މިކަމާ ގުޅުންހުރި ހުރި އިދާރާތަކުގެ ފަރާތުން މިކަން ހިނގާދިޔަ ގޮތް ސާފުކުރުމަށް، ކޮމިޓީން އެދިފައިވޭ
ހިޔުމަން ރައިޓްސް އެންޑް ޖެންޑާ ކޮމެޓީގެ ބައްދަލުވުމެއްގެ ތެރެއިން
ކޮވިޑް-19 އަށް ޕޮޒިޓިވްވެ އާއިލާއާއެކު ކަރަންޓީނުގައި ހުރި އުމުރުން 10 އަހަރުގެ ފާތުމަތު މިޝްކާ މުހައްމަދަށް ފަރުވާ ދިނުން ލަސްވެ، އޭނާ ނިޔާވި މައްސަލާގައި، ކަމާ ގުޅުންހުރި އިދާރާތަކާ ބައްދަލުކޮށް މިކަން ބެލުމަށް، ރައްޔިތުންގެ މަޖިލީހުގެ ހިޔުމަން ރައިޓްސް އެންޑް ޖެންޑަރ ކޮމިޓީން ނިންމައިފިއެވެ.
ބުރާސްފަތި ދުވަހުގެ ހަވީރު ކުރިޔަށްދިޔަ ކޮމިޓީ ބައްދަލުވުމުގައި މެމްބަރުން މަޝްވަރާ ކުރައްވާފައިވަނީ މިކަން ކުރިޔަށް ގެންދެވޭނެ ގޮތަކާއި ގުޅޭގޮތުންނެވެ. އެގޮތުން ކޮމިޓީގެ މުގައްރިރު، ހިންނަވަރު ދާއިރާގެ މެމްބަރ ޖީހާން މަހުމޫދް ވިދާޅުވީ މިޝްކާ ނިޔާވާން ދިމާވި ސަބަބަކީ ކުއްޖާއަށް ދޭންޖެހޭ ފަރުވާ ހޯދުމަށްޓަކައި ސިއްހީ މަރުކަޒަކަށް ވާސިލްވުމަށް ބޭނުންވާ އެމްބިޔުލާންސްގެ ޚިދުމަތް ލަސްވެގެންކަން ފާހަގަކުރެވޭ ކަމަށާއު، އެކަމަށް ހެލްތު މިނިސްޓަރ އަހުމަދު ނަސީމް އިއުތިރާފްވެވަޑައިގެން އެކަމަށް މައާފަށްވެސް އެދިވަޑައިގަންނަވާފައިވާ ކަމަށެވެ.
ޖީހާން ވިދާޅުވީ މިކަމާއި ގުޅުންހުރި ހުރިހާ އިދާރާތަކުގެ ފަރާތުން، މިކަން ހިނގާދިޔަ ގޮތް ސާފުކުރުމަށް ކޮމިޓީން އެދިފައިވާނެކަމަށެވެ.
ޖީހާން ވިދާޅުވީ ހިޔުމަން ރައިޓްސް ކޮމިޝަނުން މިމައްސަލަ ބަލަމުންދާކަމަށް ވިދާޅުވެފައިވާ ކަމަށާއި، އަދި ވީހާވެސް އަވަހަކަށް އެމައުލޫމާތުތައް ކޮމިޓީއާ ހިއްސާކުރައްވާނެކަމަށް އަންގަވާފައިވާކަމަށެވެ. އަދި އެންމެ ފަހުން ލިބިފައިވާ މައުލޫމާތަކީ ހެލްތު މިނިސްޓްރީން މިކަން ތަހުގީގު ކުރުމަށްފަހު އާންމުކުރި ރިޕޯޓް ކަމަށެވެ.
ނަމަވެސް ކޮމިޓީން މިކަމުގައި ބަލަން ބޭނުންވަނީ ނުރައްކާތެރި ހާލަތަށް ހުށަހެޅޭ ކުޑަކުދިންނަށް އޮތް ރައްކާތެރިކަމަކީ ކޮބައިކަން ކަމަށް ޖީހާން ވިދާޅުވިއެވެ.
މިފަދަ ހާދިސާއެއް އެހެން އާއިލާއަކަށް ދިމާނުވުމަކީ ބޭނުމަކަށްވާއިރު ދެން ކުރަންވީ ކަންކަން ދެނެގަތުމަކީ ކޮމިޓީން މިކަން ބަލަން ބޭނުންވާކަމެއްކަމަށް ޖީހާން ވިދާޅުވިއެވެ.
މިކަމާއި ގުޅިގެން ކަމާގުޅޭ ފަރާތްތަކުގެ މައުލޫމާތު ލިބުމުން އެފަރާތްތަކާއެކު ކޮމިޓީން ބައްދަލުވުމެއް ބޭއްވުމަށް ހުށަހެޅުއްވީ ހޮޅުދޫ ދާއިރާގެ މެމްބަރ ޔޫނުސް އަލީ އެވެ. އެ ހުށަހެޅުއްވުމަށް މަކުނުދޫ ދާއިރާގެ މެމްބަރ މުހައްމަދު ރާއީ ވަނީ ތާއީދުކުރައްވާފައެވެ. އެހެންކަމުން ކަމާގުޅޭ އިދާރާތަކާއެކު މިކަމުގައި ކޮމިޓީން ބައްދަލުކުރުމަށް ވަނީ ނިންމާފައެވެ.
މީގެއިތުރުން ބުދަ ދުވަހުގެ ރޭގެ ވަގުތެއްގައި މާލޭގެ ގެއަކުން މަރުވެފައިވާ އަންހެނަކު ފެނުނު މައްސަލާގައި، އޭނާއަކީ އެންޑީއޭގެ މެތަޑޮން ޓްރީޓްމަންޓްގައި ހުރި ފަރާތަކަށްވާއިރު އެކަން ހިނގައިދިޔަ ގޮތް ބެލުމަށްވެސް ކޮމިޓީން ވަނީ ނިންމާފައެވެ. އެއީ އެފަދަ ފަރާތްތަކަކީ ގާތުން ބަލަހައްޓަންޖެހޭ ބަޔަކަށްވާތީ އެކަން ހިނގާދިޔަ ގޮތް ބެލުމަށް ގުޅުންހުރި ފަރާތްތަކުން މައުލޫމާތުތައް ހޯއްދަވާނެ ކަމަށް އޭނާ ވިދާޅުވިއެވެ.
