ޖޫން 5އިން ފެށިގެން ނެދަލޭންޑްސްގައި ލުއިތައް ދެނީ

ކޮވިޑް-19އާ ގުޅިގެން ނެދަރލޭންޑްސްގައި އަޅާފައިވާ ފިޔަވަޅުތަކަށް ޖޫން 5އިން ފެށިގެން ލުއިތައް ދޭން ނިންމައިފިއެވެ.

ހުކުރު ދުވަހު މިކަން އިއުލާން ކުރައްވާފައިވަނީ ނެދަރލޭންޑްސްގެ ބޮޑުވަޒީރު މާކް ރުއްޓޭއެވެ.

ބޮޑުވަޒީރު ވިދާޅުވެފައިވަނީ ލޮކްޑައުނަށް ލުއިތައް ދިނުމަށް ކުރަމުންދާ މަސައްކަތުގެ ތެރެއިން، ތިންވަނަ ފޭސްގައި ހުރިހާ ތަނެއް ހުޅުވާނެ ކަމަށެވެ. އޭގެ ތެރޭގައި ކެފޭ ރެސްޓޯރެންޓްތަކާއި ބާރ ތަކާއި ދާރުލްއާސާރުތައް ހުޅުވާނެ ކަމަށެވެ. ނަމަވެސް މިތަންތަން ހުޅުވާނީ ޝަރުތުތަކާ އެކުގައި ކަމަށާއި، އޭގެ ތެރޭގައި އާންމުކޮށް އަމަލުކުރަން އަންގާފައިވާ ކަންތައްތަކާއި، އިތުރަށް އަޅާފައިވާ ފިޔަވަޅުތައް ހިމެނެއެވެ.

ނެދަރލޭންޑްސްގެ ބޮޑުވަޒީރު ވިދާޅުވެފައިވަނީ އަންނަ ހަފްތައިން ފެށިގެން ސިނަމާތަކާއި ކޮންސެޓް ހޯލްތައް ހުޅުވައި، އެތަންތަނަށް ވަދެވޭ މީހުންގެ އަދަދަކީ 50އަށް ހައްދަވާނެ ކަމަށެވެ. މީގެ އިތުރުން ގްރޫޕު ރިހާސަލް ބޭއްވުމާއި، ތާރީޚާއި ސަގާފަތާ ގުޅުން ހުރި ކަންކަން ކުރުމަށް ހުޅުވާލާނެ ކަމަށެވެ.