މަޖިލީހުގެ ތަހުގީގަށް ޑިރެކްޓަރ ކައުޓަރ ޓެރަރިޒަމް، ސުޕްރިންޓެންޑެންޓް އޮފް ޕޮލިސް ފަރީދު އިސްމާއީލް ހާޒިރުކޮށް ސުވާލުކޮށްފިއެވެ.

މަޖިލީހުގެ ތަހުގީގަށް ކޮމިޝަނަރ އޮފް ޕޮލިސް މުހައްމަދު ހަމީދުވެސް ހޮނިހިރު ދުވަހު ހާޒިރުކުރިއެވެ. ފުލުހުން ބުނީ ސީޕީގެ އިތުރުންވެސް ބައެއް އެހެން ފުލުހުން ހާޒިރުވުމަށް އަންގާފައިވާ ކަމަށެވެ. ރައްޔިތުންގެ މަޖިލީހުގެ ކޮމިޓީއަށް ޖަވާބުދާރީވުމުގައި ދިވެހި ފުލުހުންގެ ޚިދުމަތުގެ ގާނޫގެ 73ވަނަ މާއްދާގައިވާ ގޮތުގެ މަތިން އަމަލުކުރާނެ ކަމަށް ފުލުހުން ބުނެއެވެ.

މިއީ ރަައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ދެމުންގެންދާ ސަލާމަތާ ރައްކާތެރިކަން ބްރީޗްވީ ގޮތް ބެލުމަށް 241 ކޮމިޓީން ކުރިއަށްގެންދާ ތަހުގީގެކެވެ. މި ތަހުގީގަށް ފުލުހުންނާ ސިފައިން ހާޒިރުކޮށް ސުވާލު ކުރުމަށް ކޮމިޓީން ވަނީ ނިންމާފައެވެ.

ކޮމިޓީން ވަކިވަކި ސިފައިންނާ ސުވާލުކުރަން ބޭނުންވާކަން އެއްގުމުން އަސްކަރިއްޔާއިންވަނީ ވަކިވަކި ސިފައިންނާ ސުވާލު ނުކުރެވޭނެ ކަމަށާއި، ސިފައިންގެ ފަރާތުން ޖަވާބުދާރީވާނީ މުއައްސަސާއިން ކަމަށް ބުނެ ބަޔާނެއް ނެރެފައެވެ. އެއާއެކު ކޮމިޓީ އަށް ހާޒިރުވުމަށް ޗީފް އޮފް ޑިފެންސް ފޯހާއި ވައިސް ޗީފް އޮފް ޑިފެންސް ފޯހަށް ވަނީ އަންގާފައެވެ.

ސީޕީ ހާޒިރުކޮށްފައިވަނީ އިންޓެލިޖެންސާ ގުޅޭގޮތުން މައުލޫމާތު ސާފު ކުރުމަށެވެ. މެއި 6ވަނަ ދުވަހުގެ ހާދިސާއާ ގުޅޭ މައުލޫމާތެއް ފުލުހުންގެ އިންޓެލިޖެންސަށް ލިބިފައިނުވާ ސީޕީވަނީ ނޫސްވެރިންގެ ބައްދަލުވުމުގައި ވިދާޅުވެފައެވެ.