްވި މައްސަލަ ބެލި އިމްތިޔާޒު ކޮމިޓީގެ ބައްދަލުވުން ސިއްރުކޮށްފައިވަނިކޮށް އެބައްދަލުވުމުގެ ތަފްސީލުތައް ލީކުކޮށްލާފައިވާތީ ސިއްރު ކޮމިޓީ ބައްދަލުވުމުގައި ކަންކަން ހިނގާދިޔަ ގޮތް މީޑިޔާއަށް ކޮމިޓީން ވަނީ ސާފުކޮށްދީ ބަޔާނެއް ނެރެފައެވެ.
ކޮމިޓީން ބުނީ 6 މެއި 2021 ވަނަ ދުވަހުގެ ރޭ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ ހަށިކޮޅަށް އަމާޒުކޮށް ދިން ހަމަލާއާއި ގުޅިގެން، ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީން ހިންގަވާ ޕާލިމަންޓްރީ އިންކުއަރީއަށް ހާޒިރުވުމަށް މޯލްޑިވްސް ނެޝެނަަލް ޑިފެންސް ފޯސްގެ އެކިއެކި އޮފިސަރުންނަށް އަންގަވާފައިވާ ކަމަށެވެ.
އަދި ޑިފެންސް މިނިސްޓްރީން ފޮނުވި ސިޓީގައި ސަލާމަތީ ޚިދުމަތްތަކާ ބެހޭ ކޮމިޓީގެ އިންކުއަރީއަށް ހާޒިރުވުމަށް އަންގަވާފައިވާ ސިފައިންގެ ފަރާތުން ރައްޔިތުންގެ މަޖިލީހަށް ޖަވާބުދާރީވާނީ ގައުމީ ދިފާއީ ބާރުން ކަމުގައި އަންގަވާފައިވުމަކީ ރާއްޖޭގެ ޖުމްހޫރިއްޔާގެ ގާނޫނު އަސާސީއާ ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނާ ރާއްޖޭގެ ސުޕްރީމް ކޯޓުން މަޖިލީހަށް ދީފައިވާ ލަފައާއި މަޖިލީހުގެ ގަވާއިދާ ޚިލާފުވުން ކަމުން އެއީ މަޖިލީހުގެ މަސައްކަތައް ހުރަސްއެޅި މަޖިލީހުގެ އިމްތިޔާޒަށް އުނިކަން ލިބޭފަދަ ކަމެއްކަމަށް ވާތީ، 06 ޖޫން 2021 ގައި އެ މައްސަލަ ބަލައިދިނުމަށް އެދިވަޑައިގެން ރައްޔިތުންގެ މަޖިލީހުގެ ރައީސް އެ މައްސަލަ އިމްތިޔާޒާ ސުލޫކު ކޮމިޓީއަށް ފޮނުއްވާފައިވާ ކަމަށެވެ.
މިކަމާ ގުޅިގެން އެ މައްސަލަ ރައްޔިތުންގެ މަޖިލީހުގެ ގަވާއިދުގެ 138 ވަނަ މާއްދާގެ (އ)ގެ ދަށުން 6 ޖޫން 2021 ވަނަ ދުވަހުގެ ރޭ 10:15ށް އެޖެންޑާ ކުރެވުނު ކަމަށާ މަޖިލީހުގެ ގަވާއިދުގެ 146 ވަނަ މާއްދާގައިވާ ގޮތުގެ މަތިން އެ ބައްދަލުވުން ކުރިއަށް ގެންގޮސްފައިވަނީ ސިއްރު ބައްދަލުވުމެއްގެ ގޮތުގައި ކަމަށް ބަޔާނުގައި ބުނެއެވެ.
އެބައްދަލުވުމުގައި ކޮމިޓީއަށް ހުށައެޅި ތާއީދުލިބުނު ހުށައެޅުންތައް ތަރުތީބުން ވޯޓަށް އެހުނު ކަމަށް ބަޔާންކޮށްފައިވެއެވެ. އަދި އެންމެ ފުރަތަމަ ހުށައެޅި ތާއީދުލިބުނު ހުށައެޅުން ކަމުގައިވާ ރައްޔިތުންގެ މަޖިލީހުގެ 241 ކޮމިޓީން މިހާރު ވެސް ޕާލިމަންޓްރީ އިންކުއަރީއެއް ކުރިއަށް ގެންދަވަމުންދާ ކަމަށާއި ހާޒިރުކުރައްވަންޖެހިވަޑައިގަންނަވާ ފަރާތްތައް ހާޒިރުކުރައްވަމުންދާ ކަމަށާ އަދި ހަމަ އެއާއެކު ސިޔާސީ ބޭފުޅު ލިޔުމެއްގައި ސޮއި ކުރައްވާފައި ފޮނުއްވުމަކީ އެއްވެސް ހާލެއްގައި އެބޭފުޅެއްގެ މައްސަލަ ނެގިދާނެކަމެއް ކަމަށް ގަބޫލުނުކުރެވޭ ކަމަށާ މިކަމުގައި ވަރަށް ގިނަ މައުލޫމާތުތަކެއް ހުރުމުން މި މައްސަލައަކީ މަޖިލީހުގެ އިމްތިޔާޒާ ސުލޫކު ކޮމިޓީން ބެލިދާނެ މައްސަލައައެއް ކަމަށް ގަބޫލު ނުކުރެވޭތީ މި މައްސަލަ ކޮމިޓީން ބޭރުކުރުމަށް ފެންނަކަމަށް ހުށައެޅި ތާއީދުލިބުނު ހުށައެޅުން އެވަގުތު ކޮމިޓީގައި ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އަޣުލަބިއްޔަތުން ފާސްވި ކަމަށް ބުނެއެވެ.
