ޑިފެންސް މިނިސްޓަރުގެ ނާއިބު ހަސަން ޒަމީލްގެ މައްޗަށް ދައުވާ ކޮށްދިނުމަށް އެދި ޕްރޮސެކިއުޓަރ ޖެނެރަަލްގެ އޮފީހުގައި ރައްޔިތުންގެ މަޖިލީހުން އެދިއްޖެއެވެ.
ޕީޖީ އޮފީހަށް މިކަމަށް އެދި ސިޓީ އެއް ލިބިފައިވާ ކަމަށާއި، މިކަމާ ގުޅޭގޮތުން އާދީއްތަ ދުވަހުގެ ވަގުތެއްގައި ޕީޖީއާއެކު ބައްދަލު ކުރައްވާނެ ކަމަށް އިތުބާރު ހުރި މަސްދަރުކުން ރާއްޖެއެމްވީއަށް ވަނީ މައުލޫމާތުދީފައެވެ. މިކަމާ ގުޅޭ ގޮތުން ރަސްމީ ސިފައެއްގައި ޕީޖީން އެއްވެސް މައުލޫމާތެއް ހާމައެއް ނުކުރެއެވެ.
މަޖިލީހުގެ އިމްތިޔާޒާ ބެހޭ ގާނުނޫގެ ދަށުން ޒަމީލްގެ މައްޗަށް ދައުވާ ކޮށްދިނުމަށް ޕީޖީގައި އެދިފައިވަނީ، މަޖިލީހުގެ 241 ކޮމިޓީއަށް ވަކިވަކި ސިފައިން ހާޒިރު ނުކުރެވޭނެ ކަމަށް ބުނެ މަޖިލީހަށް ފޮނުވި ސިޓީއާ ގުޅިގެންނެވެ. އެ ސިޓީގައި ސޮއި ކުރައްވާފައިވަނީ، މިނިސްޓަރުގެ ނާއިބު ހަސަން ޒަމީލެވެ.
މެއި 6ވަނަ ދުވަހުގެ ހަމަލާއާ ގުޅިގެން 241 ކޮމިޓީން ކުރިއަށްގެންދާ ތަހުގީގަށް ފުލުހުންނާ ސިފައިން ހާޒިރުކޮށް އަންނަނީ ސުވާލު ކުރަމުންނެވެ. ހޮނިހިރު ދުވަހު ކަމިޝަނަރ އޮފް ޕޮލިސް މުހައްމަދު ހަމީދާއި ފުލުހުންގެ ބައެއް އިސްވެރިން ހާޒިރުކޮށް ސުވާލުކޮށްފައިވެއެވެ.
ޑިފެންސް މިނިސްޓަރ މާރިއާ އަހްމަދު ދީދީ ހާޒިރުވުމަށް މިހާރު އަންގާފައި ނުވާވާއިރު، ޗީފް އޮފް ޑިފެންސާއި ވައިސް ޗީފް އޮފް ޑިފެންސްވެސް ހާޒިރު ކުރުމަށްވަނީ އަންގާފައެވެ.
