އެލްޖީއޭ ބޯޑު އިންތިޚާބުގެ އެންމެފަހުގެ ތައްޔާރީތައް ނިމިއްޖެ

އަންނަ ހޮނިހިރު ދުވަހު ބާއްވަން ހަމަޖެހިފައި ވާ އެލްޖީއޭ ބޯޑުގެ އިންތިޚާބުގެ އެންމެ ފަހުގެ ތައްޔާރީތައް ނިމިއްޖެއެވެ.

އިލެކްޝަންސް ކޮމިޝަންގެ ރައީސް އަޙްމަދު ޝަރީފް 'ރާއްޖެއެމްވީ' އަށް ވިދާޅުވީ، އާންމުކޮށް އިންތިޚާބުތަކުގައި ވާންޖެހޭ ތައްޔާރީތައް މި އިންތިޚާބުގައި ވެސް ކުރިއަށް ގެންގޮސްފައި ވާކަމަށެވެ. އަދި އެހުރިހާކަމެއް ވެސް މިހާރު ފުރިހަމަކުރެވި ނިމިފައި ވާކަމަށް ވިދާޅުވިއެވެ.

Advertisement

އިލެކްޝަންސް ކޮމިޝަނުން ކުރިން ނިންމާފައި ވަނީ 18 އަތޮޅުގައި އިންތިޚާބުގެ ވޯޓު ފޮށި ބެހެއްޓުމަށެވެ. އެހެން ނަމަވެސް ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމެޓީގެ މަޝްވަރާގެ ދަށުން އެ ކޮމިޝަނުން ފަހުން ނިންމާފައި ވަނީ އަތޮޅުތެރޭގެ ހުރިހާ ރަށެއްގައި ވޯޓުފޮށި ބެހެއްޓުމަށެވެ. އެގޮތުން އަތޮޅުތެރޭގެ ރަށްރަށުގައި ބެހެއްޓުމަށް ހަމަޖެހިފައިވާ ވޯޓު ފޮށިތައް ފުލުހުންގެ އެހީތެރިކަމާއެކު މިހާރު ފޮނުވާފައި ވާކަމަށް އިލެކްޝަންސް ކޮމިޝަނުން މައުލޫމާތު ދެއެވެ.

އިންތިޚާބުގެ ވޯޓު ކަރުދާސް އަތޮޅުތެރެއަށް ފޮނުވާފައި ވަނީ އިލެކްޝަންސް ކޮމިޝަންގެ މުވައްޒަފުންގެ ހަވާލުގައެވެ. އެގޮތުން އެ ކޮމިޝަނުގެ މުވައްޒަފުންގެ ތެރެއިން ކޮންމެ އަތޮޅަކަށް ވެސް ދެ މުވައްޒަފަކު ފޮނުވާފައި ވާކަމަށް ޝަރީފް ވިދާޅުވިއެވެ. ޝަރީފް ވިދާޅުވީ އެ މުވައްޒަފުން ތިބުމަށް ހަމަޖެހިފައިވަނީ، އެ އަތޮޅެއްގައި ހިމެނޭ ރަށްރަށުގެތެރެއިން މޮނިޓަރިންގެ ހާލަތުގައި ނެތް ރަށެއްގައި، ރައްޔިތުންނާ އެކަހެރިވެގެން ކަމަށެވެ.

ރަށްރަށުގައި އިންތިޚާބު ކުރިއަށްދާއިރު ހަރަކާތްތެރި ވާނީ އެ ރަށެއްގެ އޮފިޝަލުންނެވެ. އެގޮތުން އިންތިޚާބުގެ ވޯޓުލުން ނިމި ވަގުތީ ނަތީޖާ އިއުލާން ކުރުމަށްފަހު ވޯޓު ފޮށިތައް އަތޮޅުތެރޭގައި ތިބޭ ކޮމިޝަންގެ މުވައްޒަފުންނާ ހަވާލުކުރުމަށް ހަމަޖެހިފައި ވާކަމަށް ޝަރީފް ވިދާޅުވިއެވެ.

އިންތިޚާބަށް ހޭދަވީ ޚަރަދުތަކާ ބެހޭގޮތުން ޝަރީފް ވިދާޅުވީ، އެންމެ ގިނަ ހޭދައެއް ކުރަން ޖެހުނީ އެއްތަނުން އަނެއްތަނަށް ތަކެތި އުފުލުމަށް ކަމަށެވެ. ޝަރީފް ވިދާޅުވީ އިންތިޚާބުގެ ލޮޖިސްޓިކް ކަންކަމަށް ގާތްގަނޑަކަށް އެއްމިލިއަން ޚަރަދުވާނެ ކަމަށް ލަފާކުރެއްވޭ ކަމަށެވެ. އިލެކްޝަންސް ކޮމިޝަނުގެ ބަޖެޓުން އެ ޚަރަދުތައް ކުރުމުގެ ހުއްދަ ފިނޭންސް މިނިސްޓްރީން ދީފައި ވާކަމަށް ޝަރީފް ވިދާޅުވިއެވެ.

މި އިންތިޚާބުގައި މާލެ ސިޓީގެ ވޯޓުލުން ކުރިއަށް ގެންދިޔުމަށް ހަމަޖެހިފައިވަނީ އިންތިޚާބާ ބެހޭ މަރުކަޒުގައެވެ. އަދި އަތޮޅުތެރޭގެ ރަށްރަށުގެ ތެރެއިން އައްޑޫ ސިޓީ ހުޅުދޫ މީދޫގެ ވޯޓު ފޮށި ބެހެއްޓުމަށް ހަމަޖެހިފައި ވަނީ ދެރަށުގެ މެދުގައި ހުންނަ ސްކޫލްގައެވެ. އެހެން ރަށްރަށުގެ ވޯޓު ފޮށި ބެހެއްޓުމަށް ހަމަޖެހިފައިވަނީ އެރަށެއްގެ ރަށު ކައުންސިލް ނުވަތަ ސިޓީ ކައުންސިލް އިދާރާގައެވެ.

އެލްޖީއޭ ބޯޑުގެ އިންތިޚާބުގެ ވޯޓުލުން ކުރިއަށް ގެންދިޔުމަށް ހަމަޖެހިފައި ވަނީ އަންނަ ހޮނިހިރު ދުވަހުގެ ހެނދުނު 10:00 ން ފެށިގެން 11:00 އާ ހަމައަށެވެ.