ލޯކަލް ގަވަރމަންޓް އޮތޯރިޓީ (އެލްޖީއޭ) ބޯޑުގެ ރަށު ކައުންސިލަރުންގެ ގޮނޑިއަށް އިދިކޮޅު ޕީޕީއެމް ނިސްބަތްވާ ކ.ގުރައިދޫ ރަށު ކައުންސިލްގެ ރައީސް ހުސައިން ޔާމީން މުޙައްމަދު އިންތިޚާބު ވެއްޖެއެވެ.
އިލެކްޝަންސް ކޮމިޝަނުން އާންމުކުރި ވަގުތީ ނަތީޖާ ދައްކާގޮތުން ޔާމީން ގޮނޑި ކާމިޔާބު ކުރައްވާފައި ވަނީ 416 ވޯޓުންނެވެ. ޔާމީންއާ އެންމެ ގާތުން އެގޮނޑިއަށް ވާދަކުރެއްވީ އެމްޑީޕީއަށް ނިސްބަތްވާ އަޙްމަދު ކަރަމްއެވެ. އޭނާއަށް 414 ވޯޓު ލިބިފައިވެއެވެ.
އެލްޖީއޭ ބޯޑުގެ ސިޓީ ކައުންސިލްތަކުގެ ގޮނޑިއަށް ހޮވިފައިވަނީ ވެރިކަން ކުރާ އެމްޑީޕީއަށް ނިސްބަތްވާ ފުވައްމުލައް ސިޓީގެ މޭޔަރު އިސްމާއިލް ރަފީގް (އިއްސެ)އެވެ. ބޯޑުގެ ގޮނޑި އިއްސެ ކާމިޔާބު ކުރައްވާފައި ވަނީ އެ ގޮނޑިއަށް އިދިކޮޅު ޕީޕީއެމުން ކުރިމަތިލެއްވި މާލެ ސިޓީގެ މޭޔަރު ޑރ. މުޙައްމަދު މުއިއްޒުއާ ވާދަކުރައްވައިގެންނެވެ. އިއްސެ އިންތިޚާބުވީ ސިޓީ ކައުންސިލް މެމްބަރުންގެ 24 ވޯޓް ހޯއްދަވައިގެންނެވެ. އިއްސެއާ ވާދަ ކުރެއްވި މުއިއްޒަށް ލިބިވަޑައިގަތީ 21 ވޯޓެވެ.
އެލްޖީއޭ ބޯޑުގެ އަތޮޅު ކައުންސިލްތަކުގެ ތެރެއިން ކުރިމަތިލެއްވީ ކ. އަތޮޅު ކައުންސިލްގެ ރައީސް މުޙައްމަދު ނިމާލާއި، ނ. އަތޮޅު ކައުންސިލްގެ ރައީސް މުޙައްމަދު ބަޝީރެވެ. އެކަމަކު ބަޝީރު ފޯމު ހުށަހެޅުއްވީ ސުންގަޑި ހަމަވި ފަހުން ކަމަށް ވާތީ އެ ގޮނޑިއަށް އިންތިޚާބަކާއި ނުލައި ނިމާލް ވަނީ ހޮވިފައެވެ.
