މިނިވަން މުއައްސަސާތަކަށް އަތް ބާނައި، މިނިވަންކަން ވަނީ ނަގާލާފައި
'ފުދިއްޖެ ފުނޑިއްޖެ' ހިނގާލުމުގެ ތެރެއިން
ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަސައްކަތް ކުރައްވަނީ ގާނޫނު އަސާސީއާ ހިލާފަށް ދައުލަތް ހިންގުމަށް ކަމަށާއި، އެފުރުސަތު ނުދޭނެ ކަމަށް އެމްޑީޕީގެ ނައިބު ރައީސް އަދި މަޖިލީހުގެ ތުޅާދޫ ދާއިރާގެ ކުރީގެ މެންބަރު ހިސާން ހުސައިން ވިދާޅުވެއްޖެއެވެ.
ހުކުރު ދުވަހުގެ ރޭ ކުރިއަށް ގެންދާ ''ފުދިއްޖެ-ފުނޑިއްޖެ ހިނގާލުމުގައި ހިސާން ވިދާޅުވީ ރައީސް މުއިއްޒުގެ ސަރުކާރުން ގާނޫނު އަސާސީ ފުނޑާލާފައިވާ ކަމަށާއި، ގާނޫނު އަސާސީގެ ރޫހާ ހިލާފަށް ދައުލަތް ހިންގުމަށް މަސައްކަތް ކުރަމުންދާ ކަމަށެވެ.
ހިސާން ވިދާޅުވީ މިނިވަން މުއައްސަސާތަކަށް އަތް ބާނައި، މިނިވަންކަން ނަގާލާފައިވާ ކަމަށެވެ. އަދި ގާނޫނު އަސާސީއާ ހިލާފަށް ދައުލަތް ހިންގުމުގެ ފުރުސަތު ރައްޔިތުން ނުދޭނެކަން ފުދިއްޖެ-ފުނޑިއްޖެ ހިނގާލުމުން ވެސް ފެނިގެންދާ ކަމަށް އޭނާ ވިދާޅުވިއެވެ.
ހިސާން ވިދާޅުވީ މިސަރުކާރާ މެދު ރައްޔިތުން ހިތްހަމަ ނުޖެހޭ ކަމަށާއި، މިސަރުކާރުން ދައުލަތް ހިންގާ ނިޒާމު އޮޅުވާލައި، ރައްޔިތުން ހާލުގައި ޖައްސާފައިވާ ކަމަށެވެ. މިއަދު ހަގީގަތުގައި ވެސް ރައްޔިތުން ފުނޑިފައިވާ ކަމަށް ހިސާން ވިދާޅުވިއެވެ.
