ރަައްޔިތުންގެ މަޖިލީހުގެ ތުޅާދޫ ދާއިރާގެ އެމްޑީޕީ މެމްބަރ ހިސާން ހުސައިން އަކީ ދަންޖައްސަން ޖެހޭ މީހެއްކަމަށާއި ހިސާން މަރާލިއަސް ފާފަވެރި ނުވާނެކަމަށް މީދޫ ދާއިރާގެ މެމްބަރ އަހުމަދު ސިޔާމް މުހައްމަދު ވިދާޅުވި މައްސަލަ ރައްޔިތުންގެ މަޖިލީހުގެ އިމްތިޔާޒާއި ސުލޫކީ ކޮމިޓީން ބެލުމަށްފަހު މިމައްސަލާގައި ސިޔާމް ހިސާން އަރިހުން މައާފަށް އެދިވަޑައިގަތުމަށް ދެންނެވުމަށާއި ސިޔާމަށް ނަސޭހަތްދިނުމަށް ފާސްކޮށްފިއެވެ.
މި ހާދިސާ ހިނގާފައިވަނީ ޖޫން މަހުގެ 6 ވަނަ ދުވަހު ކުރިޔަށްދިޔަ 241 ކޮމިޓީގެ ބައްދަލުވުމަށް ފަހުއެވެ. ސިޔާމް، ހިސާން އާ ދިމާލަށް އެހެން ވިދާޅުވާ އޯޑިއޯއެއް ހޯމަ ދުވަހުގެ ރޭގެ ވަގުތެއްގައި ވަނީ ލީކުކޮށްލާފައެވެ. ލީކުކޮށްލާފައިވާ އޯޑިއޯގައި ސިޔާމް ވިދާޅުވާކަމަށް އިވެނީ "ހަގީގަތުގައިވެސް ހިސާން ދައްޖަންސަން ޖެހޭކަމަށް. އެކަން ކޮށްގެން ފާފަވެރިވެސްނުވާނެ." އެވެ.
މިކަމާ ގުޅިގެން ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގެ ރިޔާސަތުގައި އިންނެވި ވިލުފުށި ދާއިރާގެ މެމްބަރ ހަސަން އަފީފު ވިދާޅުވީ މިކަން ހިސާން ވަނީ މަޖިލީހުގެ ރައީސްގެ ސަމާލުކަމަށް ގެންނަވާފައި ކަމަށެވެ. އަދި މިމައްސަލަ ފުލުހުންނާއި އެމްއެންޑީއެފަށް ހުށަހަޅާފައިވާކަމަށާއި އިމްތިޔާޒު ކޮމިޓީއަށްވެސް ފޮނުވާފައިވާ ކަމަށެވެ.
ކޮމިޓީއަށް މިމައްސަލަ ފޮނުއްވުމާއެކު ބުދަ ދުވަހު ބޭއްވި ކޮމިޓީގެ ބައްދަލުވުމުގައި މިކަމުގައި މަނަދޫ ދާއިރާގެ މެންބަރު އަހުމަދު ހާރޫން ހުށަހެޅުއްވީ ސިޔާމަށް މިފަދަ ކަމެއް އިތުރަށް ތަކުރާރުނުކުރުމަށް އެދި ނަސޭހަތްތެރިވުމަށާއި މާފަށް އެދިވަޑައިގަތުމަށް އެންގުމަށެވެ. މިހުށަހެޅުން ފާސްކޮށްފައިވަނީ ކޮމިޓީގެ އިއްތިފާގުންނެވެ.
މިހުށަހެޅުން ހުށަހެޅި އެކަމަށް ބަހުސް ކުރުމަށް ހުޅުވާލުމާއެކު 241 ކޮމިޓީގައިވެސް އިންނަވާ އިމްތިޔާޒު ކޮމިޓީގެ މެމްބަރ މަޑުއްވަރީ ދާއިރާގެ މެމްބަރ އާދަމް ޝަރީފް ވިދާޅުވީ ސިޔާމް މިހާރު ވަނީ ހިސާންގެ ކިބައިން މާފަށް އެދިވަޑައިގެންފައިކަމަށެވެ. އަދި އެ ދެ ބޭފުޅުން މިހާރު ސަލާންގަލާންކޮށް މައްސަލަ ހައްލުކޮށްފައިވާ ކަމަށް ޝަރީފް ވިދާޅުވިއެވެ.
މައްސަލަ ހައްލުކޮށްފައިވާ ކަމަށް ޝަރީފް ވިދާޅުވުމުން އެ މައްސަލަ ބޭރުކޮށްލަން ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުﷲ ހުށަހެޅުއްވި އެވެ. ނަޝީދު ވިދާޅުވީ މައާފަށް އެދިފައިވާކަން ނުރަސްމީކޮށް އެނގިފައިވާތީ ރަސްމީކޮށް މިކަން ބަލާ މައްސަލަ ބޭރުކޮށްލުމަށް ހުށަހަޅުއްވާ ކަމަށެވެ.
