ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ޢަބްދުއްރަޙީމް ޢަބްދުއްލަޠީފް ޓްވިޓަރ އެކައުންޓެއް ނުގެންގުޅުއްވާ ކަމަށް އެމްއެންޑީއެފުން ބުނެފިއެވެ.

ވައިސް ޗީފް އޮފް ޑިފެންސް ފޯސްގެ ނަމުގައި ޓްވިޓަރގައި ވަނީ އެކައުންޓެއް ހަދާފައެވެ. އެކަމާ ގުޅޭގޮތުން އެމްއެންޑީއެފްގެ މީޑިޔާ އޮފިސަރ އިބްރާހީމް ޢާޒިމް ވިދާޅުވީ ވައިސް ޗީފްގެ ނަމުގައި ޓްވިޓަރ ގައި ހަދާފައިވަނީ ފޭކް އެކައުންޓެއްކަމަށާއި، ޓްވިޓަރ އެކައުންޓެއް ބޭނުމެއް ނުކުރައްވާކަމަށެވެ. މީގެއިތުރުން ވައިސް ޗީފް ނޭޝަނަލް ކައުންޓަރ ޓެރަރިޒަމް ސެންޓަރުގައި މަސައްކަތް ނުކުރައްވާ ކަމަށްވެސް ޢާޒިމް ވިދާޅުވިއެވެ.

އެކައުންޓްގައިވާ ގޮތުން އެ އެކައުންޓް ހަދާފައިވަނީ މިއަހަރުގެ ޖޫން މަހުއެވެ. "އަމާޒަކީ ދައުލަތުގެ ރައްކާތެރިކަމުގެ ދަށުގައި ތިބި އެންމެހާ ވެރިންގެ ރައްކާތެރިކަން ކަށަވަރުކުރުން" ކަމަށް ފުރަތަމަ ޓްވީޓެއް ކޮށްފައިވަނީ ހޮނިހިރު ދުވަހުއެވެ.

އޭގެފަހުން މަޖިލީހުގެ 241 ކޮމިޓީން ކުރިޔަށްގެންދާ އިންކުއަރީއާ ގުޅޭގޮތުން ރައްޔިތުންގެ މަޖިލީހުގެ ރަސްމީ ޓްވިޓަރ އެކައުންޓުން ކޮށްފައިވާ ޓްވީޓްތަކެއް ވަނީ ރީޓްވީޓްކޮށްފައެވެ. މި ޓްވީޓްތަކަކީ އިންކުއަރީއަށް ވަކިވަކި ސިފައިން ހާޒިރުވަނިކޮށް މަޖިލީހުން ކޮށްފައިވާ ޓްވީޓްތަކެވެ.

ރައީސް މުހައްމަދު ނަޝީދުގެ ސެކިޔުރިޓީ ފެއިލްވިގޮތުގެ އިންކުއަރީ ކުރިޔަށްގެންދާ ރައްޔިތުންގެ މަޖިލީހުގެ 241 ކޮމިޓީއަށް، ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް ޢަބްދުއްރަޙީމް ޢަބްދުއްލަޠީފް ވަޑައިގެން ކޮމިޓީގެ ސުވާލުތަކަށް ވަނީ މީގެކުރިން ޖަވާބު ދެއްވާފައެވެ.