އައްޑޫ ސިޓީން އިތުރު ތިން މީހަކު ޕޮޒިޓިވްވެ، ޖުމްލަ 308އަށް
4 ޖޫން 2021 | ހުކުރު 18:13ހޮސްޕިޓަލުގައި ތިން މީހަކަށް ދަނީ ފަރުވާދެމުން
އައްޑޫ ސިޓީ
އައްޑޫ ސިޓީން އިތުރު ތިން މީހަކު ކޮވިޑް-19އަށް ޕޮޒިޓިވްވެ، ޖުމްލަ ޕޮޒިޓިވްވީ މީހުންގެ އަދަދު 308ށް އަރައިފިއެވެ.
އައްޑޫ އިމަރޖެންސީ ސެންޓަރުން ބުނީ ބުރާސްފަތި ދުވަހުގެ އިރުއޮއްސި 6:00އިން ހުކުރު ދުވަހުގެ އިރުއޮއްސި 6:00އަށް 119 ސާމްޕަލެއް ނަގާފައިވާއިރު، އޭގެ ތެރެއިން 3 މީހަކު ޕޮޒިޓިވްވެފައިވާ ކަމަށެވެ. މިއީ މަރަދޫއިން އެކަކު، އަދި ހިތަދޫއިން 2 މީހުންނެވެ.
ތަފާސް ހިސާބުތައް ދައްކާ ގޮތުން ހިތަދޫއިން 78 މީހުން، މަރަދޫ-ފޭދޫއިން 2 މީހުން، ފޭދޫއިން 2 މީހުން، ރިސޯޓުތަކުންނާއި އަދި އެހެނިހެން ތަންތަނުން އެކަކު، މީދޫއިން އެކަކު، ހުޅުދޫއިން 26 މީހުން އަދި މަރަދޫއިން 8 މީހަކު ޕޮޒިޓިވްވެފައިވެއެވެ. އަދި ގަމުން އެކަކު ވަނީ ޕޮޒިޓިވްވެފައެވެ.
119 އެކްޓިވް ކޭސް ހިމެނޭއިރު 187 މީހަކު ވަނީ ބަލިން ރަނގަޅުވެފައެވެ. މިހާތަނަށް އައްޑޫ ސިޓީން 4973 ސާމްޕަލެއް ނަގާފައިވެއެވެ.
އައްޑޫ ސިޓީން މިބަލީގައި ދެމީހަކު ނިޔާވެފައިވެއެވެ. އަދި މިހާރު ހޮސްޕިޓަލުގައި ތިން މީހަކަށް ދަނީ ފަރުވާދެމުންނެވެ.
އައްޑޫ ސިޓީ ދެވަނަ ފަހަރަށް މޮނިޓަރިންގެ ހާލަތަށް ގެނައީ 1 މެއި ވީ ހޮނިހިރު ދުވަހުގެ ވަގުތެއްގައެވެ. އޭގެފަހުން ކޮންމެ ދުވަހަކު ވެސް އެސިޓީން ޕޮޒިޓިވް ކޭސްތައް ރިޕޯޓު ކުރެވެއެވެ. އައްޑޫގައި ކޮވިޑްގެ ހާލަތު ރަނގަޅު ނޫން ކަމަށާއި، ކޮންޓްރޯލް ކުރުމަށް އާއްމު ރައްޔިތުންގެ އެއްބާރުލުން ބޭނުންވާ ކަމަށް އައްޑޫ ސިޓީ ކައުންސިލުން ބުނެއެވެ.
ކޮވިޑް ކޮންޓްރޯލް ކުރުމުގެ ގޮތުން ވަނީ ގިނަ ފިޔަވަޅުތަކެއް އަޅާފައެވެ. އެގޮތުން ކޮންމެހެން ނުކުންނަން ޖެހިގެން މެނުވީ ނުނުކުތުމަށް އިލްތިމާސްކޮށްފައި ވާއިރު، އަސާސީ ޚިދުމަތްތައް ފޯރުކޮށްދިނުމުގައި ރައްޔިތުންނަށް ލުއި ފަސޭހަވާނެ ގޮތަށް ކަންކަން އިންތިޒާމް ކުރުމުގެ މަސައްކަތް އައްޑޫ ސިޓީ ކައުންސިލުން ދަނީ ކުރަމުންނެވެ.
