"ރައީސް ނަޝީދަށް ދިން ހަމަލާއަށްފަހު ތަންތަން ގޮއްވާލަން އުޅޭކަމަށް ބުނެ ޕްރޭންކް ކޯލްތަކެއް ލިބުނު"
ބަޔަކަށް މިއީ ސަމާސާއަކަށްވިޔަސް އެމްއެންޑީއެފުން މިއިންކޮންމެކަމެއް ވެސް ސީރިއަސްކަމެއްގެ ގޮތުގައި ބަލާކަމަށް ވިދާޅުވި
މިނިސްޓަރ އޮފި ޑިފެންސް މާރިޔާ އަހުމަދު ދީދީ
މެއި މަހުގެ 6 ވަނަ ދުވަހުގެ ރޭ، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށްދިން ނިރުބަވެރި ހަމަލާއަށްފަހު، ތަންތަން ގޮއްވާލަން އުޅޭކަމަށް ބުނެ "ޕްރޭންކް" ކޯލްތަކެއް ލިބުނުކަމަށް މިނިސްޓަރ އޮފް ޑިފެންސް މާރިޔާ އަހުމަދު ދީދީ ވިދާޅުވެއްޖެއެވެ.
ރާއްޖެ ޓީވީގެ ފަލަސުރުޚީ ޕްރޮގްރާމްގައި ވާހަކަފުޅުދައްކަވަމުން ޑިފެންސް މިނިސްޓަރ މާރިޔާ ވަނީ ރާއްޖޭގެ ސަލާމަތާއި ރައްކާތެރިކަން ކަށަވަރުކުރުމަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ކުރަމުންދާ މަސައްކަތްތަކުގެ ތަފުސީލު ހިއްސާކުރައްވާފައެވެ. ކޮވިޑް-19ގެ ނުރައްކާ މިދިޔަ އަހަރު ފެށުނުތަނާހެން މި މަސައްކަތުގައި ސިފައިން އެކި ފަންތީގައި މެދުކެނޑުމެއްނެތި މަސައްކަތް ކުރަމުންދާކަމަށް މިނިސްޓަރ ފާހަގަކުރެއްވިއެވެ. ސިފައިން ފޯރުކޮށްދޭ ކޮންމެ ޚިދުމަތެއް ވެސް ރައްޔިތުން ބަލައިގެންފައިވާކަމަށް ވިދާޅުވިއެވެ. ނަތީޖާއެއްގެ ގޮތުން އެއް އިރެއްގައި ރައްޔިތުންގެ އިތުބާރު ގެއްލިފައިވި މި މުއައްސާސާއާއި މުއައްސަސާގެ އޮފިސަރުން ކުރަމުންދާ މަސައްކަތަކީ އެންމެ ފެންވަރު ރަނގަޅު މަސައްކަތްތައްކަމަށް ރައްޔިތުން މިއަދު ބުނަމުންދާކަމަށް ވިދާޅުވިއެވެ. ރައްޔިތުންނަށް ލިބިގެންދިޔަ އައު އިތުބާރާއެކު މިއަދު ކޮވިޑް ފެސިލޓީއެއް ތަރައްޤީކުރަންކަމުގައިވިޔަސް، ނޫނީ ވެކްސިނާއި ސާމްޕަލް ފަދަ ތަކެތި އެއްތަނުން އަނެއްތަނަށް ގެންދިއުންކަމުގައިވިޔަސް މިކަންކަން ސިފައިނާ ހަވާލުކުރުމަށް ރައްޔިތުން އެދޭކަމަށް ވިދާޅުވިއެވެ. މިއާއެކު މިއަދު ސިފައިންގެ ޒިންމާ އިތުރުވެފައިވާއިރު، މެއި މަހުގެ 6 ވަނަ ދުވަހުގެ ރޭ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށްދިން ނިރުބަވެރި ހަމަލާއާއެކު އެމްއެންޑީއެފުންވަނީ "އެމްބަރ" އަށް ސެކިއުރިޓީ ސްޓޭޓަސް މަތިކޮށްފައެވެ.
މިފަދަ ނާޒުކު ދަނޑިވަޅެއްގައި ނިރުބަވެރި އިތުރު ނުރައްކާތެރި ހަމަލާތަކެއް ވެސް އައުން އެކަށީގެންވާތީ އެކަމަށް އެމްއެންޑީއެފުން ފުރިހަމައަށް ތައްޔާރުވެތިބޭކަމަށް މިނިސްޓަރ ވިދާޅުވިއެވެ. މިނިސްޓަރ މާރިޔާވަނީ ރައީސް ނަޝީދަށް ދިން ހަމަލާއަށްފަހު ތަންތަން ގޮއްވާލަން އުޅޭކަމަށް ބުނެ "ޕްރޭންކް" ކޯލްތަކެއް ލިބުނުކަމަވެ. ބަޔަކަށް މިއީ ސަމާސާއަކަށް ނުވަތަ ސަކަރާތަކަށް ވިޔަސް އެމްއެންޑީއެފުން މިއިންކޮންމެކަމެއް ވެސް ސީރިއަސްކަމެއްގެ ގޮތުގައި ބަލައި ރައްކާތެރިކަން ކަށަވަރުކުރުމުގައި މަސައްކަތްކުރަމުންދާކަމަށް ވިދާޅުވިއެވެ. ޑިފެންސް މިނިސްޓަރ މާރިޔާ ވަނީ، ސަމާސާއަކަށް ވެސް މިފަދަ ދަނޑިވަޅެއްގައި ހިތްތަކުގައި ބިރުވެރިކަން އުފެދޭން މަގުފަހިވާ މިފަދަ ކަންކަމުން ދުރުހެލިވުމަށް ރައްޔިތުންގެ ކިބައިން އެދިވަޑައިގެންފައެވެ.
ރައީސް ނަޝީދަށް ދިން ހަމަލާއާ ގުޅިގެން ރައްޔިތުންގެ މަޖިލީހުން ކުރިއަށް ގެންދާ އިންކުއަރީއާ ގުޅޭގޮތުން ކުރި ސުވާލަށް ޖަވާބުދެއްވަމުން މިނިސްޓަރ މާރިޔާ ވަނީ މި އިންކުއަރީއަށް މަރުހަބާ ވިދާޅުވާ ކަމަށާއި މަޖިލީހުން އަހާ ކޮންމެ ސުވާލަކަށް ޖަވާބު ދޭން ތައްޔާރަށް ހުންނެވި ކަމަށް ވިދާޅުވެފައެވެ. މިނިސްޓަރ މާރިޔާ ވަނީ މަޖިލީހުގެ އިންކުއަރީއަށް ކޮންމެ ވަގުތަކު ވެސް އެކަމަނާ ހާޒިރުކުރުމުގެ ބާރު މަޖިލީހަށް ލިބިގެންވާކަމަށް ވިދާޅުވެފައެވެ. ޑިފެންސް މިނިސްޓްރީން އެ މުއައްސަސާގެ ކަންކަން ރަަނގަޅުކުރުމަށް ރައްޔިތުންގެ މަޖިލީހުގެ ލަފައާއި ރިކޮމެންޑޭޝަން އަބަދުވެސް ބަލައިގަންނާނެކަމަށް މިނިސްޓަރ ވިދާޅުވިއެވެ.
ރައީސް ނަޝީދަށް އަމާޒުކޮށް އައިއީޑީއެއް ގޮއްވާލައިގެންދިން ހަމަލާއާ ގުޅިގެން ސެކިއުރިޓީ ބްރިީޗްވި ގޮތުގެ އިންކުއަރީއެއް ހަދަން ނިންމައި ރައްޔިތުންގެ މަޖިލީހުގެ 241 ކޮމިޓީން އެ މަަސަައްކަތް ފެށީ މެއި މަހުގެ 24 ވަނަ ދުވަހުއެވެ. މިނިސްޓަރ މާރިޔާ ވަނީ މަޖިލީހުގެ އިންކުއަރީއަށް ވަކިވަކި ސިފައިން ކޮމެޓީއަށް ހާޒިރު ނުކުރަން ނިންމިގޮތުގެ ތަފުސީލު ހިއްސާކުރައްވާފައެވެ.
ޑިފެންސް މިނިސްޓަރ މާރިޔާ ވަނީ މި ސަރުކާރު ވެރިކަމަށް އައުމަށް ފަހު އެމްއެންޑީފްއަކީ ދެފުށްފެންނަ ޒިންމާދާރު އަދި ވަކިން ޚާއްސަކޮށް ސިޔާސީ ނުފޫޒުން އެއްކިބާވެގެން މަސައްކަތްކުރާ މުއައްސަސާއަކަށްވެގެން ހިނގައްޖެކަމަށެވެ. މި ސަބަބައްޓަކައި ރައްޔިތުންގެ ލޯތްބާއި އިތުބާރު ދުވަހެއް ދުވަހަކަށް އެމްއެންޑީއެފްއަށް އިތުރުވާކަން ތަކުރާރުކޮށް މިނިސްޓަރ ވަނީ ފާހަކުރައްވާފައެވެ.
