މި ފަހަރުގެ ޔޫރޯއަށް ދިން ބައެއް ލުއިތައް

ކޮވިޑް-19 އާ ހެދި މި އަހަރަށް ފަސްކުރި ޔޫރޯ ފުޓްބޯޅަ މުބާރާތް ބާއްވަން ޖެހިފައިވަނީ ކޮވިޑުގެ ބިރުވެރިކަމުގެ ތެރޭގައެވެ. އެގޮތުން މެޗުތައް ކުޅެން ޖެހެނީ ސަޕޯޓަރުން ނުވައްދައި ފަޅު ސްޓޭޑިއަމްތަކެއްގައެވެ. އަދި މުބާރާތުގައި ވާދަކުރާ ގައުމުތަކުގެ ކުޅުންތެރިންނަށްވެސް ކޮވިޑުގެ ބިރު އޮތުމުން، ޔުއެފާއިން ވަނީ މި ފަހަރުގެ މުބާރާތުގައި ބައެއް ލުއިތައް ދޭން ނިންމާފައެވެ.

އެގޮތުން ކުރިއަށް އޮތް ޔޫރޯގައި ވާދަކުރާ ޓީމުތަކުގެ ސްކޮޑުގައި އިތުރު ތިން ކުޅުންތެރިންނަށް ޖާގަ ދޭން ޔުއެފާއިން ވަނީ ނިންމާފައެވެ. ކޮވިޑާ ގުޅިގެން ގެންނަ ވަގުތީ ބަދަލެއްގެ ގޮތުގައި މި ބަދަލު ގެންނަން މީގެ ކުރިން ޔުއެފާ ނެޝަނަލް ޓީމު ކޮމެޓީން ހުށަހެޅިއެވެ. އެއާއެކު މި މަހުގެ ކުރީކޮޅު ޔުއެފާއިން ނެރުނު ބަޔާނެއްގައި ބުނީ ކޮވިޑާއެކުވެސް މި އަހަރު ބޭއްވުމަށް ނިންމާފައިވާ ޔޫރޯ މައްސަލަތަކެއް ނައިސް ނިންމާލަން ބޭނުންވާ ކަމަށެވެ. އެގޮތުން މި މުބާރާތުގައި ކޮންމެ ޓީމަކަށްވެސް 26 ކުޅުންތެރިން ސްކޮޑުގައި ޖެހުމުގެ ހުއްދަ ދީފައިވާ ކަމަށް ވަނީ ބުނެފައެވެ. މީގެ ކުރިން ޔޫރޯ މުބާރާތްތަކުގެ ސްކޮޑުގައި ހިމެނޭނީ 23 ކުޅިންތެރިންނެވެ.

މީގެ އިތުރުން ޔުއެފާއިން ވަނީ މި ފަހަރުގެ ޔޫރޯގައި ފަސް ކުޅުންތެރިން ބަދަލުކުރެވޭ ގަވާއިދަށް އަމަލުކުރަންވެސް ނިންމާފައެވެ. މެޗެއްގެ ތެރެއިން ފަސް ކުޅުންތެރިން ބަދަލުކުރެވޭ ގަވާއިދު އިންޓަނޭޝަނަލް ފުޓްބޯލް އެސޯސިއޭޝަން ބޯޑް (އައިފެބް) އިން ފާސްކޮށްފައިވަނީ ކޮވިޑަފަހު ފުޓްބޯޅަ އަލުން ފެށުމުގެ ގޮތުން ފީފާއިން ހުށަހެޅުމުން މިދިޔަ އަހަރެވެ. މި ބަދަލު ގެންނަން އައިފެބުން ފާސްކުރީ ކުޅުންތެރިންނަށް ލިބޭ ވަރުބަލިކަމާއި، އަނިޔާތައް މަދުކުރުމުގެ ގޮތުންނެވެ.

މީގެ ކުރިން މި ގަވާއިދަށް އަމަލުކުރެވޭނީ މިދިޔަ ސީޒަނުގައި އެކަނި ކަމަށް ކަނޑައެޅި ނަމަވެސް، ފަހުން މި ސީޒަނުގައިވެސް މި ގަވާއިދަށް އަމަލުކުރުމުގެ ހުއްދަ ވަނީ ދީފައެވެ. އެގޮތުން ޔޫރޯގައި ފަސް ކުޅުންތެރިން ބަދަލުކުރެވޭ ގަވާއިދަށް އަމަލުކުރަން ޔުއެފާއިން ނިންމީ އަންނަ އަހަރުގެ މާޗު މަހުގެ ނިޔަލަށް ކުރިއަށްދާ ފީފާ ވޯލްޑް ކަޕުގެ ކޮލިފައިން މެޗުތަކުގައިވެސް ފަސް ކުޅުންތެރިން ބަދަލުކުރެވޭ ގަވާއިދަށް އަމަލުކުރަން ފީފާއިން ނިންމުމާ ގުޅިގެންނެވެ.

ޔޫރޯގައި ފަސް ކުޅުންތެރިން ބަދަލުކުރެވޭ ގޮތަށް ހެދިއިރު، ޔޫރަޕުގެ ބޮޑެތި ލީގުތަކުގެ ތެރެއިން މި ގަވާއިދަށް އަމަލުނުކުރާ ހަމައެކަނި ލީގަކީ އިނގިރޭސި ޕްރިމިއާ ލީގެވެ. އެގޮތުން މީގެ ކުރިންވެސް ޔުއެފާގެ މުބާރާތްތަކުގައި ފަސް ކުޅުންތެރިން ބަދަލުކުރެވޭ ގަވާއިދަށް އަމަލުކުރިއިރު، ޕްރިމިއާ ލީގު ފިޔަވައި އެހެން ލީގުތަކުގައި އަންނަނީ ފަސް ކުޅުންތެރިން ބަދަލުކުރެވޭ ގަވާއިދަށް އަމަލުކުރަމުންނެވެ.

ކޮވިޑާއެކުވެސް މި އަހަރުގެ ޔޫރޯ ބާއްވާއިރު، މި ފަހަރުގެ މުބާރާތުން އަލަށް ފެނިގެންދާނެ ކަމަކީ ވީޑިއޯ އެސިސްޓަންޓް ރެފުރީ (ވީއޭއާރް) މުޅިން އަލަށް ބޭނުން ކުރަން ފެށުމެވެ. ޔުއެފާއިން މީގެ ކުރިންވެސް ވީއޭއާރް ބޭނުންކުރި ނަމަވެސް، އެންމެ ފަހުން 2016 ވަނަ އަހަރު ފްރާންސްގައި ބޭއްވި މުބާރާތުގައި ވިއޭއާރް ބޭނުން ކޮށްފައެއް ނުވެއެވެ.