ކޯލް ސެންޓަރަށް އަންނަ މުހިންމު ކޯލްތަކަށް އަވަހަށް އެޓެންޑްކުރެވޭނެ ގޮތެއް ހަމަޖައްސަނީ
3 ޖޫން 2021 | ބުރާސްފަތި 02:22ކޯލް ސެންޓަރުގެ ކަންތަކުގައި މިފަހުން ދިމާވި ކަންތައްތަކާއި ގުޅިގެން ދިރާސާއެއް އަންނަނީ ކުރެވެމުން
އެންއީއޯސީގެ މަސައްކަތްތައް ދަރުބާރުގޭގައި ކުރިއަށްދަނީ
ކޮވިޑް-19 އާ ގުޅިގެން ހިދުމަތްހޯދުމަށާއި ކަންކަން ސާފުކުރުމަށް އެންމެން ގުޅުމަށް ހަމަޖެހިފައިވާ ކޯލް ސެންޓަރުގެ ކަންކަން ރަނގަޅުކުރުމަށް އަބަދުވެސް މަސައްކަތްތަކެއް ކުރެވެމުން އަންނަކަމަށް ހެލްތު މިނިސްޓަރ އަހުމަދު ނަސީމް ވިދާޅުވެއްޖެއެވެ.
ހެލްތު އެމަރޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ކޯލް ސެންޓަރުގެ ކަންކަން ރަނގަޅުކުރުމަށް ކުރެވުނު މަސައްކަތްތަކާއި ގުޅޭގޮތުން ނޫސްވެރިއަކު ކުރި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ ކޯލް ސެންޓަރުގެ ކަންތަކުގައި މިފަހުން ދިމާވި ކަންތައްތަކާއި ގުޅިގެން ދިރާސާއެއް ކުރެވެމުންދާ ކަމަށެވެ. އަދި ކޯލް ސެންޓަރަށް ޚާއްސަކޮށްގެން އަހަންމިއްޔަތުކަން ދޭންޖެހޭ ކޯލްތައް ދެނެގެނެވޭނެ މަސައްކަތް އަަންގާރަ ދުވަހުން ފެށިގެން ފަށާފައިވާކަމަށް މިނިސްޓަރ ވިދާޅުވިއެވެ.
ކޮވިޑް-19 ގެ ކަންތަކުގައި އެޗްޕީއޭގެ ކޯލް ސެންޓަރުން ފޯނަށް ޖަވާބު ނުދޭ މައްސަލައަކީ ކޮވިޑް-19 ބަލި ފެނުނީއްސުރެ ވެސް ދިވެހިންގެ ތެރޭގައި ކުރަމުން އަންނަ ޝަކުވާއެކެވެ. ވަކިން ޚާއްސަކޮށް ރަނގަޅު މައުލޫމާތު ނުލިބުމާއި ކަންކަން ނުވުމަކީ ގިނަ ބަޔަކު ކުރަމުން އަންނަ ޝަކުވާއެކެވެ. އެކަމަށް ހައްލު ގެނައުމަށް މަސައްކަތްތަކެއް ކުރަމުންދާ ކަަމަށް ސަރުކާރުން ބުނަމުންދިޔަނަމަވެސް އެކަމަށް ހައްލު އައި ތަނެއް އަދި މިހާތަނަށް އައިއިރު ފެނިފައެއްނުވެއެވެ.
އަންގާރަ ދުވަހުގެ ރޭގެ ދަންވަރުގެ ވަގުތެއްގައި ކޮވިޑްގެ ބަލީގައި ނިޔާވި ފާތުމަތި މިޝްކާގެ ކުއްލި މަރުގެ މައްސަލައިގައި ވެސް ކޯލް ސެންޓަރަށް ގުޅުމުންވެސް މެޑިކަލް ޓީމަށް މައުލޫމާތު ހިއްސާ ކުރެވިއްޖެ ކަމަށާއި, މެޑިކަލް ޓީމުން ދާނެ ކަމަށް ބުނިނަމަވެސް މިޝްކާ ހޮސްޕިޓަލަށް ގެންދިޔުމުގައި އެމްބިޔުލަންސް އައިލެއް ލަސްވުމަކީ މިކަމުގެ ވެފައިވާ އިހުމާލެއް ކަމަށް އާއިލާއިންވެސް ބުނެއެވެ. އެކަމާއި ގުޅިގެން ގިނަ ބަޔެއްގެ ފާޑުކިޔުންތައްވެސް އެޗްޕީއޭއާ ހެލްތު މިނިސްޓްރީއަށް އަންނަނީ އަމާޒުވަމުންނެވެ.
