ދިއްދޫ ގޮނޑުދޮށް ހިމާޔަތްކުރުމަށް ޖިއޯބޭގްސްއާއެކު ކުރިއަށް
9 ޖޫން 2021 | ބުދަ 19:06ރަށް ގިރުމުން ސަލާމަތް ކުރުމަށްޓަކާ 310 މީޓަރުގެ ސަރަހައްދެއްގައި ގޯނި ރިވެޓްމެންޓު ޖަހާނެ
ދިއްދޫ ގޮނޑުދޮށް ހިމާޔަތްކުރުމަށް ކުރާ މަސައްކަތުގެ ތެރެއިން
ދިއްދޫ ގޮނޑުދޮށް ހިމާޔަތްކުރަން ޖިއޯބޭގްސްއަށް ވެލިއެޅުމުގެ މަސައްކަތް ފަށައިފިއެވެ.
ހއ. ދިއްދޫ ގޮޑުދޮށް ހިމާޔަތް ކުރުމުގެ މަޝްރޫއުގެ ދަށުން، މިހާރު ކުރިއަށްދާ މަސައްކަތަކީ ގޯނިތަކަށް ވެލި އެޅުންކަމަށް، މި މަސައްކަތް ކުރާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އިން ވަނީ ބުނެފައެވެ.
އަދި ކޮނުމަށްފަހު ބިންގަނޑު އެއްވަރު ކުރުމަށް 7،750 ކިއުބިކް މީޓަރުގެ ވެލި ބޭނުންކުރުމާއި ގޯނި ތަކަށް ވެލި އެޅުމަށް 1،926 ކިއުބިކް މީޓަރު ވެލި ބޭނުން ކުރުމަށް ހަމަޖެހިފައި ވާކަމަށް އެމްޓީސީސީން މައުލުމާތު ދެއެވެ.
މީގެ އިތުރުން، ރަށް ގިރުމުން ސަލާމަތް ކުރުމަށްޓަކާ 310 މީޓަރުގެ ސަރަހައްދެއްގައި ގޯނި ރިވެޓްމެންޓު ޖެހުމުގެ މަސައްކަތްވެސް މި މަޝްރޫއުގެ ތެރޭގައި ހިމެނެއެވެ. އެމްޓީސީސީއާ ހަވާލުކޮށްގެން ކުރިއަށް ގެންދާ މި މަޝްރޫއުއަކީ 10.02 މިލިއަން ރުފިޔާގެ މަޝްރޫއެކެވެ.
މިކަމުގެ އަމަލީ މަސައްކަތް ފެށުމަށްޓަކައި، އެމްޓީސީސީގެ ޓީމާއި މެޝިނަރީ އެރަށަށް ގޮސްފައިވަނީ 25 ފެބްރުއަރީ 2021 ވަނަ ދުވަހުއެވެ. އަދި 28 ފެބްރުއަރީ 2021 ވަނަ ދުވަހު ޕްރޮޖެކްޓް ސައިޓަށް މޮބިލައިޒްކޮށްފައެވެ.
