މިހާލަތުގައި ބޭރަށް ނިކުމެ ކަސްރަތުކުރުން ހުއްދައެއް ނޫން
2 ޖޫން 2021 | ބުދަ 17:26ކޮވިޑް ކޮންޓްރޯލްކުރުމަށް މާލެ ސަރަހައްދުގައި އަންނަނީ ކާފިއު ހިންގަމުން
ކަސްރަތު ކުރުމަށް ޓަކައި ނުކުމެ އުޅޭ ބައެއް
ކޮވިޑް-19 ކޮންޓްރޯލްކުރުމުގެ ގޮތުން މާލެ ސަރަހައްދުގައި އަޅާފައިވާ ފިޔަވަޅުތައް ވަރުގަދަކޮށްފައިވާއިރު، މިހާލަތުގައި ބޭރަށް ނިކުމެ ކަސްރަތުކުރުމުގެ ހުއްދަ ދެވިފައި ނުވާކަމަށް ފުލުހުން ބުނެފިއެވެ.
މީގެކުރިން ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމެއްގައިވެސް ފުލުހުން ވަނީ، ބޭރަށް ނިކުމެ ކަސްރަތުކުރުން ހުއްދަ ނޫންކަމަށާއި އެކަމަށް ހުއްދަނުދެވޭނެ ކަމަށެވެ.
އަދި ބުދަ ދުވަހުގެ ރޭ ފުލުހުން ކޮށްފައިވާ ޓްވީޓެއްގައި ބުނެފައިވަނީ، ކޮވިޑް 19 ގެ މިހާލަތުގައި، ޒަރޫރީ ބޭނުމެއްގައި މެނުވީ ބޭރަށް ނުކުމެއުޅުން މަނާ ކުރެވިފައިވަނީ އެންމެންގެވެސް ރައްކާތެރިކަން ކަށަވަރު ކުރުމަށްޓަކައި ކަމަށެވެ. އެހެންކަމާއެކު މި ހާލަތުގައި ބޭރަށް ނުކުމެ ކަސްރަތު ކުރުން ހުއްދަ ދެވިފައި ނުވާކަމަށެވެ.
ކޮވިޑް-19ގެ ހާލަތު ގޯސްވުމުގެ ސަބަބުން، ކޮވިޑް ފެތުރުން ކޮންޓްރޯލް ކުރުމަށް މެއި 26 ވަނަ ދުވަހުން ފެށިގެން ދެ ހަފްތާގެ މުއްދަތަކަށް މާލެ ސަރަހައްދުގައި ފިޔަވަޅުތައް ވަރުގަދަ ކުރަން ނިންމައި، އެކަން އަންނަނީ ތަންފީޒު ކުރަމުންނެވެ. އަދި ކާފިއު ގަޑި ހަވީރު 4:00އިން ހެނދުނު 8:00އަށް ވަނީ އިތުރުކޮށްފައެވެ.
މީގެއިތުރުން ކާފިއު ނޫން ގަޑިތަކުގައިވެސް ބޭރަށް ނުކުމެ އުޅުމުގައި އިތުރު އުސޫލުތަކެއް ކަނޑައަޅާފައިވާއިރު، ކާފިއު ނޫން ގަޑީގައި ކޮންމެ ގެއަކަށް ވެސް ރެސިޑެންޝަލް ޕަރމިޓެއް ދޫކުރުމަށް ވަނީ ނިންމާފައެވެ.
ރެސިޑެންޝަލް ޕަރމިޓް ދޫކުރާނީ ދެ ބަޔަކަށް ބަހާލައިގެންނެވެ. އެގޮތުން ހެނދުނު 8:00އިން މެންދުރު 12:00އށް އަދި މެންދުރު 12:00އިން ހަވީރު 4:00އަށް، ގެއަކަށް 2 ޕާމިޓް، ދެ ގަޑިއެއްގައި ދޫކުރެވޭނެ ކަމަށް އެޗްއީއޯސީން ބުނެއެވެ.
ހޯމަ ދުވަހުގެ ރޭ 8:00ން ފެށިގެން ރެސިޑެންޝަލް ޕަރމިޓަށް ރިކުއެސްޓް ކުރެވޭނެ ކަމަށް އެޗްއީއޯސީން ބުނެއެވެ. ރެސިޑެންޝަލް ޕަރމިޓަށް އެދޭއިރު ވެރިފިކޭޝަނެއްގެ ގޮތުގައި ގޭގެ ކަރަންޓް މީޓަރުގެ ނަންބަރު ހުށަހަޅަން ޖެހޭނެކަމަށާއި، ކޮންމެ ގެއަކުން ވެސް 2 މީހަކަށް ފާސް ލިބޭނެ ކަމަށް އެޗްއީއޯސީން ބުނެއެވެ.
