އާކިޓެކްޓް އެސޯސިއޭޝަންގެ ފުރަތަމަ ކައުންސިލް އިންތިހާބު ބާއްވައިފި

މޯލްޑިވްސް އާކިޓެކްޓް އެސޯސިއޭޝަންގެ ކައުންސިލް ހޮވުމަށް ބާއްވާ ފުރަތަމަ ކައުންސިލް އިންތިހާބު ވޯޓުލުން ބާއްވައިފި އެވެ.

މި އިންތިހާބުގެ ވޯޓުލުން ކުރިއަށްގެންގޮސްފައިވަނީ ފެކަލްޓީ އޮފް އިސްލާމިކް ސްޑަޓީސް ހުންނަ ބިލްޑިންގަ އެވެ.

މޯލްޑިވްސް އާކިޓެކްޓް އެސޯސިއޭޝަންގެ އިންތިހާބަށް 13 މެންބަރުން ކުރިމަތިލާފައިވާ އިރު އިންތިހާބުގައި ހޮވުމަށް ހަމަޖެހިފައި ވަނީ، ހަ މެންބަރުންނެވެ.

މިއިންތިހާބު ކުރިއަށްގެންދަނީ ހޮނިހިރު ދުވަހުގެ 10:00 އިން ފެށިގެން ހަވީރު 05:00 ޖެހުމާ ހަމައަށެވެ. މޯލްޑިވްސް އާކިޓެކްޓް އެސޯސިއޭޝަނަށް ހަ މެންބަރުން ހޮވުމަށް ހަމަޖެހިފައިވާ އިރު މި ހަ މެންބަރުން ހޮވަނީ ސިއްރު ވޯޓަކުންނެވެ.

މޯލްޑިވްސް އާކިޓެކްޓް އެސޯސިއޭޝަން މިދިޔަ އަހަރު ހޯމް މިނިސްޓްރީގައި ރަޖިސްޓްރީކޮށްގެން ކުރިއަށްގެންދާ އިރު މި އެސޯސިއޭޝަނުގެ ބޭނުމަކީ، އިމާރާތް ކުރެހުމާއި ޑިޒައިން ކުރުމުގެ ދައިރާ ރާއްޖޭގައި ކުރިއަރުވާއި، މިފަންނު ރާއްޖޭގައި ފުޅާކުރުމަށް އެކުލަވާލެވިފައިވާ ޖައްމިޔާއެކެވެ.

މޯލްޑިވްސް އާކިޓެކްޓް އެސޯސިއޭޝަންގައި 75 މެންބަރުން ތިބޭ އިރު މެންބަރުންނަށް ވުމުގެ ފުރުސަތު ވަނީ ހުޅުވާލެވިފަ އެވެ.

މިކަމާ ގުޅޭ ގޮތުން އެ އެސޯސިއޭޝަންގެ ކައުންސިލު މެންބަރު މުހުތާޒް ޝަފީގު ވިދާޅުވީ، ކައުންސިލަށް މެންބަރުން މިގޮތަށް ހޮވުމުގެ ބޭނުމަކީ، އެ އެސޯސިއޭޝަނުން ހާސިލް ކުރަން ބޭނުންވާ ކަންކަން ފަސޭހަކަމާއި އެކު ހާސިލު ކުރުމެވެ.

"އިމާރާތްތައް ފަރުމާކުރުމާއި، މާހައުލު އިންނަންވީ ގޮތް ކަނޑައެޅުމާއި، ސަރުކާރަށް ވެސް ކޮންސަލްޓެންސީ ދިނުން ހިމެނޭ. އެހެންމަ އެކަންތައްތައް ނިންމުމުގައި މަސައްކަތް ކުރުން ހިމެނޭ." މުހުތާޒް ވިދާޅުވި އެވެ.

އެގޮތުން ސްޓޫޑެންޓް މެންބަރާއި، ޕްރޮފެޝަނަލް މެންބަރުންނާއި ޖެނެރަލް މެންބަރުންނަށް ވުމުގެ ފުރުސަތުވަނީ ހުޅުވާލާފަ އެވެ. އެގޮތުން މި ދައިރާއިން ފަސްޓް ޑިކްރީ ހާސިލްކޮށްފައިވާ ފަރާތްތަކަށް ޕްރޮފެޝަނަލް މެންބަރުންނަށް ވުމުގެ ފުރުސަތު ލިބިގެންދާނެ ކަމަށް އެ އެސޯސިއޭޝަނުން ބުނެ އެވެ.