މާލެ ސިޓީގެ ކުރީގެ މޭޔަރ ޝިފާ މުހައްމަދު 241 ކޮމިޓީއަށް ހާޒިރުކޮށް ސުވާލުކޮށްފިއެވެ.
ރައްޔިތުންގެ މަޖިލީހުގެ ރައީސަށް ދެމުން ގެންދިޔަ ސަލާމަތާއި ރައްކާތެރިކަން ބްރީޗްވީ ގޮތް ހޯދުމަށް މަޖިލީހުން ކުރިއަށްގެންދާ ތަހުގީގަށް ޝިފާ ހާޒިރުކުރީ އާދީއްތަ ދުވަަހު ހެނދުނެވެ.
ރައީސް ނަޝީދު ދިރިއުޅުއްވާ ގެ ހުންނަ ނީލޯފަރުމަގުން ވެހިކަލްތައް ހުސްކުރުމަށް މާލެ ސިޓީ ކައުންސިލްގައި އެދުނު ކަމަށް ތަހުގީގަށް ހާމާވާ ކަމަށް ފުލުހުން ބުނެފައިވެއެވެ. އެހެންނަމަވެސް އެ ހާދިސާ ހިނގިއިރުވެސް އެ ގޯޅިން ވެހިކަލްތައް ނުނަގައެވެ. ބެލެވޭ ގޮތުން ޝިފާއާ ސުވާލު ކުރަނީ މިކަމާ ބެހޭ ގޮތުންނެވެ.
މި ތަހުގީގަށް ފުލުހުންނާއި ސިފައިން ހާޒިރުކޮށް ސުވާލު ކުރުމަށް ކޮމިޓީން ވަނީ ނިންމާފައެވެ. ހޮނިހިރު ދުވަހު ސީޕީ މުހައްމަދު ހަމީދާ ފުލުހުން ހާޒިރުކޮށް ސުވާލުކޮށްފައިވެއެވެ.
ކޮމިޓީން ވަކިވަކި ސިފައިންނާ ސުވާލުކުރަން ބޭނުންވާކަން އެއްގުމުން އަސްކަރިއްޔާއިންވަނީ ވަކިވަކި ސިފައިންނާ ސުވާލު ނުކުރެވޭނެ ކަމަށާއި، ސިފައިންގެ ފަރާތުން ޖަވާބުދާރީވާނީ މުއައްސަސާއިން ކަމަށް ބުނެ ބަޔާނެއް ނެރެފައެވެ. އެއާއެކު ކޮމިޓީ އަށް ހާޒިރުވުމަށް ޗީފް އޮފް ޑިފެންސް ފޯހާއި ވައިސް ޗީފް އޮފް ޑިފެންސް ފޯހަށް ވަނީ އަންގާފައެވެ. ޑިފެންސް މިނިސްޓަރު ކޮމިޓީއަށް ހާޒިރުވުމަށް އަދި އަންގާފައެއް ނުވެއެވެ.
