ވަކިވަކި ސިފައިން ހާޒިރު ނުކުރެވޭނެ ކަމަށް ބުނާ މައްސަލައިގެ ތުހުމަތުތައް ރައީސް ޞާލިހަށް
ޑިފެންސް މިނިސްޓަރ ވިދާޅުވަނީ ވަކި ވަކި ސިފައިން މަޖިލީހަށް ޙާޒިރުވާން ކަންބޮޑުވާކަމަށް
ރައީސުލްޖުމްހޫރިއްޔާ އިބްރާހިމު މުހައްމަދު ޞާލިހު އާއި ރައްޔިތުންގެ މަޖިލިހުގެ ރައީސް މުހައްމަދު ނަޝީދު
ވަކިވަކި ސިފައިން 241 ކޮމިޓީއަށް ހާޒިރު ނުކުރަން އިސްވެ އުޅުއްވަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް ކަމަށް ރައީސް ނަޝީދު ތުހުމަތު ކުރައްވައިފިއެވެ.
އެމްޑީޕީގެ ޗެއާޕާރސަން އަދި ހެންވޭރު ހުޅަނގު ދާއިރާ މެމްބަރު ހަސަން ލަތީފް މެދުވެރި ކުރައްވައި އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕްގައި ޕޯސްޓް ކުރި މެސެޖްގައި ބުނެފައިވަނީ، ރައީސުލް ޖުމްހޫރިއްޔާ ލޮބީ ކުރައްވައިގެން އަސްކަރިއްޔާގެ ވަކިވަކި ސިފައިން 241 ކޮމިޓީއަށް ހާޒިރުވިޔަ ނުދޭން މަސައްކަތް ކުރައްވާ ސަބަބެއް އެމަނިކުފާނަށް އެއްގޮތަކަށް ވެސް ވިސްނިވަޑައިނުގަންނަވާ ކަމަށެވެ. ސިއްރުކުރަން މަސައްކަތް ކުރައްވަނީ ކޮންކަމެއްތޯ ކަމަށް ވިދާޅުވެ އެ މެސެޖްގައި ސުވާލު އުފައްދަވާފައިވެއެވެ. ހަސަން ލަތީފް މެދުވެރި ކުރައްވާ ރައީސް ނަޝީދު ފޮނުއްވި މި މެސެޖްގެ ސްކްރީން އިމޭޖްތައް ސޯޝަލް މީޑިއާގައިވެސް ވަނީ އާއްމުވެފައެވެ.
ވަކިވަކި ސިފައިން ކޮމިޓީއަށް ހާޒިރު ނުކުރެވޭނެ ކަމަށްބުނެ އަސްކަރިއްޔާއިން މަޖިލީހަށް ފޮނުއްވި ސިޓީގައި ސޮއި ކުރައްވާފައިވާ ޑިފެންސް މިނިސްޓަރުގެ ނައިބު ހަސަން ޒަމީލްގެ މައްސަލައެއް އިމްތިޔާޒާއި ސުލޫކީ ކޮމިޓީއަށް ރައީސް ނަޝީދު ހުށަހެޅުއްވިއެެވެ. އެހެން ނަމަވެސް އެ މައްސަލަ ކޮމިޓީންވަނީ ބޭރުކޮށްލާފައެވެ.
އާދިއްތަ ދުވަހުގެ ރޭ އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕުގައި އަލިފުށީ ދާއިރާގެ މެމްބަރު މުހައްމަދު ރަޝީދު ހުސެއިނަށް ޓެގް ކުރައްވައި މަޖިލީހުގެ ނައިބު ރައީސް އީވާ އަބްދުﷲ ފޮނުއްވި މެެސެޖްގައި ވިދާޅުވެފައިވަނީ 241 ކޮމިޓީގެ ތަހުގީގަށް ހުރަސް އެޅުއްވުމަށް މަސައްކަތް ނުކުރެއްވުމަށެވެ. ކޮމިޓީގެ އެހެން މެމްބަރުންނަށް ގުޅައިގެން ކަންކަމަށް ހުރަސްތައް މެދުވެރި ކުރުވުމަށް ކުރައްވާ މަސައްކަތް ހަމަ ނުޖެހޭ ކަމަށެވެ.
އީވާގެ މެސެޖްގައި، ރައީސް ނަޝީދުގެ ހާލަތާމެދު ވީ ހަމްދަރުދީގެ "ޑެޑްލައިން" ހަމަވީ ތޯ ސުވާލު އުފައްދާފައިވެއެވެ. މެސެޖް ނިންމަވާލައްވާފައިވަނީ މިއީވާ ސަރުކާރެއް ކަމަށް ވިދާޅުވެފައެވެ.
241 ކޮމިޓީން ކުރިއަށްގެންދާ އިންކުއަރީއަށް އެކި ފަރާތްތައް ހާޒިކޮށް ގެންދަވަނީ މެއި 6 ވަނަ ދުވަހުގެ ހާދިސާ ހިނގުމުގައި ރައީސް ނަޝީދުގެ ސެކިއުރިޓީ ބްރީޗްވުމަށް މެދުވެރިވި ސަބަބުތައް އޮޅުން ފިލުވުމަށް ސުވާލު ކުރަމުންނެވެ.
