ސްޕަޓްނިކްވީ ވެކްސިން ހިލޭދޭނެކަމަށް ބުނެ ހުށަހެޅީ ފޭކް ޑޮކިއުމެންޓެއް: މިނިސްޓަރ
3 ޖޫން 2021 | ބުރާސްފަތި 02:38ހުށަހަޅާފައިވާ ޑޮކިޔުމަންޓްތަކުގެ ޞައްހަކަން ބެލުމަށް ފޮރިން މިނިސްޓްރީއަށް ފޮނުވި
ހެލްތު މިނިސްޓަރ އަހުމަދު ނަސީމް
ރަޝިޔާގެ ސްޕަޓްނިކްވީ ވެކްސިން ގަތުމަށް ސަރުކާރުން މަސައްކަތްކުރަމުން އަންނަނީ އެވެކްސިންގެ ފަސް ލައްކަ ޑޯޒް ހަދިޔާކުރުމަށް ރާއްޖޭގެ އަމިއްލަ ކުންފުންޏަކުން ސަރުކާރަށް ހުށަހަޅާފައި ވަނިކޮށްކަމަށްބުނެ ދެކެވެމުންދާ ވާހަކަތައް ހެލްތު މިނިސްޓަރ އަހުމަދު ނަސީމް ދޮގުކުރައްވައިފިއެވެ.
ހެލްތު އެމަރޖެންސީ އޮޕަރޭޝަން ސެންޓަރު (އެޗްއީއޯސީ)ން ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މިކަމާއި ގުޅޭގޮތުން ނޫސްވެރިއަކު ސުވާލުކުރުމުން މިނިސްޓަރ ވަނީ މިކަން ހިނގައިދިޔަ ގޮތް ތަފްސީލްކޮށްދެއްވާފައެވެ. އެގޮތުން އެންމެ ފުރަތަމަ މިކަމާއި ގުޅޭގޮތުން ސިޓީއެއް ލިބިވަޑައިގަންނަވާފައިވަނީ ޑެލްޓާ ޝިޕިން ކުންފުނީގެ ފަރާތުން ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ އާންމު ގޮތެއްގައި މިކަމުގައި މައުލޫމާތު ލިބިފައި އޮންނަނީ އެޕްރޮޑިޔުސް ކުރާ ކުންފުނިން ނުވަތަ އެފަރާތަކުން އެފަދަ އެއްޗިސް ވިއްކާ ކަމަށްކަމަަށެވެ. މިފަދަ ކަންކަމުގައި ދެވަނަ ފަރާތެއް ބޭނުންކުރާކަމުގެ މައުލޫމާތު ލިބިވަޑައިގަނެފައިނުވާތީ މިކަމާމެދު ޝައްކުތަކެއް ކުރެވުނު ކަމަށެވެ.
އެހެންކަމުން ޑޮކިޔުމަންޓްތަކުގެ ޞައްހަކަން ބެލުމަށް ފޮރިން މިނިސްޓްރީއަށް ފޮނުއްވިކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ފޮރިން މިނިސްޓްރީން މިކަން ބެލިބެލުމުގައި ހުށަހަޅާފައިވާ ޑޮކިޔުމަންޓްތަކަކީ ޞައްހަ ނޫން ޑޮކިޔުމަންޓްތަކެއްކަން އެނގިފައިވާކަމަށެވެ.
މިނިސްޓަރ ވިދާޅުވީ ބައެއް ފަރާތްތަކުން އަބަދުވެސް މިކަހަލަ އޮފަރތައް ކުރާކަމަށެވެ. ނަމަވެސް މިނިސްޓްރީން އަބަދުވެސް މަސައްކަތްކުރަނީ ސައްހަކަން ރަނގަޅުކުރުމަށްޓަކައި އަދި ކޯލްޑް ޗެއިން ރަނގަޅަށްތޯ ހުރީ ބެލުމަށް ސަރުކާރުން ސަރުކާރަށް ގުޅައިގެން އެކަން ކުރުމަށް ކަމަށް މިނިސްޓަރ ވިދާޅުވިއެވެ.
ރާއްޖެއިން ރަޝިއާގެ ސްޕަޓްނިކް ވެކްސިންގެ 200،000 ޑޯޒް ގަތުމަށް މަސައްކަތްކުރަމުން އަންނައިރު މި ވެކްސިން އެއްވެސް ލަސްކަމެއްނެތި ރާއްޖެއަށް ލިބޭނެ އިންތިޒާމު ހަމަޖެއްސުމާ ގުޅޭގޮތުން މަޝްވަރާކުރައްވާފައިވާ ކަމަށް ފޮރިން މިނިސްޓަރ އަބްދުﷲ ޝާހިދު ވަނީ ވިދާޅުވެފައެވެ. މިހާރު އެއްބަސްވެފައިވާގޮތުން އެގްރިމެންޓްގައި ސޮއި ކުރާތާ 4 ހަފްތާ ތެރޭގައި ވެކްސިން ލިބޭނެ ކަމަށް ސަރުކާރުން ވަނީ ބުނެފައެވެ.
ރަޝިއާގެ ސްޕަޓްނިކް ވެކްސިން ރާއްޖޭގައި ބޭނުން ކުރުމުގެ ހުއްދަ ދީފައިވަނީ މެއި މަހުގެ 12 ވަނަ ދުވަހުއެވެ. މި ވެކްސިން ޖެހުމުގެ ހުއްދަ ދެވޭނީ އުމުރުން 18 އަހަރުން މަތީ މީހުންނަށް ކަމަށް އެމްއެފްޑީއޭ އިން ބުނެއެވެ. މިއީ ރާއްޖޭގައި ކޮވިޑް 19ގެ ހާލަތުގައި ބޭނުން ކުރުމަށް ހުއްދަ ދީފައިވާ ހަތަރު ވަނަ ވެކްސިނެވެ.
