ހިސާން ދަންޖައްސަން ޖެހޭ ކަމަށް ސިޔާމް ވިދާޅުވި މައްސަލަ ފުލުހުންނާއި، ސިފައިން އަދި އިމްތިޔާޒު ކޮމިޓީއަށް ހުށަހަޅައިފި
މިކަން ހިސާން ވަނީ މަޖިލީހުގެ ރައީސްގެ ސަމާލުކަމަށް ގެންނަވާފައި
މީދޫ ދާއިރާގެ މެމްބަރ އަހުމަދު ސިޔާމް މުހައްމަދު
ރަައްޔިތުންގެ މަޖިލީހުގެ ތުޅާދޫ ދާއިރާގެ އެމްޑީޕީ މެމްބަރ ހިސާން ހުސައިން އަކީ ދަންޖައްސަން ޖެހޭ މީހެއްކަމަށާއި ހިސާން މަރާލިއަސް ފާފަވެރި ނުވާނެކަމަށް މީދޫ ދާއިރާގެ މެމްބަރ އަހުމަދު ސިޔާމް މުހައްމަދު ވިދާޅުވި މައްސަލަ ބަލައިދިނުމަށް އެދި ޑިފެންސް މިނިސްޓްރީ އަށާއި ދިވެހި ފުލުހުންގެ ޚިދުމަތް އަދި މަޖިލީހުގެ އިމްތިޔާޒާއި ސުލޫކު ކޮމިޓީއަށް ފޮނުވާފައިވާކަމަށް ރައްޔިތުންގެ މަޖިލީހުން ބުނެފިއެވެ.
މި ހާދިސާ ހިނގާފައިވަނީ ޖޫން މަހުގެ 6 ވަނަ ދުވަހު ކުރިޔަށްދިޔަ 241 ކޮމިޓީގެ ބައްދަލުވުމަށް ފަހުއެވެ. ސިޔާމް، ހިސާން އާ ދިމާލަށް އެހެން ވިދާޅުވާ އޯޑިއޯއެއް ހޯމަ ދުވަހުގެ ރޭގެ ވަގުތެއްގައި ވަނީ ލީކުކޮށްލާފައެވެ. ލީކުކޮށްލާފައިވާ އޯޑިއޯގައި ސިޔާމް ވިދާޅުވާކަމަށް އިވެނީ "ހަގީގަތުގައިވެސް ހިސާން ދައްޖަންސަން ޖެހޭކަމަށް. އެކަން ކޮށްގެން ފާފަވެރިވެސްނުވާނެ." އެވެ.
މިކަމާ ގުޅިގެން ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގެ ރިޔާސަތުގައި އިންނެވި ވިލުފުށި ދާއިރާގެ މެމްބަރ ހަސަން އަފީފު ވިދާޅުވީ މިކަން ހިސާން ވަނީ މަޖިލީހުގެ ރައީސްގެ ސަމާލުކަމަށް ގެންނަވާފައި ކަމަށެވެ.
ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ ނުވަތަ 241 ކޮމިޓީން އަންނަނީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ ސެކިޔުރިޓީ ފެއިލްވި ގޮތުގެ އިންކުއަރީއެއް ކުރިޔަށް ގެންދަމުންނެވެ. ހިސާން އާއި ސިޔާމް އަކީ މި ކޮމިޓީގައި ތިއްބަވާ ދެ މެންބަރުންނެވެ. އެތައް ދުވަހަކު މަޖިލީހަށް ވަޑައިނުގެން ހުންނެވުމަށްފަހު ސިޔާމް ވަނީ ކޮމިޓީން އިންކުއަރީ ކުރިޔަށްގެންދަން ފެށުމުން ކޮމިޓީގެ ބައްދަލުވުންތަކަށް ވަޑައިގަންނަވާފައެވެ.
