އެމްބިއުލާންސް ލަސްވި ސަބަބު ދެނެގަތުމަށް ހާމަކަންބޮޑު ތަހުގީގެއް ހިންގުމަށް އާކް އިން ގޮވާލައިފި
2 ޖޫން 2021 | ބުދަ 20:25ރާއްޖޭގައި ޖަހަމުންދާ އެއްވެސް ވެކްސިނެއް ޖެހުމުގެ ހުއްދަ ކުޑަކުދިންނަށް ނެތުމުން ޚިދުމަތް ފޯރު ކޮށްދިނުމުގައި ކުޑަކުދިންގެ ހައްގުތަށް ކަށަވަރުކުރުމަށް އާކް އިން ގޮވާލާފައިވޭ
މިޝްކާ - މިޝްކާ ހޮސްޕިޓަލަށް ގެންދަން އެމްބިއުލާންސް ނައިސް ލަސްވި މައްސަލަ ބަލަނީ
އުމުރުން 10 އަހަރުގެ ފާތިމަތު މިޝްކާ މުޙައްމަދުގެ ހާލު ދެރަވެ އާއިލާއިން އެމްބިއލާންސްގެ ޚިދުމަތަށް އެދުމުން, އެކަމަށް އިޖާބަ ދިނުން ލަސްވި ސަބަބު ދެނެގަތުމަށް އަވަސް އަދި ހާމަކަން ބޮޑު ގޮތެއްގައި ތަހުގީގު ކުރުމަށް އެޑްވޮކޭޓިން ދަ ރައިޓްސް އޮފް ޗިލްޑްރެން (އާކް) އިން ގޮވާލައިފިއެވެ.
ފާތިމަތު މިޝްކާއަކީ ކޮވިޑް ބަލީގައި ރާއްޖޭން ނިޔާވި ފުރަތަމަ ކުޑަކުއްޖާއެވެ. މިޝްކާ ނިޔާވީ ޖޫން މަހުގެ 1 ވަނަ ދުވަހުގެ ރޭ މެންދަމު 12:10 ގައެވެ. މެއި މަހުގެ 31 ވަނަ ދުވަހުގެރޭ, އޭނާގެ ހާލު ދެރަވެ އެމަބިއުލާންސް އަށް ގުޅުމުން, އެމްބިއުލާންސް އައީ 2 ގަޑިއިރާ 30 މިނިޓް ފަހުން ކަމަށް އާއިލާއިން ބުނެއެވެ. އާއިލާއިން ބުނީ ހޮސްޕިޓަލަށް ގެންދެވުނު އިރު މިޝްކާއަށް ހާޓް އެޓޭކެއް ޖެހިފައި ވާކަމަށާއި, އިންޓާނަލް ބްލީޑިން އަކަށް ގޮސްފައި ވާކަމަށެވެ.
މި މައްސަލައާ ގުޅިގެން އާކް އިން ނެރުނު ބަޔާނުގައި, ކޮވިޑް 19 ބަލިމަޑު ކަމުގައި އަހަރަކަށް ވުރެ ގިނަ ދުވަސް ވެފައި ވާއިރު ވެސް ކުޑަކުދިންގެ ސިއްޙީ ފަރުވާގެ ހައްގު ކަށަވަރު ކުރުމަށް ހުރި ނިޒާމީ މައްސަލަތަކަށް ހައްލެއް ލިބިފައި ނުވާތީ ކަންބޮޑުވުން ފާޅުކޮށްފައިވެއެވެ.
މީގެ އިތުރުން ބައްޔަށް ޕޮޒިޓިވްވާ ކުދިންގެ އަދަދު އިތުރުވެފައި ވުމާއެކު, ކުޑަކުދިންނަކީ މިހާރު ރާއްޖޭގައި ޖަހަމުންދާ އެއްވެސް ވެކްސިނެއް ޖެހުމުގެ ހުއްދަ އޮތް އުމުރުފުރާއަކަށް ނުވާތީ, ސިއްޙީ ޚިދުމަތް ފޯރު ކޮށްދިނުމުގައި ކުޑަކުދިންގެ ހައްގުތަށް ކަށަވަރުކޮށްދީ, ޚާއްސަކޮށް މިދަނޑިވަޅު ސަރުކާރުގެ ފަރާތުން އަޅަންޖެހޭ އެންމެހާ ފިޔަވަޅުތައް ވަރުގަދަކުރުމަށް އާކުން ގޮވާލާފައިވެއެވެ.
ރާއްޖޭގައި ކުޑަކުދިންނަށް ކޮވިޑް ބަލި ޖެހެމުންދާ މިންވަރު އިތުރުވެ, 10 އަހަރުން ދަށުގެ 80 އަށްވުރެ ގިނަ ކުދިން ދުވާލަކު މިހާރު ކޮވިޑަށް ޕޮޒިޓިވް ވަމުން ދެއެވެ. އަދި ފާއިތުވި އެއް މަސްދުވަސްތެރޭ އެކަނި ވެސް އެއް އަހަރުން ދަށުގެ ތުއްތު ކުދިންގެ ތެރެއިން 400 އާ ގާތްކުރާ އަދަދަކަށް ކުޑަކުދިން ޕޮޒިޓިވް ވެފައި ވާކަން ތަފާސް ހިސާބު ތަކުން ދައްކައެވެ.
