މަހަށް ނިކުމެ އުޅުނު ދޯންޏެއްގެ ފަޅުވެރިއެއްގެ ހާލު ދެރަވުމުން އެމްއެންޑީފްގެ އެހީތެރިކަން ފޯރުކޮށްދީފި

މަހަށް ނިކުމެ އުޅުނު ދޯންޏެއްގެ ފަޅުވެރިއަކު ހާލު ދެރަވެ އެމްއެންޑީއެފުން އެހީތެރިކަން ފޯރުކޮށްދީފިއެވެ.

އެމްއެންޑީއެފްއިން ބުނީ މަސްވެރިކަން ކުރަމުން ދިޔަ ދޯންޏެއްގައި ހުރެ ހާލު ދެރަވި މީހަކު ހޮސްޕިޓަލަށް ގެންގޮސްދިނުމުގައި އެމްއެންޑީއެފް ސަދަން އޭރިއާއިން އެހީތެރިކަން ފޯރުކޮށްދީފައިވާކަމަށެވެ. ސ. ގަން ކަނޑުގައި މަސްވެރިކަން ކުރަމުންދިޔަ "މީރާ" ނަމަކަށް ކިޔާ ދޯންޏެއްގައި ހުރި ދިވެހި ފަޅުވެރިއެއްގެ ހާލުދެރަވީ އޭނާގެ އިނގިއްޔަކަށް ލިބުނު ޒަޚަމްތަކުގެ ސަބަބުންނެވެ.

މި ހާދިސާގެ ރިޕޯޓް އެމްއެންޑީއެފް ސަދަން އޭރިއާ ކޯސްޓްގާޑު ސްކޮޑްރަންއަށް ލިބުނީ ހޯމަ ދުވަހުގެ ހެނދުނު 08:18 ހާއިރުއެވެ. އޭރު އެ ދޯނި އޮތީ ސ. ގަމުގެ ދެކުނުން 10 ނޯޓިކަލް މޭލު ބޭރުގައި މަސްވެރިކަން ކުރަންކަމަށް އެމްއެންޑީއެފުން މަޢުލޫމާތުދިނެވެ. މި ހާދިސާގައި އަނިޔާ ލިބިފައިވަނީ އެ ދޯނީގެ ފަޅުވެރިއެއް ކަމުގައިވާ އުމުރުން 46 އަހަރުގެ ދިވެހި ފިރިހެނަކަށެވެ.

ހާދިސާގެ ރިޕޯޓް ލިބުމާއެކު، އެމްއެންޑީއެފް ސަދަން އޭރިއާ ކޯސްޓްގާޑު ސްކޮޑްރަންގެ ސިފައިން އެ ދޯނި އޮތް ސަރަޙައްދަށް ގޮސް، ބަލި މީހާ ދޯނިން ނަގައިގެން ހޯމަ ދުވަހުގެ ހެނދުނު 09:20 ހާއިރު ސ. ފޭދޫއަށް ވަނީ ގެންގޮސްފައެވެ. އަދި އަވަސް ފަރުވާ ދިނުމަށް ސ. ފޭދޫ ޞިއްޙީ މަރުކަޒަށް އެ މީހާ ގެންގޮސް މިހާރު ފަރުވާދެމުންދާ ކަމަށް އެމްއެންޑީފުން ބުނެއެވެ.