އެލްޖީއޭ ބޯޑު އިންތިޚާބުގެ ވޯޓުލުން ފެށިއްޖެ
12 ޖޫން 2021 | ހޮނިހިރު 05:28އަތޮޅުތެރޭގެ ހުރިހާ ރަށެއްގައި ވޯޓުފޮށި ބެހެއްޓުމަށް އީސީން ވަނީ ނިންމާފައި
އިންތިޚާބާ ބެހޭ މަރުކަޒު
ލޯކަލް ގަވަރމަންޓް އޮތޯރިޓީ (އެލްޖީއޭ) ގެ ބޯޑަށް ކައުންސިލަރުންގެ ތެރެއިން އެމީހުން އިންތިޚާބުކުރާ މެންބަރުން ހޮވުމަށް ބާއްވާ އިންތިޚާބުގެ ވޯޓުލުން ފެށިއްޖެއެވެ.
އިލެކްޝަންސް ކޮމިޝަނުން ކުރިން ނިންމީ 18 އަތޮޅުގައި އިންތިޚާބުގެ ވޯޓު ފޮށި ބެހެއްޓުމަށެވެ. އެކަމަކު ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމެޓީގެ މަޝްވަރާގެ ދަށުން އަތޮޅުތެރޭގެ ހުރިހާ ރަށެއްގައި ވޯޓުފޮށި ބެހެއްޓުމަށް އެކޮމިޝަނުން ފަހުން ވަނީ ނިންމާފައެވެ.
ހުރިހާ ރަށެއްގައި ވެސް ވޯޓުލުން ވަގުތަށް ފެށިފައި ވާކަމަށް އިލެކްޝަންސް ކޮމިޝަނުން ބުނެއެވެ.
މި އިންތިޚާބުގައި މާލެ ސިޓީގެ ވޯޓުލުން ކުރިއަށް ގެންދިޔުމަށް ހަމަޖެހިފައިވަނީ އިންތިޚާބާ ބެހޭ މަރުކަޒުގައެވެ. އަދި އަތޮޅުތެރޭގެ ރަށްރަށުގެ ތެރެއިން އައްޑޫ ސިޓީ ހުޅުދޫ މީދޫގެ ވޯޓު ފޮށި ބެހެއްޓީ ދެރަށުގެ މެދުގައި ހުންނަ ސްކޫލްގައެވެ. އެހެން ރަށްރަށުގެ ވޯޓު ފޮށި ބަހައްޓާފައިވަނީ އެރަށެއްގެ ރަށު ކައުންސިލް ނުވަތަ ސިޓީ ކައުންސިލް އިދާރާގައެވެ.
އެލްޖީއޭ ބޯޑުގެ އިންތިޚާބުގެ ވޯޓުލުން ކުރިއަށް ގެންދިޔުމަށް ހަމަޖެހިފައި ވަނީ ހޮނިހިރު ދުވަހުގެ ހެނދުނު 10:00 ން ފެށިގެން 11:00 އާ ދެމެދުގައެވެ.
